Eskê gingo nda ti aye na lege ti atongoro nga na bango mbadi apeut ti fa aye so ayeke si kekereke?

GINGO NDA TI AYE NA LEGE TI ATONGORO

Gingo nda ti aye na lege ti atongoro ayeke mbeni ye so andu aye ti ndima, so aluti na ndö ti tënë so a tene atongoro, nze nga na aplanète apeut ti fa aye so ayeke si na yâ ti gigi ti azo na sese. Azo ti gingo nda ti aye na lege ti atongoro atene so lutingo ti aye ni so na ngoi so a dü mbeni zo ayeke fa mara ti zo wa la zo ni so ayeke duti ande ni nga na gigi ti lo ti kekereke. Gingo nda ti aye na lege ti atongoro akomanse ândö na Babylone, me atâa so kue angbâ ti mû ndo laso. Gbâ ti azo amä na bê na ye so azo ti gingo nda ti aye na lege ti atongoro ayeke fa na ndö ti kekereke. Me eskê e doit ti sara confiance na tënë ti ala? Ên-ën. Zia e bâ ndani so e tene tongaso.

• Aplanète nga na atongoro ayeke pëpe na mbeni ngangu so alingbi ti sara ye na ndö ti gigi ti azo tongana ti so azo ni so atene.

• Ye so ala fa ayeke si na yâ ti gigi ti azo oko oko kue ape.

• Acalcul so ala yeke sara laso aluti na ndö ti ye so azo amä na bê na ni ândö so a tene so aplanète ayeke tourné na terê ti sese. Me ti vrai ni, aplanète ayeke tourné na terê ti lâ.

• Tongana a mû zo oko ti tene azo ti gingo nda ti aye na lege ti atongoro nde nde afa aye so ayeke si na kekereke ti lo, aye so ala yeke fa ayeke duti oko ape.

• Azo ti gingo nda ti aye na lege ti atongoro akangbi yâ ti azo na yâ ti agroupe 12, wala asigne ti zodiaque 12, alingbi na lango ti dungo ala. Ala tingbi asigne ni oko oko na mbeni groupe ti atongoro, nga ala tingbi asigne ni na ambeni lango. Me teti so tongana angu ahon, place so sese ayeke dä na lê ti nduzu ayeke changé, alango so ala tingbi ni na asigne ti zodiaque ni ague encore oko ape na agroupe ti atongoro ni.

A tene so asigne ti zodiaque ayeke fa mara ti asarango ye wa la mbeni zo ayeke na ni. Me ti tâ tënë ni, a peut ti dü ambeni zo na même lango me ala yeke na même sarango ye ape. Nga, lango ti dungo mbeni zo ayeke fa ye oko pëpe na ndö ti sarango ye ti zo ni ande. Ni la, ahon ti tene azo ti gingo nda ti aye na lege ti atongoro ayeda so azo ayeke na asarango ye nde nde atâa a dü ala lawa, ala yeke fa asarango ye ti azo ti lingbi na ambeni tënë so gere ni aluti nga ape. Mara ti sarango ye tongaso ayeke mbeni fason ti fango ngbanga na ndö ti mbeni zo kozoni si mo hinga lo la ape?

BANGO MBADI

Ngbene ye giriri la, azo ayeke gue abâ azo ti bango mbadi.Ambeni zo ti bango mbadi ni ayeke gi ti hinga nda ti aye na lege ti aye tongana akamba ti yâ ti anyama nga na ti azo, wala na bango fason so mbeni kondo ayeke de na lê ti kobe. Ti ambeni, ala yeke sara kua na kugbe ti thé wala na saka ti café. Laso, ala yeke sara kua na aye tongana bingo zeke, dikongo acarte, horoscope nga na ambeni ye nde ti tene ala “diko” ye so ayeke si na gigi ti kekereke ti mbeni zo. Eskê zo apeut ti sara confiance na bango mbadi ti hinga ye so ayeke si kekereke? Ên-ën. Zia e bâ ndani so e tene tongaso.

Kode so azo ti bango mbadi oko oko ayeke sara na kua ayeke nde nde, na mingi ni aye so ala fa amä terê oko ape. Me même si ala sara kua gï na a-oko kode, aye so ala fa ayeke nde na ti mba. Na tapande, tongana mbeni zo ague ahunda oko tënë na azo ti bango mbadi use so ayeke sara kua na même kode, na tapande acarte, ti tâ tënë ni akiringo tënë ti ala na lo adoit fade ti gue oko. Me mingi ni ye ni ayeke tongaso ape.

Ambeni zo ayeke na kite na ndö ti bibe nga na akode ti azo ti bango mbadi. Azo ni atene so acarte wala aye ti kua ti ala ni ayeke gï asenge senge ye nga so ala yeke bâ gï asarango ye ti zo, me a yeke pëpe aye ti kua ti ala la ayeke aidé ala. Na tapande, ala yeke hunda ambeni tënë, na ala yeke dengi mê nzoni ti mä atënë so zo ni ayeke tene nga ala yeke bâ sarango ye ti zo ni, ti mû lege na ala ti hinga ye na ndö ti zo ni. Na pekoni, zo ti bango mbadi ni ayeke fa na zo ni ambeni sango na ndö ti kpale ti lo ni, andâ ti tâ tënë ni zo ni wani la afa na lo ni sân ti tene lo zo ni lo hinga. Ambeni awara gbâ ti nginza na ndö ti azo, na peko ti so ala gue na azo ni ti sara confiance na ala.

NYEN LA BIBLE AFA NA E NA NDÖ NI?

Azo ti gingo nda ti aye na lege ti atongoro nga na azo ti bango mbadi aluti na ndö ti tënë so a tene kekereke ti mbeni zo ayeke ye so a diko ni kozo awe. Me eskê a yeke vrai? Bible afa na e so e yeke na liberté ti soro ye so e ye ti mä na bê na ni wala ti sara ye so e ye nga so gigi ti e ti kekereke adépend na aye so e yeke soro.​—Josué 24:15.

Mbeni raison nga nde ayeke dä so asara si awakua ti Nzapa ake tënë ti gingo nda ti aye na lege ti atongoro nga na bango mbadi. Raison ni ayeke so Nzapa ake aye ni so kue. Bible atene: “A lingbi a wara na popo ti ala pëpe . . . zo ti bango mbadi, wala zo ti sarango magie, wala zo ti fango ye so ayeke si kekereke, wala zo ti yorö, wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ, wala zo so ague abâ zo ti fango aye so ayeke si ande na zo, wala zo so ayeke hunda tënë na akuâ. Zo so asara aye so, lo yeke sioni mingi na lê ti Jéhovah.”a—Deutéronome 18:10-12.