Mo hinga ala na iri ti ala?
1 Jéhovah ahinga atongoro kue ti yayu na iri ti ala (Ps. 147:4). Jésus Christ ahinga adisciple ti lo kue na iri ti ala (Jean 10:3, 14). Mo hinga aita ti mo kue ti kongregation na iri ti ala, wala mo hinga ala gi na lê ti ala? Tongana e yeke mû li ni na mbeni bungbi ti kongregation, e yeke iri aita ti e na iri ti ala wala e yeke tene gi “ita-koli” wala “ita-wali”? Tongana e ye ti fa na aita mbeni fini zo so aga na bungbi, e yeke hon na ndo ti ambeni ita ndali ti so e hinga iri ti ala pëpe? Azo oke na yä ti kongregation si e yeke bara ala gi na tenengo “Bara mo, ita”?
2 Ge, a fa ambeni kode so alingbi ti mû maboko na mo ti girisa pëpe iri ti aita ti mo ti koli na ti wali nga ti ala so ade ti mû tere ti ala na Jéhovah pëpe. Yenga oko oko, sara ngangu ti ga na Da ti Royaume ngoi mingi kozoni si bungbi ato nda ni na ti ngbâ kete na peko ti bungbi ti sara lisoro na ambeni zo. Na pekoni, gi ti hinga iri ti zo oko wala use so mo hinga ala gi na lê ti ala me pëpe na iri ti ala; tongana lege ayeke dä, sû ni na lê ti nduru mbeti. Na bango ande iri ni alingbi ti mû lege na mo ti bata ni na li. Fa tere ti mo na lo, wala peut-être hunda na mbeni ita ti fa na mo iri ti lo si mo dabe ti mo na ni, na pekoni sara lisoro na lo. Bara lo na iri ti lo na di iri ni na ngoi so ala yeke sara lisoro. Bâ ye wa atingbi iri ni na zo ni, na gi ti hinga ye na ndo ti lo na ngoi ti lisoro ti ala; na tapande, lo lango na ndo wa, lo sara bungbi ti mandango buku na ndo wa, wala ambeni ye tongaso. Mä aye so asi na lo na fango tënë na fa nga ti mo na lo.
3 Zia e kue e sara ngangu ti hinga iri ti afini zo so aga na bungbi na ti gi ti mû maboko na ala. Ti zo so aga fini fini, nzoni kode ti hinga iri ti lo a yeke ti ga nduru na lo na ti tene: “Iri ti mbi ayeke ———. Ka ti mo ayeke nyen?” Na peko ti so mo hinga iri ti lo awe, mo lingbi ti ngbâ ti sara pendere lisoro na lo si lo bâ so a yamba lo nzoni na gango ti lo na Da ti Royaume.
4 Jéhovah Nzapa na Jésus Christ ayeke girisa lâ oko pëpe iri ti azo, gi tongana ala wani aye tongaso si. Atâa so e lingbi na ala pëpe, e lingbi ti hinga iri ti azo kue ti yâ ti kongregation ti e. Sarango tongaso ayeke sara ande ye mingi ti maï bibe ti dutingo na sewa na yâ ti kongregation.