Nzapa ayeke bi bê ti lo nga na mo la?

So David atene so Nzapa abi bê ti lo na lo, a yeke tâ na lege ni? Nzapa ayeke bi bê ti lo tâ na mo la? Azo mingi abâ so a yeke ngangu na ala ti mä na bê so Nzapa ti ngangu ahon kue ayeke bi bê ti lo na ala. Ngbanga ti nyen?

Mbeni raison ni ayeke so Nzapa ayeke tâ kota mingi ahon e azo. Ni la, kota ti lo ni asara si na lê ti lo azo ti akodoro kue “ayeke tongana goutte oko ti ngu na yâ seau, [nga] tongana kete pupu-sese na ndo kilo.” (Ésaïe 40:15). Mbeni wasungo mbeti-sango afa tënë ti bê ti lo, lo tene: “Zo so apensé so mbeni Nzapa ayeke dä so ayeke bi bê na aye so lo yeke sara, andâ zo ni so ayeke pensé gi na lo wani la.”

Me, ambeni zo apensé so ndali ti asarango ye ti ala, ala kpa pëpe ti tene Nzapa abi bê na ndo ti ala. Na tapande, Pakara Jim atene: “Mbi sambela ka Nzapa ti tene lo mû na mbi siriri nga na kangango bê, me lakue ngonzo ti mbi ni ayeke kiri gi kiringo. Na nda ni, mbi tene ti mbi so sioni ti mbi ayeke mingi, nga Nzapa alingbi ti mû maboko na mbi ape.”

Nzapa ayo na e azo mingi? si lo yeke bi bê ti lo na e ape? Tënë ti bê ti lo na ndo ti e asenge zo ayeke biani so wa? Mbeni zo alingbi pëpe ti sara tënë na place ti Nzapa ti kiri tënë na ahunda so, gi tongana Nzapa la afa ni na lo si. Me Bible, so ayeke tënë ti yanga ti Nzapa so lo mû na azo, atene so Nzapa ayo na e ape na so lo yeke bi bê ti lo na ndo ti e oko oko kue. Bible atene: “Ti tâ tënë ni, lo yeke yongoro [pëpe] na e oko oko kue.” (Kusala 17:27). Na yâ ti a-article osio so ayeke ga, e yeke bâ tënë so Nzapa atene so afa so lo yeke bi bê ti lo na zo oko oko na popo ti e. E yeke bâ nga tongana nyen so lo fa so lo yeke bi bê ti lo na azo tongana mo.