Mu Maboko na Ambeni Zo ti Ga na Abungbi
1 “A tisa na wâ andeko kue so ayeke ndulu na e . . . na so aye ti ga na abungbi ti sala tongaso.” Ngbele ye so a sala tokua so na yâ ti numéro ti Le Phare de la Tour de Sion ti novembre ngu 1880 (Angl.), aTémoin ti Jéhovah ayeke tisa azo na wâ ti bungbi oko na ala ti wara fango ye so alondo na yâ ti Bible. (Apoc. 22:17) So ayeke mbeni kota mbage ti tâ vorongo.
2 A yeke kota ye ti ga na abungbi: E yeke wara adeba nzoni tongana e bungbi legeoko na kongrégation. E yeke hinga nzoni ahon Jéhovah, kota Nzapa ti e. Na yâ ti kongrégation, e bungbi legeoko ti tene ‘Jéhovah afa ye na e.’ (Es. 54:13, NW) Bungbi ti lo amu mbeni kapa ti fango ye na ndo Bible so angbâ lakue ti gue na li ni na so agboto e ndulu na lo na amu nzoni mungo maboko na salango ye alingbi na “wango-tene kue ti Nzapa.” (Kus. 20:27; Luc 12:42) Abungbi afa na zo oko oko kode ti fango Tene ti Nzapa. Adango bê so alondo na Mbeti ti Nzapa amu maboko na e ti duti na anzoni songo na azo nga na Jéhovah mveni. Ti bungbi na azo so andoye Nzapa akpengba mabe ti e.—aRom. 1:11, 12.
3 Tisa zo ni polele: Gi na kozo mandango ye ni, tisa wamandango Bible oko oko ti ga na abungbi. Zingo nzala ti lo na fango na lo mbeni tene so akpengba mo na bungbi so ahon nga na bingo bê na ndo mbeni tene so a yeke sala ande lisoro na ndo ni na bungbi ti peko. Sala na lo tene ti Da ti Royaume, na ba so lo hinga nzoni tongana nyen ti wara ndo ni.
4 Tongana mbeni wamandango ye ague fade fade na bungbi pepe, ngbâ ti tisa lo. Mu akete penze-ngbonga yenga oko oko ti fa na lo tongana nyen bungbi ti e ayeke tambela. Sala kusala na brochure Les Témoins de Jéhovah-Unis nga na kasete vidéo Les Témoins de Jéhovah—Un nom, une organisation ti tene lo hinga e nga na abungbi ti e nzoni. Sigigi na ambeni wafango tene si wamandango ye ni ahinga ala. Na yâ ti sambela, kiri singila na Jéhovah teti bungbi ni na sala tene na ndo nene ni ti tene wamandango ye ni aga na yâ ni.
5 Ku pepe ti mu maboko na afini zo so asala nzala ti tene ni ti bungbi legeoko na e. Na ngoi so bê ti kiri singila ti ala teti Jéhovah akono, a yeke pusu ande ala ti sala ye alingbi na ye so ala manda na ti ga mbage ti bungbi ti Nzapa so ayeke na beoko.—1 aCor. 14:25.