Mo Yeke Fa Tene Nze Oko Oko Kue?
1 Bazengele Paul amu wango so: “Na ndo kue so e si dä na yâ guengo na li ni, zia e ngbâ lakue ti tambela mbilimbili na oko lege so.” (aPhil. 3:16, NW) Na fango peko ti versê so, Kusala ti Royaume ti février 1995, lembeti 5, atene: “Sigingo lakue na fango tene ayeke nga kota ye mingi tongana e ye biani ti ngbâ lakue ti gue na li ni na mango wango na ndo lege oko.” Ye oko, a lingbi ti tene so na ndo awafango tene 15, oko afa ye pepe na ndo kusala ti lo ti nze oko oko. E yeke na beku so awango so ayeke ga na peko ayeke mu maboko ande ti leke ye ni.
2 E bi bê na ndo matabisi ti e: A lingbi e kiri singila na bê kue teti matabisi ti e ti fa nzo tene ti Royaume na azo. Kusala so ayeke zia ngia na bê ti Jéhovah na a yeke fa na azo so amu bê ti ala kue na tene ni lege ti fini. (aProv. 27:11; 1 Tim. 4:16) Ti fa tene lakue lakue ayeke kpengba e na yâ kusala ti fango tene na a yeke mu ngia na nzoni-duti ti bê.
3 E sû tondo ti kusala ti e: Ambeni ayeke fa tene me ayeke glisa ti sû tondo ti kusala ti ala hio. E bi bê lâ oko pepe so ngangu ti e ayeke fade gi ye senge. (Ba Marc 12:41-44.) E duti na gingo bê lâ oko pepe ti sû peko ti mungo mbage ti e na fango tene. E leke mbeni ndo na yanga-da ti sû na mbeti ngoi ti e ti fango tene (na tapande mbeni calendrier); so ayeke dabe e lakue so e ye ti sû mbilimbili kusala ti e na nda ti nze oko oko.
4 E hunda ti mu maboko: Akongrégation aye ande peut-être ti kiri ti ba aye so ala leke teti mungo maboko nzoni ahon na ala so ayeke sigigi na fango tene lakue lakue pepe. Secrétaire na ala so amu li ni na abungbi ti mandango buku alingbi ti hunda mungo maboko ti ambeni wafango tene. Tongana mo yeke na amolenge wala mo yeke manda Bible na ambeni wafango tene so ade ti awara batême pepe, fa na ala tongana nyen ti sû tondo ti kusala ti ala nze oko oko.
5 Dabe mo na article “Reconnaissante à Jéhovah pour une longue vie à son service” so asigigi na yâ La Tour de Garde ti kozo lango ti octobre 1997. Ottilie Mydland, mbeni ita-wali ti kodoro ti Norvège, aga mbeni wafango tene nze oko oko kue kozoni ti wara batême na ngu 1921. Ngu bale mbasambala na ota na pekoni, tongana lo wara ngu 99, lo tene: “Mbi yeke na ngia ti duti lakue mbeni wafango tene nze oko oko kue.” Bibe ti lo ayeke mbeni pendere tapande teti awakua ti Jéhovah kue!