E fa so e bâ da ti Nzapa na nene ni
1 Na ngoi so a yeke sû Bible Jéhovah ahunda lani na azo ti lo ti bungbi lakue lakue na yâ da ti lo (Lév. 23:2). Abungbi ni so amû lani maboko na azo ti Israël ti tene ala girisa pëpe Tënë ti Nzapa, a mû na ala lege ti gbu li, ti duti ndo oko nga ti gi nda ti Ndia ti Jéhovah. A sala si atënë ti Nzapa asi yâ ti li ti ala, na ye so aga na ala ye ti nzoni na lege ti yingo. Abungbi ni ayeke lani biani ambeni ngoi ti ngia. A mû lege na ala ti duti beoko nga ti maï vorongo so sioni oko ayeke dä pëpe. Laso nga a yeke kota ye mingi ti bungbi na yâ da ti Nzapa.
2 Tongana nyen e fa so e bâ abungbi na nene ni? Na ambeni kongregation azo ayeke ga mingi pëpe na abungbi. Tâ tënë, mbeni ye alingbi ti si so e wara lege pëpe ti ga na bungbi, me e yeke zia lege na akete kpale ti kanga lege na e ti ga lakue na bungbi? Ngoi na ngoi, ambeni zo aye ti ngbâ na yanga-da ndali ti so li ti ala aso gi kete wala ndali ti so ala woko na peko ti gbâ ti kua so ala sala na lango ni so. Ambeni abâ so a lingbi ala ngbâ na yanga-da ti yamba asewa ti ala ti mitele so aye ti ga ti bâ ala. Ambeni même amanke abungbi ndali ti mbeni limon so ala ye ni mingi wala ndali ti mbeni ngia ti wanguru. Biani ye so ague nde mingi na tënë ti bê so amolenge ti Koré afa na gigi: “Âme ti mbi ayeke na nzara, biani, a yeke na nzara ahon ndo ni teti sedu ti L’Eternel.”—Ps. 84:3.
3 Atâa so e yeke wara kobe ti yingo mingi na abungbi ti e, a yeke ngangu lakue na ambeni zo so aga ti dengi mê ti mä tënë. Ala yeke bâ li ti ala, ala yeke bi bê ti ala kue na agingo bê ti lango ni so wala ambeni même ayeke lango. Mingi abâ so a yeke nzoni ti mû note tongaso si ala lango pëpe na ala zia bê ti ala kue na bungbi ni. Na ndo ni, ye so amû maboko na ala ti bata na li ye kue so a yeke tene na ngoi ti bungbi ni. Nga tongana e leke tele nzoni, e yeke wara gbâ ti aye ti nzoni na abungbi, na e yeke dengi mê “nzoni ahon si e girisa tënë ni pëpe.”—aHéb. 2:1.
4 Legeoko na ti akota zo, a lingbi amolenge agbu nda ti fango ye so a mû na abungbi. Tongana ababâ na mama amû na ala aye ti ngia, wala abuku so dessin ayeke na yâ ni ti sala si ala duti kpô, amolenge alingbi ti manda ye mingi pëpe na ngoi ti abungbi. So ayeke fango lege pëpe na amolenge ti zia ala ti sala ngia, ti sala tënë, ti dekongo wala ti sala ambeni ye so abuba nzoni duti ti azo so aga na bungbi ni. Amolenge ayeke sigigi ande lakue pëpe ti sala inon wala ti nyon ngu tongana ala hinga so fade babâ wala mama ti ala si ayeke gue ti zia ala.
5 Nene ti gango na l’heure: Ngoi na ngoi, ambeni ye so e ye pëpe alingbi ti si na akanga lege na e ti ga na abungbi na l’heure ni. Me ti ga lakue na peko ti bia na sambela afa so e bâ pëpe nene ti abungbi ti e so ayeke nzoni-kue na nga e ne amba ti e pëpe. Mingi ni, gango lakue na l’heure pëpe afa so e leke tele ti e nzoni pëpe. Zo so ayeke ga lakue na l’heure, lo fa so lo yekia abungbi ti e na lo bâ ni na nene ni.
6 Teti so lâ ti Jéhovah aga ndulu, a lingbi biani e bungbi lakue (aHéb. 10:24, 25). Zia e fa so e bâ abungbi na nene ni na gango dä lakue, na lekengo ni kozoni, na gango na l’heure, na dengingo mê nzoni ti mä tënë nga na salango ye alingbi na aye so e manda.