Ga nduru na Nzapa
‘Mbi, Jéhovah Nzapa ti mo, Mbi gbu maboko ti mo ti koti’
MBENI babâ na kete molenge ti lo ti koli aye ti fâ lege, me akutukutu ahon ndo ni. Babâ ni atene na lo, “Gbu tïtî mbi.” Molenge ni ayôro maboko ti lo, na babâ ni agbu ni ngangu. Mbeto ti molenge ni kue akpe. Na yâ ti dunia so akpale ahon ndo ni so, mo ye si mbeni zo agbu tïtî mo na lo mû maboko na mo ti hon ndo ti akpale ni so? Tongana a yeke tongaso, atënë so Ésaïe afa pekoni ge so alingbi ti dë bê ti mo.—Diko Ésaïe 41:10, 13.
Ésaïe atene atënë ni so na azo ti Israël, so na lê ti Nzapa ala yeke “ye ti [lo] mveni.” (Exode 19:5). Me awato angoro ala kue. A lingbi azo ti Israël asara mbeto? Oko pëpe, teti Jéhovah atokua Ésaïe ti dë bê ti ala. Na ngoi so e yeke bâ atënë so lo tene, zia e girisa pëpe so atënë ni so abâ nga awakua ti Nzapa laso.—aRomain 15:4.
Jéhovah atene: “Zia mbeto asara mo pëpe.” (Versê 10). Atënë so ayeke gi asenge tënë ape. Jéhovah afa ndani so a lingbi azo ti lo asara mbeto pëpe, lo tene: “Teti Mbi yeke na mo.” Lo duti gi na yongoro ndo kâ si lo tene tongana ala bezoin ni awe si ni ga? Oko ape! Lo ye si ala hinga atene lo yeke na ala, nduru na tere ti ala ti mû maboko na ala. So tënë ti dengo bê la ape?
Jéhovah akiri atene na azo ti lo, lo tene: “Zia ye ayengi mo pëpe.” (Versê 10). Nyen la alingbi ti yengi zo nyen? Tënë ti yanga ti Hébreu so a kiri pekoni na “yengi” aye nga ti sara tënë ti azo so “lê ti ala amû ndo kue na mbeto ndali ti mbeni ye ti sioni so alingbi ti si na ala.” Ni la Jéhovah afa ndani so a lingbi azo ti lo asara mbeto pëpe, lo tene: “Teti Mbi yeke Nzapa ti mo.” So tâ tënë ti dengo bê! Jéhovah ayeke “Lo Ti Nduzu Ahon Kue” na “Lo Ti Ngangu Ahon Kue.” (Psaume 91:1). So Jéhovah, Lo ti ngangu ahon kue, la ayeke Nzapa ti ala so, ala bezoin ti sara mbeto?
Tongaso, awakua ti Jéhovah alingbi ti ku nyen na mbage ti lo? Lo mû zendo so, lo tene: “Biani, fade Mbi bata mo na tïtî Mbi ti koti ti mbilimbili.” (Versê 10). Lo kiri lo tene: “Mbi, L’Éternel Nzapa ti mo, Mbi gbu maboko ti mo ti koti.” (Versê 13). Tongana mo mä mara ti tënë tongaso, nyen la aga na li ti mo nyen? Mbeni mbeti atene: “Aversê so use kue afa songo so andu bê mingi so ayeke na popo ti mbeni babâ na molenge ti lo. Babâ ni aluti gi yongoro kâ pëpe ti ku na ngoi so molenge ni abezoin lo awe si lo ga lo bata lo, me lo yeke tâ gi na tere ti lo; babâ ni ayeke zia pëpe si molenge ni ahon ayo na lo.” Bâ kete si: Jéhovah ayeke zia lâ oko ape si mbeni ye akangbi popo ti lo na azo ti lo, même na angoi so ayeke ngangu na ala mingi.—aHébreu 13:5, 6.
Atënë ti Ésaïe so alingbi ti dë nga bê ti awakua ti Jéhovah laso mingi. Na “angoi ti akpale so ayeke ngangu na zo ti kanga bê na yâ ni”, a lingbi ti si so ye ahon ndo ti e (2 Timothée 3:1). Me a yeke nzoni e gi ti sigigi dä gi na ngangu ti e wani pëpe. Jéhovah ayôro maboko ti lo ti gbu tïtî e. Ni la, tongana amolenge so asara confiance na babâ ti ala, zia e gbu ngangu maboko ti lo, e hinga e tene lo yeke gue na e na tâ nzoni lege ni nga lo yeke mû maboko na e na ngoi so e yeke na yâ ti kpale.—Psaume 63:8, 9.