E Yeke Kö Anzoni Ye Alingbi na Ngangu ti E Mveni

¹ Jéhovah Nzapa afa na gigi ndoye ti lo teti azo na alege mingi. Jésus agboto lê la ni na ndo ti ndoye ti Nzapa so ahon ye kue, lo fa na ambeni zo mingi mingi so abungbi so Nzapa ‘asala si lâ ti lo asu na ndo azo ti sioni nga na ndo azo ti nzoni, na lo sala si ngu-nduzu apika na ndo azo ti mbilimbili nga na ndo azo ti kirikiri.’ (Mat. 5:43-48, NW) Na mbeni ngoi, Jésus afa na gigi fä ti ndoye ti Babâ ti lo so adö bê ahon atanga ni kue: sadaka ti molenge ti lo ngengele oko, so Nzapa amu la ni teti salut ti e. (Jean 3:16) Jésus awa azo so amä lo ti fa bê ti kiri singila teti ndoye ti Nzapa. E yeke sala ngangu ti sala ye so?

² Ti fa kota bê ti kiri singila nga ti wara aye ti nzoni so aninga na lege ti ndoye ti Jéhovah, a lingbi e manda ti hinga lo. (Jean 17:3) E yeke na bezoin ti wango nga na fango lege na ndo tongana nyen e lingbi ti sala na lo na lege ni. Jéhovah afa bingo bê ti lo na ndoye ti lo na mungo Tene ti lo, Bible, so a sû ni na gbe ti yingo, nga na yango bungbi ti lo so adö bê, so na lege ni e yeke wara wango na wango-tene. (Mat. 24:45-47; 2 Tim. 3:16, 17) Teti so e yeke mara so amu tele ti lo na Jéhovah, lo yeke fa na e lege ti lo. Me e yeke fa na gigi na lege ti ngangu ti e mveni so e yeke ba na nene ni ndoye ti Jéhovah? E yeke bata wango ti lo si e nzere na lo nga e wara nzoni na pekoni? (Es. 48:17; Jacq. 1:22) Bazengele Paul asû na 1 aCorinthien 3:8: “Lo so alu na lo so azia ngu dä ayeke legeoko, na fade ala wara futa ti ala alingbi na kusala ti ala.” (E si e sû agere ti mbeti ni nde.)

³ Tâ tene, a lingbi e sala kue ti sala ye so Nzapa aye e sala. Azo kue ayeke gue na li ni na lege ti yingo legeoko pepe. Aye ayeke mingi so alingbi ti sala ngangu na ndo guengo na li ni ti e, nga a yeke na lege ti ndara pepe ti haka aye, ye so asala si bê ti zo anze. Ye oko, ngangu so zo oko oko ayeke sala ayeke kota ye mingi. Ye nyen e lingbi ti sala ti ga ndulu ahon na bungbi ti Jéhovah? Ambeni lege ayeke dä so na yâ ni e lingbi ti sala nzoni ahon yengo dä na akungba ti e mveni tongana aChrétien? Fade a yeke hunda ngangu wa ti mu maboko nzoni ahon na akusala ti kongregation? Ambeni wango-tene so bungbi ti Jéhovah amu na e ayeke dä so a lingbi e sala ye alingbi na ni?​—1 Tim. 4:16.

⁴ E mu tapande ti abe-ta-zo: Aita-koli na aita-wali be-ta-zo afa nzo tene ti Royaume teti angu mingi awe. Tongana Paul, abe-ta-zo so alingbi ti tene e mu tapande ti ala. (1 aCor. 11:1) Ala yeda na ndoye ti Nzapa na ala wara aye ti nzoni mingi teti kpengba kusala ti ala nga na ngangu ti ala mveni ti mu peko ti wango ti Bible. Ala yeke mbeni gunda ti awakua na yâ kongregation so azia pepe kusala ti ala mveni. E lingbi ba lengo ti kusala ti ala oko oko.​— aRom. 1:13; 2 aCor. 3:1-3.

⁵ Laso, afini disciple saki ngbangbo mingi ayeke ga, na yâ ngu oko oko, na bungbi. (Es. 60:8) Ala nga asala kusala ngangu ti ga abiazo na lege ti yingo, nga wâ ti ala na yâ kusala ti fango tene alingbi na gonda. Ala wara ye ti nzoni na bango tongana nyen Jéhovah ahiri deba nzoni na ndo ala so asala kusala ngangu na lo. Tapande ti aita-koli na aita-wali biazo so ayeke mu maboko na afini disciple ti hinga so a yeke pepe ngoi ti kiri na peko na yâ kusala ti Nzapa. Atä e yeke afini disciple wala awafango tene so ahinga kusala nzoni, e yeke ngbâ lakue ti maï na lege ti yingo, na yengo dä na akungba ti e mveni ti Chrétien, nga na warango nzoni na yâ aye kue so a mu na e na lege ti théocratie?

⁶ E sala kusala na ye so e manda: Ngoi mingi kozoni si Jacques asû na mbeti so a lingbi e duti ‘azo so asala ye,’ Moïse atene la ni na aJuif: ‘A lingbi i bata tene so.’ (Jacq. 1:25; Deut. 11:18) Tongaso, hingango ye e mveni alingbi kue pepe. A-Juif ayeke la ni na bezoin ti sala ye alingbi na atene ti Ndia na mango yanga ti Jéhovah. Kota kpengba-ndia so angbâ lakue. Jésus, Molenge ti Nzapa, ahinga la ni biani nene ti mango yanga. (Jean 8:28) Lo tene na Matthieu 7:24 (NW): “Zo so amä tene ti mbi, na lo sala ye alingbi na tene ni, fade a haka lo na mbeni zo so ahinga ndo.”

⁷ E yeke sala ye alingbi na ye so e manda na akota bungbi ti circonscription? E hinga ngbanga ti nyen ayeke kota ye mingi na ngoi ti e ti bata na ti duti na donzi? E yeke duti na donzi na gbele atiri ti mayele nga na ason ti Diable? E yeke na bê ti kiri singila teti awango na agbotongo mê so bungbi ti Jéhovah amu na e fani mingi, so andu nzala ti salango ye na dutingo na sioni oko pepe na lege ti nzoni tambela nga na lege ti yingo na yâ kongregation? Na lege wa e mveni e yeke sala ye alingbi na aye so e mä?​—Jacq. 1:23-25.

⁸ Kota li ti tene ti kota bungbi ti lango oko ti fini ngu ti kusala so ayeke na mbeni gunda so aluti ngangu na ndo Bible: “I mä Nzapa: I ke Diable.” (Jacq. 4:7) So ayeke nzoni fango lege teti angoi ti ngangu so! Yengo dä ti e na akomandema ti Nzapa atingbi e lê na lê na Satan. Kapa ni afa na e tongana nyen ti luti ngangu na gbele asioye so Diable aleke ti futi mabe ti e. (aHéb. 2:1) Tongana e sala tongaso, fade e yeke kö adeba nzoni alingbi na ngangu ti e mveni.

⁹ E wara nzoni na lege ti mandango ye e mveni: Mandango ye e mveni ayeke mu maboko na e ti leke mabe so akpengba, nga ayeke kono bê ti kiri singila ti e teti tâ tene. Lo yeke mu na e ziango bê nga ye kue so alingbi ti sala tene na ngangu. Lo yeke mu na e ndara na bango nda ti ye, nga na maboko ti yü zo ti fini. (aCol. 1:9-11) Ye oko, a hunda ngoi nga na ngangu ti tene mandango ye ni alë lengo, na mbeni ndulu lege ayeke dä pepe ti wara tâ hingango ye nga na bingo bê na ye ti yingo so alï mingi. E yeke wara ande ye so e lu na yâ mandango ye.​—2 aCor. 9:6, 7; aGal. 6:7.

¹⁰ E yeke bata ngoi mingi na yâ yenga oko oko ti leke tele teti abungbi ti kongregation? So ayeke mbeni lege so na yâ ni e lingbi ti fa na gigi bê ti kiri singila teti kobe so Jéhovah amu na lege ti ngba ti be-ta-zo na ti ndara. Lekengo tele nzoni teti abungbi amu maboko na e ti mu peko ti kapa ti dikongo na ti mandango Tene ti Nzapa. E yeke bata ngoi na yâ yenga oko oko ti diko mbage ti Bible so a zia na yâ mbeti-kapa ti Ekole ti Kusala ti Théocratie? A hunda gi apenze-ngbonga mingi pepe ti diko lâ oko oko na ti gbu li nzoni na ndo ye so e diko. Bungbi ti Kusala adabe e na ndo alege ti sala si kusala ti e ti fango tene alë lengo. E leke tele, na bingo bê mbilimbili na ndo akode so e lingbi ti sala kusala na ye so na yâ fango tene? Nga, e yeke sala ngangu ti sala kusala na ni fade fade? A lingbi a leke ambeni mbilimbili teti Mandango Tour ti Ba Ndo nga Mandango Buku ti Kongregation. E yeke sala ni?

¹¹ E mu mbage ti e na abungbi: E lingbi ti wara anzoni ye mingi ahon na abungbi tongana e mu mbage ti e dä. Lekengo tele teti abungbi nga na pekoni salango ngangu ti mu mbage ti e dä ayeke mu maboko na e ti dengi mê nzoni na ngoi ti abungbi, na amu maboko na e ti wara nzoni na lege ti atene ti ambeni zo. Azo mingi angbâ ti dabe ala na ngangu kusala so ala sala na tenengo kozo tene na abungbi wala akozo diskur ti ala na Ekole ti Kusala ti Théocratie. Atä so kete gingo bê ayeke dä, e ngbâ lakue ti sala ngangu kusala ti tene azo kue aba guengo na li ni ti e na lege ti yingo? (1 Tim. 4:15) Ambeni zo awara nzoni nga e yeke mu wâ na ala na lege ti atene ti e. Tongana e leke tele nzoni, teti e manda kozoni awe aye so e yeke ba ande na abungbi, mungo mbage ti e dä biani ayeke wa ande ambeni zo ti duti na ndoye nga na anzo kusala.​—aHéb. 10:23-25.

¹² A lingbi atene ti e ayo na akpengba pepe. Fani mingi, a yeke nzoni ti sala andulu tene so akiri tene biani na ahundango tene so ahunda wala so amu maboko ti fa tongana nyen ti sala ye alingbi na mbeni versê. Tongana e leke tele ti e nzoni, e lingbi ande ti sala tene na lege ti atene ti e mveni. Tongana e sala tongaso, aye ti nzoni ti e mveni na ti ambeni zo ayeke duti kota mingi ahon. Ngbanga ti nyen? Ngbanga ti so a hunda na e ti bi bê na ndo ye so e yeke tene, nga ti fa atene ni tongana ti so e gbu nda ni. A lingbi ti mu maboko nzoni ahon na ambeni ti gbu nda ti ye so ala manda. A yeke mu ande nga maboko na e ti dabe ti e dä na mbeni ngoi nde.

¹³ E lu ye na nzobe na yâ fango tene: Kusala ti e ti Chrétien ayeke mbeni mosoro. (2 aCor. 4:7) Mo yeke ba ni tongaso? E yeke na matabisi ti fa, na lege ti fango tene, mabe ti e na ambeni zo. Jésus atene la ni so yanga ti zo asala tene ti ye so asi bê ti lo. (Luc 6:45) Ngangu so e mveni e sala ti mu mbage ti e kue na yâ kusala ti fango tene ayeke mu lege na e ti kö aye ti nzoni mingi. E lingbi gbu nda ti tâ tene nzoni ahon, nga e yeke maï kode ti sala kusala na Bible nzoni ahon. E yeke na ngia ti fa tâ tene na ambeni zo nga ti mu maboko na ala ti manda ye na ndo Kota Wasalango ala. E yeke duti tongana atémoin ti mbilimbili ti komandema ti Nzapa nga ti kota yanga-ti-komande ti lo. E yeke na ngia teti e hinga so e nzere na lê ti Jéhovah, a leke e na image ti lo, na e sala ye so bê ti lo a ye.​—Mat. 5:48.

¹⁴ Tongana e ngbâ lakue ti bi lê na ndo ngangu ti e mveni, fade vorongo so e mu na Jéhovah ayeke duti lâ oko pepe mbeni kusala so e sala gi tongaso. So aye ti tene nyen? A ye ti tene so e yeke sala ande pepe ye so bê ti Nzapa aye na bê use, ti sala gi kusala ti handa lê wala ti sala kusala ni na tâ bê kue pepe nga na ngangu ti e kue pepe. A lingbi kusala ti e na Jéhovah alondo na bê ti e kue. Mbeti ti Nzapa ahunda na e ti mu tele ti e kue na yâ kusala ti lo. (aCol. 3:23, 24) Tâ tene, dutingo ti e ayeke nde nde, na Jéhovah ahunda na e pepe ye mingi ahon ye so e lingbi ti sala. Ye oko, ye so e lingbi ti sala, lo ku ti tene e sala ni! (Mat. 22:37) Teti so mitele ti e so ayeke mbilimbili-kue pepe a pusu e ti sala nzoni na e mveni mingi, a yeke nzoni ngoi na ngoi e gi ti ba e mveni nga ti ba alege so e lingbi ti leke kusala ti Nzapa nzoni ahon. E yeke sala ni lakue tongaso?

¹⁵ A lingbi e duti na donzi tongana e ye ti kpe si akusala ti e mveni nga asalango nzala ti ye ti e, akanga lege na e pepe ti mu nzoni ti e mveni na yâ kusala ti Jéhovah. A lingbi angia, asalango ngia, akusala ti gbotongo tele angbâ na ndo ti ala. A lingbi nga e bata si kusala ti e ti mitele a mu ngoi ti e kue pepe. Na batango wango ti Jésus na Matthieu 6:22, 23, e lingbi biani ti sala ngangu ahon ti mu peko ti aye ti yingo, na fade e yeke kö aye ti nzoni na pekoni.

¹⁶ Tongana e ngbâ lakue ti sala ngangu kusala ti yü zo ti fini, fade e yeda na akungba ti e mveni ti sala ye alingbi na awango so e wara na abungbi ti kongregation, akota bungbi, nga na lege ti ambeti. A lingbi zo oko oko na popo ti e amanda ye na bê kue, amu mbage kue na abungbi, na amu mbage na yâ kota kusala ti salango adisciple alingbi na dutingo ti e mveni. Na fango bê ti kiri singila na lege so teti ndoye ti Jéhovah, e lingbi biani ti kö anzoni ye mingi na lege ti yingo fadeso, nga ti bata ngangu beku ti duti lakue lakue na ndo fini sese ti Jéhovah.