Fango nzo tënë na ngoi ti amatanga

¹ Atâa so mingi ti amatanga so andu Noël na Fini Ngu alondo na apaïen, azo ngbundangbu oko na ndo ni so atene ala yeke aChrétien ayeke sara amatanga so ngu na ngu. Azo mingi amä na bê ti ala kue so Nzapa ayeda na amatanga so. Tongana nyen e lingbi ti ndu bê ti mara ti azo tongaso na nzo tënë na ngoi ti amatanga so?

² Bi bê na azo na ne ala: A-ancien ayeke leke mbeni kapa so ayeke nde ndali ti fango tënë na ngoi ti amatanga, teti mingi ti azo na popo ti e ayeke wu tere. A yeke nzoni ti gbian ngbonga ti tongo nda ti fango tënë da na da ndali ti azo ti yâ ti territoire ni so peut-être ayeke lango hio pëpe tongana ti kozo.

³ Tongana e yeke gue ti fa tënë, e yeke tingbi ande na azo so ayeke bâ lege ti agene ti ala wala so ayeke tö kobe. Na hingango so ayeke mbeni ngoi so ayeke nde teti ala, e lingbi ti ne ala na sarango lisoro nduru na e fa gi tënë so e ga na ni. E so e yeke aChrétien, tongana e sara ye na nengo azo, a lingbi ti zi lege na e ti fa tënë na ala mbeni lâ.

⁴ E yeke mû mbage pëpe na amatanga ti anzapa ti sese so, nga e yeke mû mbage na abara ni pëpe. Tongaso, a hunda ti sara ye na ndara na ngoi ti abarango ndo tongaso. A yeke kota ye pëpe ti sara tënë na ndo ti bara ti azo ni, me mingi ni a yeke nzoni ti tene gi merci. Tongana azo ahunda e na ndo ti tënë ti mabe ti e, e lingbi ti fa na ala so e ne Jésus teti so a hunda tongaso na azo so ane Nzapa (Jean 5:23). Ye oko, lege so azo ayeke sara na amatanga ane oko pëpe Christ wala Nzapa. Tongana azo aye ti hinga ye na ndo ni na ngoi ni so wala mbeni lâ, e lingbi ti sara lisoro na ala na lege ti buku Commnent raisonner na lembeti 161-164 nga 166.

⁵ Tongo nda ti lisoro: Teti so azo abâ atene matanga ti Noël ayeke matanga ti Nzapa, e lingbi ti wara azo mingi so aye ti sara lisoro na ndo ti tënë ti Nzapa na ngoi ni so ahon tanga ti angoi kue ti yâ ti ngu ni. E lingbi ti bata ye so na li ti e na ngoi so e yeke to nda ti lisoro na azo. Na tapande, e lingbi ti tene: “Azo kutu mingi na ndo ti sese ayeke sara matanga ti Noël na ti Fini Ngu. Mo bâ so amatanga so apusu zo ti ga nduru na Nzapa?” Wala zo ni atene amatanga ni ayeke nzoni wala sioni, na pekoni so e mä lo nzoni awe, e lingbi ti tene: “Azo mingi aye fade ti duti na nzoni songo na Nzapa, peut-être ala bâ so Nzapa ayeke yongoro kete na ala. Ye ti nzoni ni ayeke so Nzapa mveni atisa e ti gi lo.” Diko Esaïe 55:6, 7; Kusala 17:26, 27, wala mbeni versê so mo bâ alingbi. Na pekoni, fa mbeti so a yeke fa na yâ ti nze ni (Koli so ahon tanga ti azo kue; Ga ndulu na Jéhovah), tongana ayeke dä pëpe, sara kusala na buku Bible afa.

⁶ Na mbeni kode nde, e lingbi ti tene: “Na ngoi ti Noël so, e yeke mä ka azo atene so ala ye mbeni lâ ti tene siriri aduti na ndo ti sese nga ti tene a sara nzoni bê na azo. Mo bâ so fade Nzapa ayeke ga ande na siriri na ndo ti sese na ngoi ti e so?” Na pekoni, e lingbi ti fa na lo so Jésus Christ ayeke lo so prophétie asara tënë ti lo tongana “Mokonzi Ti Siriri.” (Es. 9:5, 6). Tongana zo so ayeke komande na yâ ti ngorogbia ti Nzapa, na yâ ti ngoi kete, Christ ayeke ga ti zia siriri na ndo ti sese teti lakue lakue.​—Dan. 2:44; Apoc. 21:3-5.

⁷ Atâa so azo mingi adengi mê pëpe na tokua ti Royaume na ala bi bê ti ala mingi gi na ndo ti amatanga ti wataka ti anzapa ti ala, Jéhovah ayeke iri biani tënë nzoni na ndo ti ngangu so e yeke sara ti wara azo so agi tâ tënë, teti lo mveni “agi azo tongaso ti sambela Lo” na fade lo ga na ala na bungbi ti lo.​—Jean 4:23, 24.