Ye so E Zia na Gbele E ti Wara Ayeke Nyen?
1 Ngbanga ti nyen e yeke manda Bible na azo na da ti ala? Gi ti mu na zo hingango ye, ti sala si fini ti azo aga nzoni ahon, wala ti sala si bango ndo ti ala na ndo kekereke aga nzoni ahon? Oko pepe. Kota ye so e zia na gbele e ti wara ayeke ti sala si azo aga adisciple ti Jésus Christ! (Mat. 28:19; Kus. 14:21) Nda ni la si, a lingbi azo so e manda Bible na ala abungbi na kongregation. Kota kamba ayeke na popo ti guengo na li ni ti ala na lege ti yingo na yekiango ndo ti ala so alondo na bê teti bungbi ti aChrétien.
2 Tongana Nyen ti Sala Ni: Tâ na tongo nda ni, mu wango lakue na wamandango ye ti gue na abungbi ti kongregation. (aHéb. 10:24, 25) Fa tongana nyen abungbi so ayeke kpengba ande mabe ti lo, ayeke mu maboko na lo ti sala ye so bê ti Nzapa aye, nga a yeke mu lege na lo ti duti na anzoni kamarade so aye nga ti gonda Jéhovah. (Ps. 27:13; 32:8; 35:18) Atene ti mo ti ndoye nga na bango na nene ni kongregation na abungbi ayeke mu ande wâ na nzala ti lo ti gue dä.
3 Afini zo ayeke na bezoin ti hinga so bungbi ti Jéhovah ayeke mbeni songo ti aita ti amara kue. Fa na ala akasete-vidéo Les Témoins de Jéhovah: un nom, une organisation nga Our Whole Association of Brothers. Mu maboko na ala ti ba na nene ni so na ndo sese kue Jéhovah ayeke sala kusala na azo kutu mingi so amu tele ti ala na lo ti sala ye so bê ti lo aye. Zia lege na afini zo ti hinga so a tisa ala nga ti sala na Nzapa.—Es. 2:2, 3.
4 A yeke mu kota ngia mingi ti ba mbeni wamandango Bible so aga tâ disciple ti Jésus. So ayeke ye so e zia na gbele e ti wara!—3 Jean 4.