(A londo na km10/01 ti Bê na Do ti Afrika)
Bible Atene Nyen na ndo Hiringo Ye?
1 Na yâ akodoro ti Tö, hiringo ye ayeke mbeni salango ye so aninga mingi. Tene so asala si a yeke biani ye ti dongo bê ti ba so na ndo oko pepe na yâ Mbeti ti Nzapa so a sala na yanga ti Hébreu a fa so azo ti mara ti Israël ahiri ye wala so hiringo ye ayeke la ni mbeni kpale teti ala a to nda ni na ngoi so mara ni aba gigi ti si na ngoi so a gue na ala na ngba na Babylone. Na ngoi so ala yeke sigigi na Égypte nga na gbe ti ngba na yâ kodoro so, azo ti Israël ‘ahunda azo ti Égypte na bijou ti argent, na bijou ti lor, na bongo; . . . ala kamata ye ti azo ti Égypte.’ (Ex. 12:35, 36) Ye oko, ye so ague la ni oko na komandema nga na prophétie ti Nzapa, na biani a ba ni tongana lege ti futa angu mingi so ala sala kusala ti ngba nga teti aye ti kirikiri so azo ti Égypte asala na ala. (Ex. 3:21, 22; Deut. 15:12-15) A duti la ni pepe mbeni tapande ti hiringo ye.
2 A wara awaziba, awazin, na azo ti kobela na popo ti azo ti hiringo ye so asala tene ti ala na ngoi ti Jésus na ti abazengele. Ophtalmie (mbeni kobela ti lê so angbâ lakue ti mu ndo na Proche-Orient) ayeke peut-être na gunda ti bubango ti lê ti ambeni zo so. (Marc 10:46-49; Luc 16:20, 22; 18:35-43; Jean 9:1-8; Kus. 3:2-10) Legeoko tongana azo ti hiringo ye ti ngoi ti e, fani mingi ala luti na ando so azo atambela dä mingi wala ndulu na ando so azo mingi ayeke gue dä, ando tongana temple. Atä so azo aba na nene ni mungo pata na azo ti mawa, a ba azo ti hiringo ye na nzoni lê pepe, na ye so asala si wabatango ye na yâ toli ti Jésus atene, ‘Mbi yeke na kamela ti hiri ye.’—Luc 16:3.
3 Atä so Jésus na abazengele ti lo afa nzobe na mbage ti azo ti hiringo ye, ala wa pepe hiringo ye; même si ala yeda na bê ti kiri singila na atisango ndo, ala hiri ye pepe. Jésus atene na azo so amu peko ti lo gi ti wara mapa si ala lingbi bi bê, pepe na ‘kobe so fade afuti, me na kobe so angbâ teti fini ti lakue lakue.’ (Jean 6:26, 27) Pierre atene na mbeni wazin so ahiri ye na temple: “Mbi yeke na argent wala lor pepe; me ye so ayeke na mbi, mbi mu na mo,” na lo sala kusala na amatabisi ti lo ti yingo ti sava koli ni. (Kus. 3:6) Atä so ngoi na ngoi nzala asala ala, ala yeke na da pepe, bongo atia ala, abazengele asala kusala ngangu, ala ‘sala kusala na maboko ti ala mveni, bï na lâ, si ala ga tongana kungba na ndo ambeni zo pepe.’ (1 aCor. 4:11, 12; 1 aThes. 2:9) Kpengba-ndia na popo ti aChrétien ayeke la ni: “Tongana mbeni zo aye ti sala kusala pepe, zia lo te kobe pepe.”—2 aThes. 3:10-12.