Lege so azo ayeke bâ na e ayeke kota ye?

A YEKE azo kue si aye ti tene a gonda ala. Gondango zo alingbi ti sala si tele ti zo anzere. Tongana a gonda e, a yeke sala si e bâ so e sala mbeni nzoni ye. A lingbi ti pusu e ti gi ti sala ye nzoni ahon ti so e sala kozo. Ye oko, tongana e bâ so azo abâ ye so e sala na nene ni pëpe wala ala kasa ni, nzara ti salango nzoni ye ayeke sigigi na yâ ti e. Lege so azo ayeke bâ na e alingbi ti sala ye mingi na ndo lege so e mveni e yeke bâ na tele ti e.

A yeke nzoni ti bi bê na ndo lege so azo ayeke bâ na e. Tongana lê ti azo ayeke gi na ndo ti e ti bâ wala e yeke sala ye nzoni, ye so alingbi ti mû maboko na e ndali ti so a yeke pusu e ti sala ye mbilimbili (1 aCorinthien 10:31-33). Ye oko, ye so mingi ti azo ayeke tene na ndo ti amba ti ala ayeke lakue mbilimbili pëpe. Na tapande, bâ sioni bango ndo so amokonzi-nzapa ti aJuif nga na ambeni zo ayeke na ni lani na ndo ti Jésus tongana ala to nda ti dekongo, ala tene: “Fâ Lo na keke ti [pasi, NW ]! Fâ Lo na keke ti [pasi, NW ]!” (Luc 23:13, 21-25). A lingbi e ke abango ndo so aluti na ndo ti atënë ti wataka wala na ndo kota bê nga na sioni bibe na ndo ambeni zo. Tongaso, a lingbi e zia bê ti e pëpe na ndo tënë kue so azo ayeke tene na ndo ti e.

Bango ndo ti azo wa ayeke kota ye?

E ye ti tene azo so e na ala e yeke na yâ ti tâ vorongo abâ e na nzoni lê. E ye ti sala tënë ti azo ti sewa ti e so ayeke aChrétien nga na amba ti e awamabe (aRomain 15:2; aColossien 3:18-21). Ndoye, yekiango ndo ti amba ti e Chrétien na atënë so e yeke tene ti “kpengba” tele na popo ti e ayeke kota ye mingi (aRomain 1:11, 12). ‘Na lege ti be-kota-pepe, a lingbi e oko oko kue e bâ aita ti e tongana azo so ayeke nzoni ahon e.’ (aPhilippien 2:2-4). Na ndo ni, e yeke bâ na nene ni mingi bango ndo ti ala so ‘afa lege na e,’ so ti tene a-ancien ti kongregation nga e yeke gi ti nzere na lê ti ala.​—aHébreu 13:17.

A yeke nga mbeni pendere ye tongana “azo ti gigi asala tënë ti témoin” ti e nzoni (1 Timothée 3:7). Biani, a yeke tâ ye ti ngia ti bâ so asewa ti e so ayeke aChrétien pëpe, akamarade ti e ti place ti kua nga na avoizin ti e ayekia e. Nga, e ye si azo so e yeke fa tënë na ala abâ anzoni salango ye ti e tongaso si ala nga alingbi ti yeda mbeni lâ na tënë ti Royaume. Tongana azo ti ndo so e yeke lango dä ahinga e tongana azo so tambela ti ala ayeke na sioni oko pëpe, azo so ayeke mbilimbili, azo so ayeke sala ye na lege ni, ye so ayeke mû gloire na Nzapa (1 Pierre 2:12). Ye oko, e lingbi lâ oko pëpe ti woko yâ ti akpengba-ndia ti Bible tongaso si azo abâ e na nzoni lê. Wala e lingbi nga pëpe ti sala ye na ndendia ti tene e gboto lê ti ala na ndo ti e. A lingbi e hinga so salango ye ti e alingbi ti nzere na azo kue pëpe. Jésus atene: “Tongana i yeke ti sese so, ka sese ni andoye azo ti lo; me teti i yeke ti sese so pëpe, me Mbi hiri i ti zia lege ti sese so, tongaso sese so ake i.” (Jean 15:19). E lingbi ti sala mbeni ye ti tene azo so ake e agbian bango ndo ti ala?

Lege ti gbian bango ndo ti azo so ake e

Jésus atene: “Fade azo kue ake i ngbanga ti iri ti Mbi; me zo so agbu ngangu juska na nda ni, fade A sö lo.” (Matthieu 10:22). Ndali ti so azo ake e, ngoi na ngoi ala lingbi ti tene akota mvene na ndo ti e. Akota zo ti kodoro so aye tënë ti e pëpe alingbi ti tene so e yeke pusu azo ti ke yanga ti azo ti komande wala e yeke azo so aye ti kinda kodoro. Awato so ayeke diko atënë kirikiri na ndo ti e alingbi ti tene so e yeke mbeni secte so ayeke ga na wusuwusu na so a hunda ti kanga lege na ni (Kusala 28:22). Ye oko, na ambeni ngoi e lingbi ti sala mbeni ye ti tene bango ndo ti azo so ake e agbian. E yeke sala ni tongana e mû peko ti wango ti bazengele Pierre, so lo tene: “I leke bê ti i ti kiri tënë lakue na azo kue so ahunda nda ti tënë ti beku so ayeke na yâ i, me i kiri tënë na tâ be-ti-molenge” nga na nengo tele (1 Pierre 3:15). A lingbi e tene nga “nzo tënë so a lingbi fâ ngbanga dä pëpe, si kamene alingbi gbu zo so ake, na lo wara sio tënë ti zia na li ti e pëpe.”​—Tite 2:8.

Na ngoi so e yeke gi lege ti zi atënë ti mvene so azo abi na li ti e, a lingbi bê ti e awoko pëpe wala e zia pëpe si atënë so ayeke tâ tënë pëpe ahon ndo ti e. Jésus ayeke Molenge ti Nzapa, na lo yeke zo so ayeke mbilimbili-kue. Me azo abi lani tënë ti mvene na ndo ti lo. Ala tene so lo zonga Nzapa, lo yeke zo so aye ti kinda César nga lo yeke sala ye so andu ayingo sioni (Matthieu 9:3; Marc 3:22; Jean 19:12). Azo atene nga mvene lani ti buba iri ti Paul (1 aCorinthien 4:13). Jésus na Paul kue azia bê ti ala na ndo ti mara ti akasango ndo so pëpe, ala ngbâ lani ti sala gi kusala ti ala (Matthieu 15:14). Ala hinga so salango ye ti ala alingbi ti nzere na bê ti awato ti ala lâ oko pëpe ndali ti so “sese so kue ayeke na tïtî wato-sioni.” (1 Jean 5:19). Laso, e kue e yeke na gbele oko kpale so. E yeke sala mbito pëpe tongana awato ti e ayeke diko atënë ti mvene na iri ti e.​—Matthieu 5:11.

Azo so bango ndo ti ala ayeke kota ye biani

Azo ayeke tene aye nde nde na ndo ti e. Ambeni zo so bê ti ala aye tënë ti e wala so amä nzoni tënë ti e ayeke gonda e, na mbage ambeni zo so bê ti ala ake e ayeke sala sioni tënë ti e. Tongana a yeke akpengba-ndia ti Bible si ayeke fa lege na e, e yeke duti na ngia nga na siriri atâa azo asala sioni tënë ti e.

Bazengele Paul atene: “Tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni, na ti fa na zo lege ti sala ye mbilimbili, si zo ti Nzapa alingbi kue, na lo wara ye kue alingbi teti nzo kusala kue.” (2 Timothée 3:16, 17). Tongana, na bê ti e kue e zia si Tënë ti Nzapa afa lege na e na yâ ye kue, fade Jéhovah na Jésus ayeke yeda na e ndali ti so bango ndo ti ala si ayeke kota ye biani. Bango ndo so Jéhovah na Jésus ayeke na ni na ndo ti e afa so e yeke ye senge pëpe. Na ndo ni kue, ti tene e ngbâ na fini a yeke kota ye ti nzere na lê ti ala.​—Jean 5:27; Jacques 1:12.

[Encadré na lembeti ]

“Tongana mbi gi gingo ti wara gonda, kamene ayeke sala mbi.”​—RABINDRANATH TAGORE

[Afoto na lembeti 31]

Bango ndo ti amba ti e wamabe ayeke kota ye

[Lingu ti foto na lembeti 30]

Culver Pictures