Awakua ti nzoni tënë

JÉHOVAH amû na e mbeni tapande so ayeke nzoni-kue ti tene e mû peko ni. Tapande ni so ayeke ti Molenge ti lo, Jésus Christ (1 Pi. 2:21). Tongana mbeni zo aga disciple ti Jésus, zo ni so ayeke fa nzoni tënë tongana wakua ti Nzapa. Ti fa so ye so ayeke sara ande nzoni mingi na zo ni na lege ti yingo, Jésus atene: “Ala ga na mbi, ala kue so asara ngangu kua na kungba ane ala, na mbi yeke dë bê ti ala. Ala yô joug ti mbi na ala manda ye na mbage ti mbi, ndali ti so mbi yeke sara ye na ngangu pëpe nga mbi sara terê ti mbi kete, na ala yeke wara dengo bê ndali ti ala wani.” (Mat. 11:28, 29). Azo kue so ayeda na tisango ndo ti Jésus so abâ tongana nyen la zendo ti lo so aga tâ tënë na yâ ti fini ti ala.

² Teti so Jésus ayeke kozo Wakua ti Nzapa, so ayeke kota ahon atanga ni kue, lo iri lani ambeni zo ti ga adisciple ti lo (Mat. 9:9; Jean 1:43). Lo fa na ala ti sara kua ti fango tënë, na lo tokua ala ti sara mara ti kua so lo wani lo yeke sara na ngoi ni so (Mat. 10:1–11:1; 20:28; Luc 4:43). Na pekoni, lo tokua ambeni disciple nde 70 ti fa nga nzoni tënë ti Royaume ti Nzapa (Luc 10:1, 8-11). Na ngoi so Jésus atokua lani adisciple ti lo, lo tene na ala: “Zo so amä ala, lo mä mbi nga. Zo so ake ti mä ala, lo ke ti mä mbi nga. Zo so ake ti mä mbi, lo ke nga ti mä lo so atokua mbi.” (Luc 10:16). Na lege ti tënë so, Jésus afa so kua so a mû na adisciple ni ayeke kete kua ape. Ala yeke sara kua lani na iri ti Jésus nga na ti Nzapa so ayeke na nduzu na ndö ti aye kue! Legeoko na ngoi ti e laso, azo kue so ayeda na tisango ndo ti Jésus ti ‘ga ti mû peko ti lo’, ala kue ayeke sara gï oko kua so (Luc 18:22; 2 aCor. 2:17). Ala so kue ayeda na tisango ndo so, Nzapa atokua ala ti fa nzoni tënë ti Royaume nga ti sara adisciple.—Mat. 24:14; 28:19, 20.

³ Ni la, teti so e yeda na tisango ndo ti Jésus ti mû peko ti lo, e wara pasa ti “gi ti hinga” Jéhovah Nzapa nga na Jésus Christ (Jean 17:3). A fa na e alege ti Jéhovah. Mungo maboko ti Jéhovah asara si e wara lege ti changé bibe ti e si aga fini, e yü fini zo nga e leke dutingo ti e ti tene ague oko na andia ti Jéhovah so ayeke mbilimbili (aRom. 12:1, 2; aÉph. 4:22-24; aCol. 3:9, 10). Ti bâ aye so kue na nene ni, a pusu e ti mû terê ti e na Jéhovah na ti fa ni na lege ti batême. Batême so e wara asara si e ga awakua ti Nzapa.

⁴ Zia e bata na li ti e lakue so ti sara kua na Nzapa, a lingbi maboko ti e nga na bê ti e aduti na sioni kete pëpe (Ps. 24:3, 4; És. 52:11; 2 aCor. 6:14–7:1). Na lege ti mabe so e yeke na ni na Jésus Christ, e wara nzoni conscience (aHéb. 10:19-23, 35, 36; Apoc. 7:9, 10, 14). Bazengele Paul awa lani aChrétien ti sara ye kue teti gloire ti Nzapa, tongaso si ala ga pëpe mbeni ye ti pikango gere ndali ti ambeni zo. Bazengele Pierre afa lani so a yeke kota ye mingi ti duti na nzoni sarango ye ti ndu bê ti ala so amä na bê pëpe si ala ga na yâ ti tâ tënë (1 aCor. 10:31, 33; 1 Pi. 3:1). Tongana nyen la mo lingbi ti mû maboko na mbeni zo ti ga mbeni wakua ti nzoni tënë?

AFINI WAFANGO TËNË

⁵ Na ngoi so mo to nda ti manda Bible na mbeni zo so asara nzara ti tâ tënë, wa lo ti fa na amba ti lo aye so lo yeke manda. Mo lingbi ti wa lo ti fa ni na afami ti lo, akamarade ti lo, ala so lo na ala asara kua place oko nga na ambeni zo nde, tongana lege azi na lo ti sara ni. Ye so ayeke mbeni kota ye so a hunda ti sara ni tongana mo yeke fa na afini zo ti ga adisciple ti Jésus Christ, wala awakua ti nzoni tënë (Mat. 9:9; Luc 6:40). Na ngoi so fini zo ni ayeke gue na li ni na lege ti yingo na lo hinga ti gbu angoi so a zi na lo ti fa tënë, kite ayeke dä ape so a yeke pusu lo ti hunda ti sigi na fango tënë legeoko na aita ti congrégation.

AYE SO A HUNDA TI SARA KOZO TI FA TËNË NA CONGRÉGATION

⁶ Kozo ti tene mo tisa mbeni zo ti sigi na fango tënë da na da, a lingbi mo hinga biani so lo sara ye alingbi na aye so a hunda. Tongana mbeni zo asigi legeoko na e na fango tënë, lo yeke fa terê ti lo na lê ti azo kue tongana Témoin ti Jéhovah. So aye ti tene so lo leke fini ti lo awe ti lingbi na andia ti Jéhovah, na so lo lingbi ti ga mbeni wafango tënë so ade ti wara batême ape.

⁷ Na ngoi so mo yeke manda Bible na mbeni zo na mo yeke sara lisoro na lo na ndö ti amama-ndia ti Bible, peut-être mo hinga tënë nzoni na ndö ti dutingo ti lo. Peut-être mo bâ so lo yeke sara ye alingbi na aye so lo yeke manda. Me ambeni ye ayeke dä so abâ dutingo ti lo, so a-ancien ayeke yeda ti sara lisoro na mo na lo na ndö ni.

⁸ Coordinateur ti bungbi ti a-ancien ayeke leke ti tene a-ancien use (so mbeni oko ayeke na yâ ti Komite ti service) asara lisoro na mo nga na zo so mo yeke manda Bible na lo. Na yâ ti acongrégation so a-ancien ayeke dä mingi ape, mbeni ancien nga na mbeni wakua ti mungo maboko so alingbi, apeut ti sara ni. A yeke nzoni aita-koli so a soro ala asara kue ti sara lisoro ni hio. Tongana ala hinga tënë ni na ngoi ti mbeni bungbi, ala lingbi ti sara lisoro ni na mo nga na wamandango Bible ni na peko ti bungbi ni. A yeke nzoni zo kue aduti na ngia na ngoi ti lisoro ni. Kozo ti tene a yeda na wamandango ye ni ti ga mbeni wafango tënë so ade ti wara batême ape, a lingbi a-ancien use so abâ wala dutingo ti lo alingbi na atënë so ge:

1. (1) Lo mä na bê so Bible ayeke tënë ti yanga ti Nzapa.—2 Tim. 3:16.

2. (2) Lo hinga akozo fango ye ti Mbeti ti Nzapa nga lo mä na bê na ni, tongaso si tongana a hunda na lo atënë, ahon ti tene lo kiri tënë na lege ti afango ye ti anzapa ti wataka wala atënë ti li ti lo, lo yeke kiri ande tënë alingbi na ye so Bible afa.—Mat. 7:21-23; 2 Tim. 2:15.

3. (3) Lo yeke sara ye alingbi na commandement ti Bible so ahunda ti ga na abungbi ti congrégation legeoko na awakua ti Jéhovah, tongana lo lingbi ti sara ni.—Ps. 122:1; aHéb. 10:24, 25.

4. (4) Lo hinga ye so Bible atene na ndö ti lango-sioni, so na popo ni a yeke wara tënë ti gingo wali wala koli nde, sarango mariage na awali, bungbingo koli na koli wala wali na wali. Nga, lo yeke sara ye alingbi na afango ye so na yâ ti fini ti lo. Tongana lo yeke na wali wala koli so lo na lo ayeke vivre, a yeke nzoni ala sara mariage alingbi na ye so ndia ahunda.—Mat. 19:9; 1 aCor. 6:9, 10; 1 Tim. 3:2, 12; aHéb. 13:4.

5. (5) Lo yeke bata wango ti Bible so ake nyongo sämba ahon ndö ni. Lo ke aye tongana manga, mbangi wala ambeni ye nde so na nyongo ni zo alingbi ti ga ngbâa ni na alingbi ti buba li ti lo na seni ti lo.—2 aCor. 7:1; aÉph. 5:18; 1 Pi. 4:3, 4.

6. (6) Lo bâ so a yeke kota ye ti kpe asioni kamarade.—1 aCor. 15:33.

7. (7) Lo sigi biani awe na yâ ti abungbi ti vorongo nzapa ti wataka kue so peut-être lo yeke dä kozo. Lo zia lege ti guengo na abungbi ti ala. Lo zia lege ti mungo maboko na akua ti ala wala ti mungo mbage dä.—2 aCor. 6:14-18; Apoc. 18:4.

8. (8) Lo zi terê ti lo kue awe na yâ ti aye ti poroso ti dunia so.—Jean 6:15; 15:19; Jacq. 1:27.

9. (9) Lo yeda na tënë so Ésaïe 2:4 atene na ndö ti tënë ti amara so ayeke sara bira encore pëpe na popo ti ala, na lo yeke sara ye alingbi na ni.

10. (10) Lo ye tâ na bê ti lo biani ti ga Témoin ti Jéhovah.—Ps. 110:3.

⁹ Tongana a-ancien ni ahinga mbilimbili pëpe atënë ti bê ti wamandango Bible ni na ndö ti ambeni tënë so ala bâ ni na lo, ala lingbi ti hunda lo ti bâ aversê so a zia na terê ti atënë ni so ti sara lisoro na lo na ndö ni. A yeke kota ye mingi ti tene lo hinga so ala so ayeke gue na fango tënë legeoko na aTémoin ti Jéhovah ahinga so a lingbi ala fa na yâ ti fini ti ala so ala yeke sara ye alingbi na aye so Mbeti ti Nzapa ahunda. Atënë so lo tene ayeke mû maboko na a-ancien ni ti bâ wala lo hinga ye so a ku na mbage ti lo ti sara, nga wala lo lingbi ti tene a zi lege na lo ti komanse ti gue na fango tënë.

¹⁰ Tongana a-ancien ni abâ so lo lingbi biani ti fa tënë, a lingbi ala tene ni na lo hio. Mingi ni, ala yeke tene ni na lo na hunzingo ti lisoro ni. Tongana lo lingbi ti fa tënë, a-ancien ni alingbi ti yamba lo na ngia tongana mbeni wafango tënë (aRom. 15:7). A yeke nzoni a-ancien ni awa lo ti to nda ti fa tënë hio tongana lege ayeke dä, na tongana a si na nda ti nze, a lingbi lo mû rapport ti kua ti fango tënë ti lo. A-ancien ni alingbi ti fa na lo so, tongana a zi lege na mbeni wamandango Bible ti fa tënë legeoko na congrégation na tongana lo bi kozo rapport ti lo ti kusala awe, a yeke zi mbeni fiche na iri ti lo [so a iri ni Activité du proclamateur (Fichier de la congrégation)], na a yeke zia fiche ni so na yâ ti ambeti ti congrégation. A-ancien ayeke zi fiche so na iri ti wafango tënë ni tongaso si bungbi ti Jéhovah alingbi ti bâ lege ti akua ti aTémoin ti Jéhovah na yâ ti dunia kue nga tongaso si wafango tënë ni alingbi ti mû mbage na akua ti Royaume nga ti wara mungo maboko na lege ti yingo. Na ndö ni, a-ancien alingbi ti tene na fini wafango tënë ni so a yeke sara kua na atënë so andu lo so ayeke na lê ti fiche ni alingbi na Arègle so abâ dunia kue ti aTémoin ti Jéhovah na ndö ti batango asango so ayeke na ndö ti jw.org.

¹¹ Tongana e gi ti hinga fini wafango tënë ni so nzoni, nga e yeke bi bê ti e na kua so lo sara juska fadeso, a lingbi ti sara nzoni mingi na lo. A lingbi ti pusu lo ti mû rapport ti lo nze na nze nga ti sara même ngangu ahon ti kozo na yâ ti kua ti Jéhovah.—aPhil. 2:4; aHéb. 13:2.

¹² Tongana a-ancien ni abâ so ye oko akanga lege pëpe na wamandango Bible ni ti fa tënë, lo lingbi ti tene a mû na lo buku Bungbi so a leke ni ti sara ye so Jéhovah aye. Na pekoni, tongana lo mû kozo rapport ti lo awe, a yeke sara mbeni nduru tokua na congrégation ti tene so wamandango Bible ni ayeke fadeso mbeni wafango tënë so ade ti wara batême ape.

MUNGO MABOKO NA AMOLENGE

¹³ Akete molenge nga kue alingbi ti ga awafango nzoni tënë. Jésus ayamba lani na terê ti lo akete molenge, na lo iri tënë nzoni na ndö ti ala (Mat. 19:13-15; 21:15, 16). Atâa so kozoni kue, a yeke na ababâ na amama ti mû maboko na amolenge ti ala, ambeni ita nde so ayeke na yâ ti congrégation alingbi peut-être ti duti na nzara ti mû maboko na amolenge so aye tâ na bê ti ala wani ti fa tënë ti Royaume. Tongana mo yeke babâ wala mama, nzoni tapande ti mo na yâ ti kua ti fango tënë alingbi ti pusu amolenge ti mo ti mû terê ti ala kue ti sara kua ti Nzapa. Tongana mbeni molenge ayeke na anzoni sarango ye, si na bê ti lo wani lo ye ti fa mabe ti lo na gigi na azo, nyen la a lingbi ti sara ti mû maboko na lo?

¹⁴ A yeke nzoni babâ wala mama ti lo aga nduru na mbeni ancien so ayeke na yâ ti Komite ti service ti congrégation ti sara lisoro na lo ti bâ wala molenge ni alingbi awe ti ga wafango tënë. Coordinateur ti bungbi ti a-ancien ni ayeke leke ti tene a-ancien use (so mbeni oko ayeke na yâ ti komite ti service) asara lisoro na molenge ni nga na babâ wala mama ti lo so ayeke Témoin (wala ala use kue) wala mbeni zo so molenge ni ayeke na gbe ti lo. Tongana molenge ni ahinga nzoni awe akozo tâ tënë ti Bible, na lo fa so lo ye tâ na bê ti lo biani ti fa tënë ti Royaume, ye so ayeke fa ande na gigi so lo maï nzoni na lege ti yingo. Tongana a-ancien use so abâ atënë so nga na ambeni tënë nde so ague oko na ati so andu akota zo awe, ala lingbi ti bâ wala molenge ni alingbi ti ga wafango tënë so ade ti wara batême ape (Luc 6:45; aRom. 10:10). Na ngoi so a-ancien ni ayeke sara mara ti lisoro tongaso na mbeni kete molenge, ala yeke pëpe na bezoin ti sara lisoro na lo na ndö ti ambeni ye so mingi ni abâ gï akota zo.

¹⁵ Na ngoi ti lisoro ni so, a yeke nzoni a-ancien ni agonda molenge ni ndali ti ngangu so lo yeke sara, na a yeke nzoni ala wa lo ti tene lo leke na bê ti lo ti gue juska ti wara batême. Kite ayeke dä ape so babâ na mama ni asara kua ngangu ti yôro tâ tënë na yâ ti bê ti molenge ti ala, tongaso a lingbi a-ancien ni agonda ala nga. Ti mû maboko na babâ na mama ni na ndö ti ye so ala lingbi ti sara ti ngbâ ti mû maboko na molenge ti ala, a yeke nzoni a-ancien ni afa na ala mbage so atene “Mbeni tënë ndali ti ababâ na amama so ayeke aChrétien,” na lembeti 179-181.

MUNGO TERÊ NA NZAPA NGA NA BATÊME

¹⁶ Tongana mo hinga Jéhovah nga mo fa so mo ye lo na lege so mo yeke bata andia ti lo nga mo yeke fa tënë, a yeke ti mo ti kpengba songo so ayeke na popo ti mo na lo. Mo yeke sara ni tongana nyen? Na mungo terê ti mo na lo na yâ ti sambela nga na fango ni na lege ti warango batême na yâ ti ngu.—Mat. 28:19, 20.

¹⁷ Ti mû terê ti mo na Nzapa aye ti tene ti zia terê ti mo nde ndali ti lo. Mo yeke mû terê ti mo na Nzapa na lege so mo yeke sambela lo, ti mû zendo ti sara gï na lo na yâ ti fini ti mo kue na ti tambela gï na ndö ti lege ti lo. A ye ti tene so mo leke na bê ti mo ti voro gï lo oko teti lakue lakue (Deut. 5:9). A yeke mbeni desizion so abâ gï mo wani. Mbeni zo nde la apeut ti sara ni na place ti mo ape.

¹⁸ Me a hunda gï pëpe ti tene mo tene na Jéhovah so mo ye ti ga ti lo, na mo ngbâ gï ge awe. A lingbi mo fa na lê ti azo so mo mû terê ti mo na Nzapa awe. Mo yeke fa ni na lege so a batize mo na yâ ti ngu tongana ti Jésus (1 Pi. 2:21; 3:21). Tongana mo leke na bê ti mo awe ti sara na Jéhovah na mo yeke na nzara ti wara batême, a yeke nzoni mo sara nyen? A yeke nzoni mo fa tënë ni na coordinateur ti bungbi ti a-ancien. Lo yeke leke ti tene a-ancien nde nde asara lisoro na mo ti bâ biani wala mo lingbi awe na aye so Nzapa ahunda na ala so aye ti wara batême. Ti hinga ambeni tënë na ndö ni, bâ li ti tënë “Mbeni tënë ndali ti awafango tënë so ade ti wara batême ape,” so ayeke na lembeti 182-184 ti buku so, nga li ti tënë “Ahundango tënë ndali ti azo so aye ti wara batême,” so ayeke na lembeti 185-207.

ATONDO NA NDÖ TI GUENGO NA LI NI TI FANGO TËNË

¹⁹ Teti angu mingi, atondo so a mû ni ti fa guengo na li ni ti tâ vorongo Nzapa na ndö ti sese kue akpengba awakua ti Jéhovah mingi. A komanse na ngoi so Jésus Christ atene lani na adisciple ti lo ti kozoni so a yeke fa ande nzoni tënë na ndö ti sese kue, atâ Chrétien abi bê ti ala mingi ti hinga tongana nyen la tënë ti lo so ayeke ga tâ tënë.—Mat. 28:19, 20; Marc 13:10; Kus. 1:8.

²⁰ Terê ti akozo disciple ti Jésus anzere lani mingi tongana ala mä so kua ti fango tënë ague na li ni (Marc 6:30). Mbeti ti Kusala afa na e so a yeke lani azo 120 tongaso si ayeke dä na ngoi so a tuku yingo vulu na ndö ti adisciple na Pentecôte ti ngu 33. Kete na pekoni, wungo ti adisciple ni ague na li ni asi 3 000. Na pekoni, ala si 5 000. Tondo ni afa so “lâ na lâ Jéhovah angbâ ti zia na ndö ti ala azo so lo sö ala”, a fa nga so ‘gbâ ti aprêtre ayeda na tënë ti mabe so.’ (Kus. 1:15; 2:5-11, 41, 47; 4:4; 6:7). Biani, atondo ti guengo na li ni ti kua ti fango tënë so amû lani ngangu mingi na adisciple. Kite ayeke dä ape so apendere tondo tongaso apusu ala ti gue na li ni na yâ ti kua so Nzapa amû na ala, atâa so akota zo ti nzapa ti aJuif asara lani ngangu mingi na ala.

²¹ Na ngu 60 ti si na 61 tongaso, Paul atene na yâ ti mbeti ti lo na aColossien so nzoni tënë ‘alë lengo na a yeke maï gï maïngo na yâ ti dunia mobimba,’ na “a fa ni na création kue so ayeke na gbe ti yayu”. (aCol. 1:5, 6, 23). Akozo Chrétien ayeke sara ye lani alingbi na tënë ti Nzapa, na yingo vulu amû ngangu na ala ti sara kota kua ti fango tënë so kozoni si a futi Jérusalem na ngu 70. Ti mä tondo ti akua so a yeke sara lani, a doit ti kpengba aChrétien be-ta-zo so mingi!

²² Legeoko nga laso, bungbi ti Jéhovah ayeke sara ngangu ti mû atondo ti akua so a yeke sara so ayeke sara si Matthieu 24:14 aga tâ tënë, so atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” Teti so e yeke awakua so amû terê ti ala na Nzapa awe, e yeke na mbeni kua so a lingbi e sara ni hio. A lingbi e oko oko kue e gi ti sara part ti e, tongaso si a fa biani nzoni tënë ni kue kozoni si nda ni aga. Jéhovah ayeke sara kue ti tene a hunzi kua ti fango tënë so kue kue kue, na tongana e mû mbage na kua ni, e yeke zia ngia na bê ti Jéhovah.—Ézéch. 3:18-21.

SUNGO RAPPORT TI KUSALA TI MO WANI

²³ Nyen la mbilimbili a lingbi e sû na lê ti rapport ti e? Na lê ti rapport ni, so bungbi ti Jéhovah amû, a fa aye so a lingbi a sû ni dä. Me peut-être atënë so e yeke fa ni ge ayeke mû ande maboko na mo.

²⁴ Na lê ti rapport ni, mbeni place ayeke dä so a sû dä “Publications laissées (imprimées ou électroniques)”, sû wungo ti ambeti kue, atâa a yeke ti so a imprimé wala ti so a peut ti téléchargé ni, so mo kangbi ni na azo so ade ti wara batême ape ti ga aTémoin ti Jéhovah. Na place so a sû “Vidéos montrées”, sû fani oke la mo fa avidéo ti e na mbeni zo.

²⁵ Sû na place so a zia dä “Nouv. visites” (wala avizite), fani oke la mo kiri mo bâ zo oko oko kue so afa kozoni awe so lo sara nzara ti tënë ni, me so ade ti wara batême ape, ti ga Témoin ti Jéhovah. Mo yeke diko vizite tongana mo kiri mo bâ mbeni zo na ndo ti lo, mo tokua lettre na zo ni, mo iri lo na téléphone, mo tokua message na lo wala mo zia ambeni mbeti na lo. Ngoi oko oko kue so mo yeke manda Bible na mbeni zo, mo lingbi ti diko ni tongana vizite. Mbeni babâ wala mama alingbi ti diko vizite oko yenga oko oko tongana lo mû li ni na vorongo Nzapa na yâ ti sewa na ngoi so mbeni molenge so ade ti wara batême ape ayeke dä.

²⁶ Atâa so, mingi ni, a yeke manda Bible na zo na yâ ti yenga oko oko, tongana a si na hunzingo ti nze ni, a yeke diko ni gï étude oko. A lingbi wafango tënë ni asû wungo ti azo nde nde so lo manda Bible na ala na yâ ti nze ni so. Azo so ade ti wara batême ape ti ga aTémoin ti Jéhovah na so mo ngbâ ti manda Bible na ala, mo lingbi ti diko ala nga tongana a-étude. Tongana mbeni ancien so ayeke na yâ ti Komite ti service ti congrégation ahunda na mo ti manda Bible na mbeni ita so azia ti fa tënë a ninga, wala mo yeke manda Bible na mbeni zo so awara batême fini fini, si ade lo hunzi buku Bible alingbi ti fa nyen na e? nga na buku Lege ti ngbâ na yâ ti ndoye ti Nzapa pëpe, mo lingbi nga ti diko ni tongana mbeni étude.

²⁷ A yeke kota ye mingi ti sû tâ na lege ni angbonga so mo sara na fango tënë. Mbilimbili, angbonga so mo mû ti fa na tënë da na da, ti sara avizite, ti manda Bible na azo wala nga na ambeni lege so azi na mo ti fa tënë na azo so ade ti wara batême ape ti ga aTémoin ti Jéhovah. Tongana aita use la asigi na fango tënë, ala use kue alingbi ti diko ngbonga ti fango tënë ti ala. Me, gï zo oko oko la ayeke diko avizite wala a-étude so lo sara. Babâ na mama so amû mbage na fango ye na amolenge ti ala na ngoi ti Vorongo Nzapa na yâ ti sewa alingbi ti diko ngbonga oko, yenga na yenga. Aita-koli alingbi ti diko ngbonga so ala mû ti mû na mbeni diskur. Ita so akiri na peko ti mbeni diskur, na yanga ti mbeni kodro nde, apeut nga ti diko ngbonga ni. Ambeni kua nde ayeke nga dä so ayeke kota mingi me so a hunda pëpe ti diko angbonga so e yeke mû ti sara na ni, na tapande ngoi so e yeke mû ti leke terê ti e teti fango tënë, ti duti dä na ngoi ti abungbi ti fango tënë, ti sara ambeni kua ti congrégation nga na ambeni ye nde tongaso.

²⁸ Wafango tënë oko oko la adoit ti sara kua na conscience ti lo so Bible afa lege na ni ti hinga l’heure so lo komanse ti fa tënë nga na l’heure so lo hunzi na ni. Ambeni wafango tënë ayeke fa tënë na ando so azo ayeke dä mingi. Ambeni ayeke fa tënë na yâ ti aterritoire so azo ayeke dä mingi pëpe, na so a hunda ti tene zo atambela a yo si lo si dä. Aterritoire ayeke nde nde; bango ndo ti awafango tënë na ndö ti kua ti ala ayeke nga nde nde. Na ndö ti tënë ti angoi so zo ayeke sara na fango tënë, Bebungbi ayeke gbu acongrégation ti yâ ti dunia kue na ngangu pëpe ti mû gï peko ti conscience ti aita ti Bebungbi ni. Nga, a soro mbeni zo a zia lo pëpe ti bâ ndo na ndö ti mara ti tënë tongaso.—Mat. 6:1; 7:1; 1 Tim. 1:5.

²⁹ A lingbi ngoi ti fango tënë so e sû na lê ti rapport ti e aduti apenze-ngbonga pëpe. Me tënë so abâ pëpe mbeni ita so a yeke ngangu mingi na lo ti fa tënë tongana ti e, peut-être ngbanga ti so lo yeke mbakoro mingi, terê ti lo ason aninga si lo lango gï na da, a zia lo na yâ ti mbeni da ti batango ambakoro wala ngbanga ti mbeni nda ti tënë nde. Ita tongaso alingbi ti diko ngoi ti fango tënë ti lo a komanse na penze-ngbonga 15, 30 wala 45. Même tongana lo fa tënë gï penze-ngbonga 15 na nze ni so, a lingbi lo sû ni na lê ti rapport ti lo, tongaso si a lingbi ti ngbâ ti diko lo tongana mbeni ita so angbâ lakue ti fa tënë nze na nze. Tënë so abâ nga mbeni wafango tënë so terê ti lo ason ngangu wala so lo wara mbeni kota kä so akanga lege na lo ti tambela teti nze oko tongaso. Me, a yeke ye so a leke ni gï teti ala so mbeni ye asara si a yeke tâ ngangu na ala ti fa tënë mingi. Komite ti service ti congrégation ni la ayeke bâ wala zo wa la alingbi na ye so a leke ni so.

FICHE TI WAFANGO TËNË

³⁰ A yeke mû aye so mo sû na lê ti rapport ti mo, ti nze na nze, ti sû ni na lê ti mbeni mbeti so a iri ni Activité du proclamateur (Fichier de la congrégation). Congrégation la ayeke bata fiche ni. Tongana mo ye ti gue na mbeni fini congrégation, sara kue ti tene tënë ni na a-ancien ti mo. Secrétaire ayeke sara kue ti tokua fiche ti mo ti wafango tënë na fini congrégation ti mo. Sarango tongaso ayeke mû lege na a-ancien ti yamba mo nzoni nga ti mû maboko na mo na lege ti yingo. Tongana mo zia congrégation ti mo mo gue na mbeni ndo, si mo de mo hon nze ota pëpe na ndo ni so, ngbâ lakue ti tokua rapport ti fango tënë ti mo na congrégation ti mo.

E YEKE SÛ RAPPORT TI FANGO TËNË TI E NGBANGA TI NYEN?

³¹ Na ambeni ngoi mo yeke girisa ti mû rapport ti fango tënë ti mo? Kite ayeke dä ape so e kue e bezoin ti tene, ngoi na ngoi, a dabe ti e na ambeni ye. Me tongana e gï ti duti na nzoni bango ndo na ndö ti mungo rapport ti e nga e hinga ndani so a yeke kota ye ti sara tongaso, a yeke duti ngangu na e pëpe ti dabe ti e ti sû rapport ti e.

³² Ambeni ita ahunda, atene: “So Jéhovah ahinga ye so mbi yeke sara na yâ ti kua ti lo awe so, ngbanga ti nyen la mbi doit ti mû rapport ti fango tënë ti mbi na congrégation?” Tâ tënë, Jéhovah ahinga ye so e yeke sara, na lo lingbi ti bâ biani wala e yeke sara na lo na âme ti e kue wala pëpe. Ye oko, dabe ti mo nga so Jéhovah asara lani si a sû na mbeti wungo ti alango so Noé asara na yâ ti arche nga wungo ti angu so azo ti Israël asara na yâ ti benyama. Nga, Nzapa abata tondo ti wungo ti ala so angbâ lani be-ta-zo na lo nga na ti ala so ake yanga. Lo sara si a sû tondo ti abira so a sara lani ti mû kodro ti Canaan na ngangu, nga na tondo ti aye so ajuge be-ta-zo ti Israël asara. Biani, lo sara lani si a bata na mbeti anzene nzene tënë mingi so andu aye so awakua ti lo asara. Na lege ti yingo ti lo, lo bata na mbeti tondo ti aye so asi lani, na ye so afa na e polele bango ndo ti lo na ndö ti sungo atondo so ayeke na lege ni.

³³ Aye so asi ândö so a sû ni na yâ ti Bible afa na gigi so aye so awakua ti Jéhovah asû ni ayeke tâ na lege ni. A sû mbilimbili wungo ti ambeni zo wala ti ambeni ye na yâ ti mingi ti ambaï ni so, na zo alingbi ti gbu nda ti mbaï ni kue pëpe tongana fade a sû pëpe wungo ti aye ni so. Bâ atapande so a fa na yâ ti aversê so: Genèse 46:27; Exode 12:37; aJuge 7:7; 2 aGbia 19:35; 2 Chronique 14:9-13; Jean 6:10; 21:11; Kusala 2:41; 19:19.

³⁴ Atâa so aye so e sû na lê ti rapport ti e afa pëpe aye kue so e yeke sara na yâ ti vorongo so e yeke voro na Jéhovah, aye so e sû na lê ni ayeke mû lege ti hinga ambeni ye na ndö ti bungbi ti Jéhovah. Lani na ngoi so Jésus ade na sese, na ngoi so abazengele akiri na peko ti mbeni kapa ti fango tënë, ala fa na Jésus “peko ti aye kue so ala sara nga so ala fa na azo.” (Marc 6:30). Ngoi na ngoi, arapport alingbi ti fa so a lingbi e bi lê ti e na ndö ti ambeni mbage ti kua ti fango tënë ti e nzoni. Wungo ti aye so e sû ni na lê ti rapport alingbi ti fa so ambeni mbage ti fango tënë ague na li ni nga ambeni mbage ni ague na li ni tongana ti kozo ape, na tapande wungo ti awafango tënë. Peut-être a bezoin ti mû wango na awafango tënë ni ti tene akpengba ala, wala peut-être akpale ayeke dä so a lingbi a leke ni. Asurveillant so amû li ni ayeke bi lê nzoni na ndö ti arapport, na ala yeke sara ngangu ti leke ye kue so peut-être ayeke kanga lege na ambeni ita wala na congrégation ni kue ti gue na li ni.

³⁵ Arapport ayeke sara nga nzoni mingi na tambelango ti aye na yâ ti bungbi ti Jéhovah, teti a mû lege ti hinga ando so a hunda ti wara awakua dä mingi. A mû lege ti hinga ando so kua ague na li ni dä mingi, ando so kua ague na li ni dä mingi pëpe nga ambeti wa la a yeke na bezoin ni ti mû maboko na azo ti ndo ni ti manda tâ tënë. Arapport amû nga lege na bungbi ti Jéhovah ti leke ambeti alingbi na bezoin ti akodro nde nde, nga ti tene na pekoni a sara kue si ambeti so e yeke na bezoin ni aduti dä lakue ti sara na kua na fango tënë.

³⁶ Ti mingi ti e, arapport ayeke aye so akpengba e mingi. Biani, a nzere na e ti mä tënë ti kua so aita ti e ayeke sara ti fa nzoni tënë na ndö ti sese kue. Arapport so afa guengo na li ni ti akua ti e amû maboko na e ti bâ tongana nyen la bungbi ti Jéhovah ayeke gue na li ni. Aye so asi na ambeni ita ti e akpengba e, nga apusu e ti fa tënë mingi ahon ti so e yeke sara ka (Kus. 15:3). Ni la, ti sara kua maboko na maboko na congrégation na lege so e mû arapport ti e ayeke kota ye nga afa so e bi bê na aita ti e na yâ ti dunia kue. Na sarango kete ye so, e yeke fa so e yeda na aye so Jéhovah aleke ti fa lege na bungbi ti lo si atambela nzoni.—Luc 16:10; aHéb. 13:17.

ZIA AMBENI YE NA GBELE MO TI SARA

³⁷ E yeke na mbeni raison oko pëpe ti haka kua ti e ti fango tënë na ti mbeni zo nde (aGal. 5:26; 6:4). Dutingo ti zo oko oko ayeke nde nde. Na mbage, e lingbi ti wara ye ti nzoni mingi tongana e zia na gbele e ambeni ye so e peut ti sara ti bâ wala e gue na li ni na yâ ti kua ti fango tënë. Tongana e wara lege ti sara aye so e zia na gbele e, e yeke wara ngia so zo ayeke wara ka tongana lo hunzi mbeni kua ti lo.

³⁸ A yeke polele so Jéhovah angbâ ti sara si kua ti bungbingo azo so lo yeke bata ala na ngoi ti “kota ye ti vundu” ague na li ni hio. E yeke laso na ngoi so prophétie ti Ésaïe so aga tâ tënë, so atene: “Azo so wungo ti ala ayeke gï kete ayeke ga saki oko, na asenge zo ayeke ga mbeni ngangu mara. Mbi Jéhovah, mbi yeke sara si ye ni asi hio tongana ngoi ni alingbi.” (Apoc. 7:9, 14; És. 60:22). So kota pasa si e yeke na ni ti duti awakua ti fango nzoni tënë na ngoi ti lâ ti nda ni so!—Mat. 24:14.