E Mu Tele ti E na Bê Kue Teti Anzo Kusala Kue
1 Ba ye so e lingbi ti diko na ndo aTémoin ti Jéhovah : “A yeke ngangu ti wara ambeni zo ti bungbi ti vorongo so ayeke sala kusala na wâ tongana aTémoin ti Jéhovah.” Ngbanga ti nyen aTémoin ti Jéhovah ayeke sala kusala na wâ nga na bê kue?
2 Mbeni nda ti tene ni ayeke so bibe ti sala ye fade fade afa lege na ala. Jésus ahinga la ni so ngoi angbâ na lo mingi pepe so na yâ ni lo lingbi ti hunzi kusala ti lo na ndo sese. (Jean 9:4) Laso, na ngoi so molenge ti Nzapa, so awara gonda, ayeke komande na popo ti awato ti lo, azo ti Jéhovah ahinga so a lingbi ala sala kusala ti ala na yâ mbeni ngoi so a diko. Ni la, ala mu tele ti ala na bê kue teti kusala ti nzoni-kue. (Ps. 110:1-3) Teti so a yeke na bezoin ti wara awakua mingi ahon ti ko le-kobe, ala lingbi pepe ti kiri na peko na yâ akusala ti ala. (Mat. 9:37, 38) Tongaso, ala sala ngangu ti mu peko ti Jésus so azia tapande ti salango ye na bê kue nga na wâ na yâ kusala ti lo.—Jean 5:17.
3 Mbeni nda ti tene nde so aTémoin ti Jéhovah ayeke sala kusala na âme ti ala kue teti Jéhovah, ayeke so bungbi ti ala so amu ndo sese kue ayeke nde na ambeni bungbi ti vorongo kue. A yeke polele so alege ti vorongo ti sese so ayeke hunda gi kete ngoi nga na kete ngangu na azo ti ala. Atene ti mabe ti azo ayeke sala ngangu kete wala oko pepe na ndo fini ti ala ti lâ oko oko, asongo ti ala na ambeni zo, wala aye so ala zia na gbele ala ti wara na yâ fini. Teti so ngangu ti tâ mabe apusu ala pepe, ala yeke hunda na ngangu na aberger ti ala ti ‘sala tene ti gonda ala,’ ti dë bê ti ala so salango kusala ti ala ti fä alingbi biani. (Es. 30:10) Ala gbu na ngangu bungbi ti amokonzi ti lege ti vorongo ti ala ti “fa ye so anzere na mê ti ala,” na yorongo tongaso na bibê ti ala, yingo ti salango nzala ti tene pepe nga na goigoi na lege ti yingo.—2 Tim. 4:3, NW.
4 So tâ kangbi si ayeke na popo ti ala na aTémoin ti Jéhovah! Ye kue so andu vorongo ti e ahunda salango ngangu na kua. Lâ oko oko, nga na yâ ye kue so e sala, e yeke sala lakue ye so e mä na bê dä. Atä so tâ tene ayeke ga na e ngia mingi, a hunda na e ti “tiri mingi” ti bata ye so lo hunda. (Ba 1 aThessalonicien. 2:2.) Gi ti yö akungba ti lâ oko oko alingbi awe ti sala si mingi ti azo ayeke na akusala mingi. Ye oko, e zia pepe si agingo bê so akanga lege na e ti zia aye ti Royaume na kozo ndo.—Mat. 6:33.
5 Aye so a mu na e ti sala na yâ kusala ti Jéhovah ayeke ga na nzoye na a lingbi e sala ni fade fade si apusu e ti “vo” ngoi na ndo ambeni ye so e zia na ngbele e ti wara, nga ti sala kusala na ni nzoni na lege ti yingo. (aÉph. 5:16, NW) Teti so e hinga dutingo ti e ndulu na Nzapa nga bibe ti sala kusala na bê kue anzere na Jéhovah, e yeke na anda ti tene ti kota ahon ti ngbâ ti sala kusala ti e na wâ. Na adeba nzoni so e yeke wara fadeso nga na abeku ti fini so ayeke ga ande, ye so e leke na bê ti e ayeke ti ngbâ ti ‘sala kusala ngangu na ti tiri’ ndali ti aye ti Royaume.—1 Tim. 4:10.
6 Dutingo ndulu na Nzapa nga na yingo ti gbanzi ye na tele: Laso, azo mingi ayeke zia aye so atia ala na lege ti mitele nga na anzala ti ala kozo na aye kue. Ala ba so a yeke biani na lege ni ti bata lê na ndo aye so ala yeke te, ala yeke nyon wala aye so ala yeke yü. (Mat. 6:31) Teti so ala wara ngia pepe na yâ aye so alingbi, ye so ala yeke gi ayeke ti wara nzoni dutingo mingi ahon ti fadeso nga ti wara ‘ye mingi na yâ gogoro, alingbi na angu mingi; ala duti nzoni, ala te, ala nyon, na ala sala ngia.’ (Luc 12:19) Mingi ni ala so ayeke gue na église aba ngangu so vorongo ti ala ahunda na ala ti sala tongana kangango lege na liberté ti ala. Ala ba bibe ti zia tombango peko ti aye ti mitele wala même ti sala ni mingi pepe, wala ti zia akusala so alingbi ti ga na ngia tongana mbeni ye ti sioni mingi. Na bingo bê na ndo ala mveni, ala ba yingo ti gbanzi ye na tele tongana mbeni ye so zo alingbi pepe ti sala ni, wala tâ ye pepe.
7 Bango ndo ti e ayeke nde. Tene ti Nzapa aya abibe ti e na nduzu si e duti na abibe ti Nzapa, me pepe ti azo. (Es. 55:8, 9) E yeke na aye so e zia na yâ fini ti e ti sala so ahon aye ti mitele. Fango na gigi mbilimbili ti kota yanga-ti-komande ti Jéhovah nga ti sala si hiri ti lo aga nzoni kue ayeke atene ti kota ahon kue na yâ ndagigi. Teti so ala yeke kota mingi, na lê ti lo amara kue “ayeke tongana ye pepe na gbele Lo.” (Es. 40:17) Ti duti na fini nde na ye so bê ti Nzapa aye ayeke duti ande tongana ye ti buba.—1 aCor. 3:19.
8 Atä so a hunda ti wara ambeni ye ti mitele nga a lingbi ti mu maboko na yâ akusala ti e ti Royaume, e hinga so aye so ayeke biani pepe “aye so ayeke kota ahon.” (aPhil. 1:10) E yeda na kpengba-ndia so asigigi na 1 Timothée 6:8 na ziango akatikati na yâ tombango peko ti aye ti mitele, nga na ti ndara, na salango ngangu ti bata bê ti e na ndo ‘aye so lê aba pepe so ayeke lakue lakue.’—2 aCor. 4:18.
9 Tongana e yeke na bibe ti Nzapa mingi ahon, fade e yeke gi bê mingi pepe na ndo aye ti mitele. Tongana e ba mbilimbili ye so Jéhovah asala na e awe, nga akota deba nzoni so lo zê ti tuku na ndo ti e kekereke, fade e yeke duti ndulu ti sala ye kue so lo hunda na e. (Marc 10:29, 30) Fini ti e mveni ayeke na tïtî lo. Tongana be-nzoni na ndoye ti lo ayeke dä pepe, ka e yeke wara ngia pepe na yâ fini ti laso nga na ti kekereke. E ba so a lingbi e mu tele ti e na lo teti so ye kue so e sala na yâ kusala ti lo ‘ayeke gi ye so a yeke ngbanga ti e ti sala.’ (Luc 17:10) Ye kue so a hunda na e ti sala na yâ kusala ti Jéhovah, e yeke na ngia ti sala ni na hingango so “fade [e] ko ye mingi nga.”—2 aCor. 9:6, 7.
10 A yeke na bezoin laso ti awakua so asala na bê kue: Na tongo nda ti lo la ni, kongregation ti aChrétien awara mbeni ngoi ti kota kusala. A lingbi a fa tene ti témoin kue kozo na tingo ti Jérusalem na ngu 70 N.E. A yeke la ni mbeni ngoi so na yâ ni adisciple ti Jésus “amu ngoi mingi ti fa tene.” (Kus. 18:5) Teti so kusala ni ague na li ni mingi, a yeke nzoni ti fa lege na awafango tene nga na aberger so alingbi kue nga a lingbi a leke maboko so ala mu. A yeke nzoni ti wara akoli so ayeke na kode, so ahinga ti sala tene na azo ti komande, na azo so alingbi ti ba ndo na ndo bungbingo aye ti mitele so a hunda nga ti kangbi ni. (Kus. 6:1-6; aEph. 4:11) Azo mingi ahinga ambeni, so ala yeke mingi pepe, me a yeke tongaso pepe teti mingi ti ala. Ye oko, ala kue ‘agi lege ngangu,’ na salango kusala maboko na maboko na bê ti ala kue ti tene ala sala kusala ni kue.—Luc 13:24.
11 Atä so a yeke la ni na bezoin mingi pepe ti sala ngangu kusala na ndo sese kue na yâ asiècle mingi so aga na pekoni, a kiri a to nda ti mbeni kota kusala ti Royaume na ngoi so Jésus ato nda ti komande na ngu 1914. Na tongo nda ni, azo mingi pepe ahinga so bezoin ti awakua so amu mbage ti aye ti Royaume ayeke ga kota, so a hunda mungo maboko ti azo kutu mingi so asala kusala na bê ti ala kue na ndo sese kue.
12 Laso, bungbi ti Jéhovah amu mbage ti lo mingi na yâ ambeni kota pialo nde nde so amu lege ti sala kusala mingi na amosoro ti e. Kusala ti Royaume ague na li ni mingi na ndo sese. Teti so ngoi ti e ahunda ti sala ye fade fade, e mu ngangu ti e nga aye kue so e yeke na ni ti sala kusala so a mu na e. E lingbi ti ku ambeni kusala mingi ahon teti nda ti aye ti sioni ti fadeso aga ndulu. A hunda na awakua kue so amu tele ti ala na Jéhovah ti mu tele ti ala na bê kue na yâ kota kusala ti bungbingo azo fade fade.
13 Aye wa a lingbi ti sala ni? E lingbi ti tene biani so e “wu na kusala ti Seigneur lakue.” (1 aCor. 15:58) Na ambeni ndo mingi, le-kobe abe awe, me awakua ni ayeke mingi pepe. A tisa e ti yö kungba ti e, gi pepe ti fa tene kue na yâ territoire ti e mveni, me ti sala nga kusala na ndo so a hunda mungo maboko mingi.
14 A yeke nzoni mingi ti ba tongana nyen aTémoin na ndo lê sese kue ayeke mu tele ti ala na bê kue ti sala ambeni kusala nde. Ala mu tele ti ala na bê ti ala mveni ti leke ando ti vorongo, ti sala kusala na akota bungbi, nga ti mu maboko na ngoi ti mbeni ye ti ngangu ti ndagigi, nga ti leke lakue yâ ti Da ti Royaume ti kongregation ti ala. Na ndo ndangba kusala so, a lingbi e dabe ti e so a yeke nzoni ti zia lakue Da ti Royaume na saleté pepe nga ti leke ni nzoni na peko ti abungbi oko oko. Zo so amu mbage ti lo na akusala ti tâ be-ti-molenge tongaso alingbi ti fa so lo gbu nda ti atene ti Jésus so ayeke na Luc 16:10: “Zo so ayeke be-ta-zo na ye kete kete, lo yeke be-ta-zo na ye mingi nga; na zo so ayeke kirikiri na ye kete kete, lo yeke kirikiri na ye mingi nga.”
◼ E mu maboko na akusala ti kongregation: Atä so kongregation oko oko atambela legeoko tongana mbeni mbage ti bungbi ti sese kue na lo wara afango lege ti “ngba ti be-ta-zo na ti ndara,” lo yeke nga na ambeni wungo ti awafango tene ti Royaume. (Mat. 24:45, NW) Aye so mbeni kongregation aluti mingi na ndo ye so Témoin oko oko aye na bê kue wala alingbi ti sala. Kongregation abata lê na ndo fango tene na yâ territoire ti lo, salango afini disciple, na kpengbango ala na lege ti yingo. Zo oko oko alingbi ti mu mbage ti lo na kusala so. E lingbi nga ti zia na gbele e ti manda Bible e mveni, ti kiri na anzoni tene na ngoi ti abungbi, nga ti mu maboko na ala so ayeke na bezoin ti mungo maboko na yâ kongregation. Akusala so amu anzoni lege mingi na e ti fa yingo ti sala kusala na bê ti e kue.
◼ Asurveillant azia tapande ni: Jéhovah amu na a-ancien so a hiri ala na kusala kungba ti bata kongregation oko oko. (Kus. 20:28) A yeke azo so aye la ni kusala so na salango ngangu kue ti lingbi teti matabisi so. (1 Tim. 3:1) A lingbi ti tene so aita-koli oko oko kue ayeke na alege kue so azi ti lingbi teti akungba ti kota ahon. Aita mingi ague na li ni na lege ti yingo na ala yeke na bezoin ti gue na li ni tongaso na gbele fango lege nga na mungo maboko ti ndoye ti a-ancien ti kongregation ti ala. A lingbi ala duti awamandango Bible na ambeti ti e na bê kue. Ala lingbi ti fa yingo ti sala kusala na bê ti ala kue na mango yanga ti a-ancien so yingo ti nzoni kue ahiri ala na kusala, na mungo tapande ti mabe ti ala, na ti lë alengo so a yeke gi ni na mbage ti asurveillant.—aHéb. 13:7, 17.
◼ E mu kusala ti ngoi kue: Kozo kusala ti akongregation ayeke ti fa nzo tene. (Mat. 24:14) So tâ deba nzoni tongana azo so ayeke na wâ asala ngangu ti ala kue ti mu kusala ti pionnier! A hunda mingi ni ti leke dutingo ti ala mveni. A lingbi ala ngbâ ti gbian aye na yâ fini ti ala tongana ala ye ti ngbâ lakue na yâ mbilimbili kusala ti fango tene so. Ye oko, ala so angbâ ti bata matabisi ti ala na azia pepe na peko ti ngu oko wala use teti so bê ti ala anze gi ti kete ngoi, ayeke wara ande biani adeba nzoni ti Jéhovah. Na lege ti atene wala ti asalango ye ti ala, a-ancien so ayeke na ndoye nga na ambeni Chrétien biazo alingbi ti mu maboko na apionnier ti maï kusala ti ala nzoni. So tâ pendere bibe si amaseka afa, so amu kusala ti pionnier na peko ti so ala hunzi ti manda ye na da-mbeti awe! E lingbi nga ti tene tongaso na ndo akangba so amu kusala ti pionnier permanent tongana a kiri na nengo ti kusala ti ala ti mitele na peko. So tâ kota ngia si mbeni Chrétien so amu tele ti lo na Nzapa ayeke wara tongana lo sala kusala ti bungbingo azo so ayeke gue na li ni na loro legeoko na Jéhovah!—Es. 60:22.
◼ E mu mbage na lekengo nga na batango ando ti bungbi: A yeke leke biani aDa ti Royaume ti laso nga na aDa ti Assemblée ahon ngbangbo oko. Ye ti dongo bê ni ayeke ti so mingi ti akusala ni kue ayeke aita ti e ti koli na ti wali so amu angoi nga na akode ti ala na bê kue si ayeke sala ni. (1 Chron. 28:21) Awakua saki mingi so amu tele ti ala mveni ayeke bata ada ni na salango akusala kue so a hunda. (2 Chron. 34:8) Teti so kusala so ayeke mbeni mbage ti kusala ti nzoni-kue, ala so amu mbage ti ala dä ayeke sala ni na bê ti ala kue, na ala yeke hunda pepe ti tene a futa ala ndali ti aye so ala yeke sala, legeoko tongana ti so ala yeke ku pepe ti tene a futa ala wala ti sala kua na ngoi ti akota bungbi ti district nga na ti circonscription. Ala mu mbage ti ala senge senge na ngoi ti lekengo apialo nga ti lekengo ando ti vorongo so agonda Jéhovah. Ala mu mbage ti ala nga na bê kue ti sû ambeti so ndia ahunda, ti ba lege ti atene ti konde, ti sala angele ti aye, ti ba wungo ti agbakuru ti kusala so a yeke na bezoin ni. Awakua be-ta-zo ti Jéhovah so ayeke zia pepe mbeni kungba na ndo akongregation nga ala gi oko pepe ti wara faïda, polele wala na lege ti mayele, na peko ti akusala so ala sala, teti so ala mu akode ti ala na amosoro ti ala na Jéhovah. (Ba Ministère du Royaume ti France ti nze ti Février ngu 1992, lembeti 4, paragraphe 10.) Kusala so ahunda awakua so asala na bê kue, ala so asala ni “na âme ti [ala] kue tongana ti so a yeke teti Jéhovah.”—aCol. 3:23, NW.
15 Tongaso, ye nyen afa so salango kusala na bê kue ti awakua ti Jéhovah ayeke gi oko? A yeke bibe ti ala ti mu ye. Mungo ye ti ala ti nzobe andu mingi ahon nginza wala aye ti mitele: ala “mu tele ti ala na bê ti ala mveni.” (Ps. 110:3, NW) So ayeke nda ti mungo tele ti e mveni na Jéhovah. E yeke wara mbeni futa so a zia nde. Biani, azo ayeke ba ye kue so e yeke sala na nene ni na ala yeke fa ni na e, na tongana e sala tongaso e yeke wara ‘ngia mingi ahon’ na fade e yeke “ko ye mingi nga.” (Kus. 20:35; 2 aCor. 9:6; Luc 6:38) Wasalango nzoni na e ti Kota Ahon ayeke Babâ ti e ti yayu, Jéhovah, so “andoye zo so amu matabisi na ngia.” (2 aCor. 9:7) Lo yeke futa e ande fani ngbangbo oko na lege ti adeba nzoni ti lakue lakue. (Mal. 3:10; aRom. 6:23) Tongaso, tongana amatabisi na yâ kusala ti Jéhovah ayeke na gbele mo, mo yeke mu tele ti mo na bê ti mo mveni ti kiri tene na tisango ndo tongana ti so Isaïe atene: “Mbi yeke, Mo to mbi”?—Es. 6:8.