E bâ gigi tongana nyen?

NGBANGA TI NYEN A YEKE KOTA YE TI KIRI TËNË NA HUNDANGO TËNË SO? A fa na mingi ti azo so akeke, anyama nga na azo abâ gigi gi tongaso. A fa na ala so mbeni molongo ti aye asi gi tongaso, na a sara si mbeni nyama achangé yeke yeke ngbii aga zo. Na tongaso zo ayeke fa atënë ti bê ti lo, lo yeke na ndara nga lo yeke na nzara ti voro Nzapa.

Me gbu li ti mo kete: Tongana e ga na lege ti nyama nga Wasarango ye ayeke dä pëpe, a lingbi ti tene so azo ayeke tongana anyindu. Azo ayeke duti pëpe na mbeni zo so ahinga ye mingi ahon ala, so ala lingbi ti bâ ndo na mbage ti lo. So ti tene, mbeni zo ayeke duti dä pëpe ti mû maboko na azo ti bâ lege ti akpale ti ala. Tongana Wasarango ye ayeke dä pëpe, a yeke hunda na e ti luti na ndo ti ndara ti e wani ti gi ti hon ndo ti akpale tongana bubango pupu nga na bubango sese. Na ndo ni, a yeke hunda na e wani ti gi ti leke akpale so tënë ti poroso ayeke ga na ni, na ti gi ti leke akpale so e oko oko e yeke wara ni.

Ti bâ so a hunda na azo ti luti gi na ndo ti ndara ti ala wani asara si mo wara siriri ti bê? Tongana a yeke tongaso pëpe, ti hinga so mbeni zo so ayeke na kota ndara ahon ti azo ayeke dä ayeke sara si bê ti mo adë. Tënë so ayeke ndu gi bê ti zo pëpe me ayeke nga na lege ni.

Bible atene ti lo nyen?

Bible atene ti lo so a yeke Nzapa la acréé azo. E bâ gigi gi tongaso pëpe na lege ti mbeni nyama. Me, e yeke amolenge ti mbeni Babâ so ayeke na ndoye nga na ndara. Bâ atënë so Bible afa ni polele:

Genèse 1:27. “Nzapa acréé zo na image ti Lo mveni, na image ti Nzapa Lo créé lo; Lo créé ala koli na wali.”

Psaume 139:14. “Mbi mû merci na Mo, teti lege so Mo sara mbi ayeke ye ti dongo bê na ye ti kpene. Kusala ti Mo ayeke ye ti kpene, na âme ti mbi ahinga ye so biani.”

Matthieu 19:4-6. “I diko na Mbeti pëpe? Lo so asara ala giriri kozoni, Lo sara ala koli na wali, na Lo tene, Teti tënë so, fade zo azia babâ na mama ti lo, na lo duti na wali ti lo; fade ala use aga mitele oko. Tongaso ala yeke use mbeni pëpe, me ala yeke mitele oko. Tongaso ye so Nzapa abungbi awe, zia zo akangbi pëpe.”

Kusala 17:24, 25. “Nzapa so asara sese na ye kue so ayeke na yâ ni; teti Lo yeke Seigneur ti yayu na ti sese, Lo duti pëpe na yâ temple so maboko ti zo asara; ye amanke Lo pëpe si a lingbi maboko ti azo asara na Lo, teti Lo mveni ayeke mû fini, na mbö, na ye kue na azo kue.”

Apocalypse 4:11. “Seigneur na Nzapa ti e, Mo lingbi ti wara gloire, na yango-iri, na ngangu, teti Mo sara ye kue giriri, na ala yeke, na A créé ala, teti bê ti Mo aye tongaso.”

Lege so kiringo tënë ti Bible asara biani si zo awara siriri ti bê

Ti hinga so “afami kue . . . na ndo sese awara iri ti ala” na lege ti Nzapa ayeke sara si e changé bango ndo ti e na ndo ti azo (aEphésien 3:15). Ti hinga tongaso ayeke sara nga ngangu na ndo ti lege so e yeke bâ na tere ti e wani nga na akpale so e yeke wara. Bâ ambeni lege so hingango ye so ayeke sara ngangu na ndo ti bango ndo ti e.

Na ngoi so e ye ti mû akpengba desizion, e yeke gi bê ti e ahon ndo ni pëpe na ndo ti awango nde nde so azo ayeke mû. E yeke zia bê ti e kue na wango so ayeke na yâ ti Bible. Ndali ti nyen? Ndali ti so “tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni, na ti fa na zo lege ti sara ye mbilimbili, si zo ti Nzapa alingbi kue, na lo wara ye kue alingbi teti nzo kusala kue.”​—2 Timothée 3:16, 17.

Ti tâ tënë ni, ti sara ye ague oko na awango ti Bible ayeke hunda na e ti sara ngangu nga ti kanga anzara ti bê ti e. Ngoi na ngoi, ambeni lege so Bible ayeke fa na e ti sara aye ayeke hunda peut-être na e ti sara aye ague nde na ti so bê ti e wani aye (Genèse 8:21). Ye oko, tongana e yeda so Babâ ti e ti yayu so acréé e aye e mingi, e yeke bâ so lo hinga tâ nzoni lege so a lingbi e sara na ye (Esaïe 55:9). Mbeti ti lo adë bê ti e, atene: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.” (aProverbe 3:5, 6). Tongana e sara ye alingbi na wango so, a yeke sara si gbâ ti agingo bê so e yeke wara na ngoi so e yeke na yâ ti akpale ahon. A yeke sara nga si e gi bê ti e ahon ndo ni pëpe na ngoi so e ye ti mû adesizion.

Na ngoi so e tingbi na kpale ti sarango kangbi na popo ti azo, e yeke bâ pëpe so e yeke ye oko pëpe, na e yeke pensé pëpe so azo so mara ti ala wala asarango ye ti ala ayeke nde na ti e ayeke nzoni ahon e. Ahon ti duti na mara ti bibe tongaso, e yeke gi ti bâ nengo ti e. Ndali ti nyen? Ndali ti so Babâ ti e, Jéhovah Nzapa “ayekia mbeni zo teti lê ti lo pëpe; me na yâ amara kue, zo so akpe mbeto ti Nzapa, na lo sara ye ti mbilimbili, lo lingbi na lê ti Lo.”​—Kusala 10:34, 35.

Ti hinga so Nzapa asara kangbi na popo ti azo pëpe ayeke mû nga maboko na e ti kpe ti duti na asioni bibe na ndo ti azo. E yeke bâ so mbeni raison oko ayeke dä pëpe ti tene e bâ tere ti e kota ahon azo ti mbeni mara nde ndali ti so Nzapa ‘asara amara kue na lege ti zo oko si ala duti na lê ti sese kue’.​—Kusala 17:26.

Biani, ti hinga so a créé e crééngo nga so Wasarango e ayeke bi bê ti lo na e ayeke sara si e duti na siriri ti bê. Me, tongana e ye ti ngbâ ti duti na siriri ti bê a hunda ti sara ye mingi ahon so.

[Foto na lembeti 4]

Zo abâ gigi na lege ti nyama?