Atënë so i hunda
◼ Tongana nyen a lingbi e sala akusala kue ti kongregation?
Nzoni tambelango ti aye na yâ mbeni kongregation ti awakua ti Jéhovah ayeke ndali ti angangu so azo abungbi ni (1 aCor. 14:33, 40). Bâ aye kue so a hunda ti sala ni gi teti mbeni bungbi ti kongregation oko senge. Nde na kapa ni lo mveni, kusala nde nde ayeke mingi so aita-koli na aita-wali ayeke sala kozoni nga na hunzingo ti bungbi. Ambeni kusala ni so a yeke sala ni me so azo ayeke bâ ni na lê pëpe ayeke nga na nene ni. Tongana nyen zo oko oko alingbi ti mû maboko na yâ lekengo ye so?
Duti ndulu ti mû maboko. Ala so ayeke ndulu ti sala ye, fade ala yeke wara ye mingi ti sala (Ps. 110:3). Bi bê na ndo ti ala so ayeke na kobela na aga mbakoro. Mû maboko na lekengo yâ ti Da ti Royaume si a duti na saleté pëpe. E lingbi ti sala akusala ti nzoni mingi sân ti tene a hunda ni na e. A hunda na e ti duti gi na nzara ti mû maboko.
Sala kusala na bango tele ti mo kete. Azo so asala tele ti ala kete ayeke na ngia ti sala ye teti amba ti ala (Luc 9:48). Ti sala tele ti e kete ayeke gbanzi e ande ti yeda na akusala mingi ahon ti so ngangu ti e amû lege na e ti sala. Na ndo ni, a yeke bata e ti sala ye ahon ndo ni pëpe na ngangu so e yeke na ni.—aProv. 11:2.
Duti zo so a lingbi ti zia bê na lo. A wa ândö Moïse ti soro “azo ti tene-biani [“so a lingbi ti zia bê na ala”, NW ]” ti yô akungba na yâ Israël ti giriri (Ex. 18:21). A hunda nga mara ti salango ye so laso. Mû bê ti mo kue na kusala so a mû na mo ti sala (Luc 16:10). Tongana mo lingbi pëpe ti sala mbeni kua so a mû na mo, leke ye kue so alingbi ti tene a wara mbeni zo ti sala ni na place ti mo tongana mo yeke dä pëpe.
Sala ye kue so mo lingbi ti sala. A wa aChrétien ti mû bê ti ala kue na kua, même tongana a yeke kua ti nginza (aCol. 3:22-24). Mbeni kota nda ti tënë ayeke dä ti sala ni tongana a yeke ti maï tâ vorongo. Même tongana kua ni akpa gi mbeni mbumbuse ye, a yeke duti mbeni ye ti deba nzoni teti kongregation tongana a sala ni nzoni.
Kusala kue so a hunda na e ti sala amû na e lege ti fa ndoye ti e teti Jéhovah nga teti aita ti e (Mat. 22:37-39). Zia e sala na bê ti e kue akusala kue so a hunda na e ti sala.