Ala sara hange ti tene “li ti ala aga kirikiri hio pëpe”

1, 2. Ngbanga ti nyen atënë ti handango zo ayeke mingi laso? Aye wa azo ayeke sara ti tene atënë ti mvene so amû ndo? (Bâ foto so ayeke na tongo nda ti article ni.)

ATËNË ti handango zo nga na atënë ti mvene amû ndo mingi laso na yâ ti dunia. A lingbi tënë so adö bê ti e pëpe. Bible afa polele so Satan Zabolo ayeke kota zo ti handango zo nga lo la lo komande dunia so (1 Tim. 2:14; 1 Jean 5:19). So ngoi ti tene a futi sioni dunia so aga nduru mingi awe, Satan asara ngonzo mingi ndali ti so lo yeke na “ngoi mingi pëpe.” (Apoc. 12:12). Tongaso, azo so Satan asara ngangu na ndo ti ala ayeke sara ye na handa mingi ahon ti kozo. Ala yeke gi mingi ni ti handa awakua ti Jéhovah.

² Ngoi na ngoi na yâ ti ambeti-sango, na télé wala na ndo ti Internet, a yeke fa atënë so a ba yâ ni nga na atënë ti mvene na ndo ti aTémoin ti Jéhovah nga na ndo ti atënë so ala mä na bê na ni. Azo ayeke sara kua na aye so ti sara si atënë ti mvene amû ndo. Ye so asara si azo ayeke na ngia ape nga ala yeke sara même ngonzo ndali ti so ala yeda na atënë ti mvene ni sân ti tene ala gi ti bâ wala atënë ni ayeke tâ tënë.

3. Nyen la alingbi ti mû maboko na e si a handa e ape?

³ E kiri singila so Bible so ayeke “nzoni . . . ti kiri na aye na nzoni lege”, a mû maboko na e ti tï na yâ ti handa ti Satan pëpe (2 Tim. 3:16). Tënë so bazengele Paul atene na aChrétien ti Thessalonique afa so ambeni na popo ti ala azia si a handa ala na atënë ti mvene. Lo tene na ala “ti zia si li ti ala aga kirikiri hio pëpe”. (2 aThes. 2:1, 2). Aye wa e lingbi ti manda na lege ti nzoni wango ti Paul so? Tongana nyen la e lingbi ti sara ye alingbi na ni?

AWANGO SO ALINGBI NA NGOI NI

4. Tongana nyen la a wa lani aChrétien ti Thessalonique na ndo ti “lâ ti Jéhovah”? Tongana nyen la a yeke wa e laso?

⁴ Na yâ ti kozo mbeti so Paul atokua na aChrétien ti Thessalonique, lo mû wango na ala na ndo ti “lâ ti Jéhovah”. Lo ye lani ti tene aita ti lo agirisa “lâ ti Jéhovah” pëpe nga ala leke tere ti ala ndali ni. Lo tene na ala so ala yeke “amolenge ti lumière” nga lo kiri lo tene: “Zia lê ti e angbâ na zingo ni na e zia li ti e kpô.” (Diko 1 aThessalonicien 5:1-6.) Laso e yeke ku futingo ti Babylone, Ngangu gbata so ayeke bungbi ti vorongo nzapa ti wataka kue. Futingo Babylone so ayeke duti ande tongo nda ti kota lâ ti Jéhovah. Merci so e hinga nzoni mingi tongana nyen la Jéhovah ayeke sara si ye so lo leke na bê ti lo ti sara aga tâ tënë. Na yâ ti congrégation nga e yeke wara lakue awango so alingbi na ngoi ni, so amû maboko na e ti leke tere ti e ndali ti lâ ti Jéhovah. Tongana e dengi mê ti e nzoni na awango so, so a yeke kiri na ndo ni fani mingi, ayeke kiri ti kpengba e ti ngbâ lakue ti sara ‘kusala so ayeke nzoni-kue so e sara ni na hingango ndo ti e.’​—aRom. 12:1.

5, 6. (a) Tënë wa Paul atene na yâ ti use mbeti ti lo na aThessalonicien? (b) Na yâ ti ngoi kete, Jésus ayeke sara nyen? A yeke nzoni e hunda tere ti e na atënë wa?

⁵ Ngoi kete na peko ti so Paul atokua kozo mbeti ti lo na aChrétien ti Thessalonique, lo tokua na ala use mbeti ni. Na yâ ti mbeti so, lo sara tënë ti kota ye ti vundu so ayeke ga na ngoi so Jésus ayeke sara ye alingbi na ngbanga so Nzapa afâ na ndo ti “azo so ahinga Nzapa pëpe nga na azo so asara ye alingbi pëpe na nzoni tënë”. (2 aThes. 1:6-8). Na yâ ti chapitre use ti mbeti ti Paul na aThessalonicien, lo tene so tere ti ambeni na yâ ti congrégation ni “adö” ndali ti lâ ti Jéhovah so ala pensé atene a ga lani nduru mingi awe. (Diko 2 aThessalonicien 2:1, 2.) A-Chrétien so ahinga ye lani kue pëpe na ndo ti aye so Jéhovah ayeke sara ande si ye so lo leke na bê ti lo ti sara aga tâ tënë. Paul ayeda na tënë so na ngoi so lo sara tënë so andu tënë ti prophétie, lo tene: “E hinga gi mbage ti aye nga e tene gi mbage ti aprophétie. Me tongana ye so alingbi kue aga ande, ye so ayeke gi mbage ti aye fade a yeke kaï ni biaku biaku.” (1 aCor. 13:9, 10). Me aChrétien ni angbâ be-ta-zo ndali ti awango so Jéhovah asara kua na ambeni zo ti sû. Azo so asû awango ni ayeke Paul, bazengele Pierre nga na ambeni ita so a soro ala ti gue na yayu so ayeke lani dä na ngoi ni so.

⁶ Ti mû maboko na ala ti leke bango ndo ti ala, na gbe ti yingo ti Nzapa Paul afa na ala so afango ye ti wataka ayeke mû ndo nga “zo-ti-kpengo-ndia-pepe” ayeke bâ gigi kozoni si lâ ti Jéhovah asi.a Na pekoni, tongana ngoi ni alingbi awe, Jésus ayeke “neka” azo kue so a handa ala. Paul atene so a yeke neka azo so ndali ti so “ala fa pëpe so ala yeke na kota nzara ti tâ tënë”. (2 aThes. 2:3, 8-10). A yeke nzoni e hunda tere ti e: ‘Mbi ye tâ tënë mingi? Mbi yeke manda Tour ti Ba Ndo so nga na ambeni mbeti so a sigigi na ni ndali ti awakua ti Jéhovah na yâ ti dunia kue tongaso si mbi lingbi ti hinga afini fango ye so ayeke na yâ ni?’

SORO AKAMARADE TI MO NZONI

7, 8. (a) Akpale wa a lingbi lani akozo Chrétien agi ti hon ndo ni? (b) Ye wa alingbi ti duti mbeni kpale teti atâ Chrétien laso?

⁷ Nde na afango ye ti wataka, aChrétien ayeke wara nga ambeni kpale. Paul atene na Timothée so “ndoye ti nginza ayeke gunda ti asioni ye nde nde kue”. Lo tene nga so “na gingo ti wara mara ti ndoye so, ambeni ahon yongoro na mabe na ala kpo tere ti ala na aye ti vundu mingi.” (1 Tim. 6:10). “Akusala ti mitele” ayeke nga mbeni kpale so zo ayeke wara lakue.​—aGal. 5:19-21.

⁸ Paul amû wango ngangu na azo ti Thessalonique ti sara hange na azo so lo iri ala “abazengele ti wataka”. Ambeni na popo ti ala atene “atënë so ala ba yâ ni kirikiri ti gboto na adisciple na peko ti ala.” (2 aCor. 11:4, 13; Kus. 20:30). Jésus agonda aita ti congrégation ti Éphèse ndali ti so ala yeda pëpe ti tene “asioni zo” aduti na yâ ti congrégation. Aita ni “atara” lani azo so na ala bâ biani so ala yeke abazengele ti wataka nga azo ti mvene (Apoc. 2:2). Na yâ ti use mbeti ti Paul na aThessalonicien, lo mû wango so: “Fadeso, aita, na iri ti Seigneur Jésus Christ e mû yanga na ala, e tene: Ala gboto tere ti ala yongoro na ita kue so atambela kirikiri.” Na pekoni lo sara tënë ti aita so “aye ti sara kua pëpe”. (2 aThes. 3:6, 10). So a tene na ala ti sara songo pëpe na zo so aye ti sara kua ape, a ye ti fa so a lingbi nga ala sara hange mingi si ala sara songo pëpe na mbeni zo so akomanse ti fa aye ti wataka. Ti sara songo na azo tongaso ayeke lani sioni mingi nga a lingbi aita akpe ni. A yeke nga legeoko tongaso laso.​—aProv. 13:20.

9. Ngbanga ti nyen a lingbi e sara hange tongana mbeni zo akomanse ti fa aye so Bible afa ndani pëpe wala ti kasa bungbi ti Jéhovah?

⁹ Kota ye ti vundu aga nduru ti si awe na a ga nduru ti futi sioni dunia so awe. Tongaso, awango so a sû na gbe ti yingo ti Nzapa na ngoi ti akozo Chrétien ayeke kota ye teti e laso. E ye pëpe ti ‘yeda na kota nzobe ti Nzapa na ti hon nde na ye so kota nzobe ni aye.’ Tongana e hon nde na ye so kota nzobe ti Nzapa aye, e lingbi ti wara fini ti lakue lakue pëpe (2 aCor. 6:1). A lingbi e sara hange mingi tongana mbeni zo so ayeke ga na bungbi agi ti hinga pensé ti e na ndo ti aye so Bible asara tënë na ndo ni pëpe wala lo pusu e ti kasa a-ancien nga na ambeni wakua ti Nzapa.​—2 aThes. 3:13-15.

“ALA BATA ANGOBO”

10. Angobo wa la a hunda lani na aChrétien ti Thessalonique ti sara ye alingbi na ni?

¹⁰ Paul awa aita ti lo ti Thessalonique ti “luti ngangu” nga ti ngbâ ti sara ye alingbi na aye so ala manda. (Diko 2 aThessalonicien 2:15.) “Angobo” wa la a fa na ala lani? A yeke pëpe angobo so a fa na yâ ti abungbi ti vorongo nzapa ti wataka, me a yeke aye so Jésus afa nga na atënë so Paul nga na ambeni zo asû na gbe ti yingo ti Nzapa. Paul agonda lani aita ti lo ti Corinthe ndali ti so “na yâ ti aye kue, ala ngbâ ti dabe ti ala na [lo] na ala ngbâ ti gbu ngangu angobo so [lo] fa na ala.” (1 aCor. 11:2). A sû afango ye so na gbe ti yingo ti Nzapa tongaso zo alingbi ti zia bê ti lo dä.

11. Na alege wa atënë ti handa alingbi ti sara ngangu na ndo ti ambeni zo?

¹¹ Na ngoi so Paul asû mbeti na aHébreu, lo sara tënë ti aye use so alingbi ti sara si mabe ti mbeni Chrétien awoko nga lo ngbâ be-ta-zo pëpe na Jéhovah. (Diko aHébreu 2:1; 3:12.) Lo sara tënë ti ‘hongo yongoro’ na Jéhovah nga na ‘guengo yongoro’ na lo. A lingbi ti duti ngangu ti hinga hio so mbeni bateau ayeke hon yongoro na yanga ti ngu. Yeke yeke bateau ni alingbi ti gue yongoro na lê ti ngu. Me mbeni zo alingbi nga ti pusu bateau ti lo na lê ti ngu. Atapande use so afa ye so alingbi ti si na mbeni zo tongana lo zia si a handa lo na lo zia bê ti lo pëpe na tâ tënë tongana ti kozo.

12. Aye wa la alingbi ti buba songo ti e na Jéhovah?

¹² Peut-être ambeni ita ti Thessalonique azia si a handa ala lani. Ti laso ayeke tongana nyen? Aye mingi alingbi ti mû ngoi ti e. Gbu li ti mo na ndo ti ngoi so zo ayeke mû ti sara lisoro na ndo ti Internet, ti diko amessage nga ti kiri tënë na azo so atokua ni, ti sara ambeni ngia wala ti gi ti wara afini sango na ndo ti angia ti awanguru. Aye so kue alingbi ti mû ngoi ti mbeni Chrétien nga ti sara si lo yapu mbeni pëpe ti sara na Jéhovah. Aye ti pekoni ayeke so wa? Lo lingbi ti sambela na bê ti lo kue mbeni pëpe. Lo lingbi nga ti mû ngoi mingi ape ti manda Bible, ti gue na abungbi nga ti fa nzoni tënë. Tongaso, aye wa la e lingbi ti sara ti tene li ti e aga kirikiri hio pëpe?

AYE SO E LINGBI TI SARA TI TENE LI TI E AGA KIRIKIRI PËPE

13. Tongana ti so a fa kozo awe na yâ ti Bible, sarango ye ti azo mingi ayeke tongana nyen? Nyen la ayeke mû maboko na e ti tene mabe ti e awoko ape?

¹³ A lingbi e girisa ape so a ga nduru ti futi dunia ti Satan awe na ti mû ngoi mingi ti duti na tere ti azo so ake ti yeda so e yeke na yâ ti “alango ti nda ni”, a yeke ga na e kpale. Bazengele Pierre atene na ndo ti ngoi ti e, lo tene: “Fade azo ti hengo ndo ayeke ga na atënë ti hengo ndo ti ala, na sarango ye alingbi na anzara ti bê ti ala, ala yeke tene: ‘Ngoi so lo yeke si na lo yeke duti dä, so a mû zendo ni ândö so, ayeke na ndo wa? Teti a londo na ngoi so akotara ti e akui, aye kue angbâ tâ gi tongana ti so a yeke na tongo nda ti sarango dunia.’” (2 Pi. 3:3, 4). Tongana e diko Bible lâ na lâ nga e manda ni lakue, a yeke mû maboko na e ti girisa ape so e yeke na yâ ti “alango ti nda ni”. Bible atene so fade afango ye ti wataka ayeke bâ gigi. Tënë so aga tâ tënë aninga awe na angbâ juska laso. “Zo-ti-kpengo-ndia-pepe” angbâ ti kanga lege lakue na awakua ti Jéhovah. Tongaso, a lingbi e girisa ape so lâ ti Jéhovah aga nduru awe.​—Soph. 1:7.

14. Tongana nyen la tongana e fa tënë mingi ayeke bata e?

¹⁴ Mbeni ye so a lingbi e sara ti tene li ti e aga kirikiri pëpe, a yeke ti fa nzoni tënë lakue. Tongaso, tongana Christ Jésus, Li ti congrégation, ahunda na adisciple ti lo ti sara si azo na popo ti amara kue aga adisciple na ti fa na ala ti bata aye so lo fa, lo yeke mû lani na ala wango so alingbi ti bata ala la (Mat. 28:19, 20). Ti sara ye alingbi na commandement so, a lingbi e yapu na kua ti fango tënë. Mo yeke tene ande so aita ti Thessalonique ayeke na ngia ti fa tënë nga ti fa ye gi ndali ti so a hunda na ala hundango ti sara ni? Paul atene na ala, lo tene: “Ala mingo wâ ti yingo pëpe. Ala bâ tenengo aprophétie tongana buba ye pëpe.” (1 aThes. 5:19, 20). Atënë ti prophétie so e yeke manda nga e yeke fa na azo ayeke nzoni mingi.

15. Ambeni ye wa e lingbi ti sara tënë na ndo ni na ngoi ti vorongo Nzapa na yâ ti sewa?

¹⁵ E kue e ye ti mû maboko na azo ti sewa ti e ti maï akode ti ala ti fango nzoni tënë. Aita mingi abâ so mbeni lege ti sara ni ayeke ti mû mbeni mbage ti ngoi so ala yeke voro na Nzapa na yâ ti sewa ti manda ye na ndo ti akode ti fango na tënë. Peut-être mo bâ so a yeke nzoni mo na azo ti sewa ti mo asara lisoro na ndo ti lege so ala lingbi ti leke na tere ti ala ti sara avizite. Tënë wa la ala yeke sara tënë na ndo ni na ngoi ti vizite ti peko? Atënë wa la ayeke sara ande si azo ni akiri aduti na nzara mingi ti ngbâ ti manda ye? Ngoi wa la ayeke nzoni mingi ti kiri ti sara vizite na ala? Ambeni ita nga amû mbeni mbage ti ngoi so ala yeke voro na Nzapa na yâ ti sewa ti leke na abungbi tongaso si ala hinga aye so ayeke fa na ngoi ti abungbi. Mo na azo ti sewa ti mo ayeke sara tongaso? Tongana mo kiri tënë na ngoi ti abungbi, a yeke sara si mabe ti mo akpengba na ye so ayeke mû maboko na mo ti tene li ti mo aga kirikiri pëpe (Ps. 35:18). Ti voro Nzapa na yâ ti sewa ayeke bata e si e fa pëpe apensé ti e wani na ndo ti atënë so Bible afa ni pëpe nga si e duti na kite pëpe.

16. Nyen la apusu aChrétien so a soro ala ti gue na yayu ti sara hange ti tene li ti ala aga kirikiri pëpe?

¹⁶ Jéhovah airi tënë nzoni na ndo ti awakua ti lo na yâ ti angu mingi na lege so lo fa na ala nda ti aprophétie ti Bible. Tongana e gbu li ti e na ndo ni, e lingbi ti duti na kite ape so e yeke wara aye ti nzoni so ayeke ga. A-Chrétien so a soro ala ti gue na yayu ayeke ku ngoi so ala yeke duti ande na Christ na yayu. Ye so apusu ala ti sara hange ti tene li ti ala aga kirikiri pëpe. Atënë so Paul atene na aita ti Thessalonique abâ aChrétien so a soro ala ti gue na yayu. Lo tene: “Aita so Jéhovah andoye ala, e bâ so a yeke ti e ti kiri singila na Nzapa lakue ndali ti ala, ngbanga ti so, . . . Nzapa asoro ala . . . na lege so lo sara si ala ga nzoni-kue na lege ti yingo ti lo; nga lo soro ala na lege ti mabe ti ala na tâ tënë.”​—2 aThes. 2:13.

17. Wango wa ayeke na yâ ti atënë so ayeke na 2 aThessalonicien 3:1-5?

¹⁷ A lingbi nga azo so ayeke ku ti wara fini ti lakue lakue na sese, a sara hange ti tene li ti ala aga kirikiri hio pëpe. Tongana mo yeke na beku ti wara fini ti lakue lakue na sese, a lingbi mo sara ye lakue alingbi na wango so Paul amû na aChrétien so a soro ala ti gue na yayu so ayeke na Thessalonique. (Diko 2 aThessalonicien 3:1-5.) A yeke nzoni e oko oko kue e bâ nzoni wango ti Paul so na nene ni. Ambeti so Paul atokua na aThessalonicien awa e ti sara hange ti fa apensé ti e na ndo ti atënë so Bible afa ni pëpe wala ti yeda na abango ndo so e hinga ndani nzoni ape. E bâ awango so na nene ni mingi teti so e yeke na yâ ti alango ti nda ni so a ga nduru ti futi sioni dunia so awe.