E lingbi ti sala mbeni ye ti mû maboko?
1 “E lingbi ti sala mbeni ye ti mû maboko?” So ayeke hundango tënë so e yeke mä ka mingi na yanga ti aTémoin ti Jéhovah tongana ala mä so mbeni kpale asi na mbeni kodoro. Mbeti ti Kusala 11:27-30 atene so akozo Chrétien amû maboko na aita ti ala ti Judée ngbanga ti mbeni kota nzara so atï lâ ni kâ.
2 Laso, mama-ndia ti andokua ti e so ndia ayeda na ni amû lege na e ti sala kusala na nginza so a wara ti mû maboko na aita so ye atia ala na so awara ambeni kpale nde nde.
3 Na tapande, na ngu so ahon, aita mingi atokua pata ti mû maboko na aita ti ala so abâ pasi ngbanga ti tsunami, kota ngu so abuba aye mingi na Asie ti Mbongo na afâ gbâ ti azo. A gonda lani mingi ye so aita asala, tongana ala tokua na bê ti ala kue nginza na bungbi ti Jéhovah ti tene a mû maboko na ala so awara kpale ni. Ye oko, na ngoi so ambeni ita atokua nginza ni, ala yeke fa kozoni ye so ala ye si bungbi asala na ni. Teti so ndia ti ambeni kodoro ahunda ti tene a sala kusala na nginza ni alingbi gi na ye so bê ti zo so amû ni aye, nga na yâ ti mbeni ngoi so adiko, a lingbi bungbi amû peko ti ndia so atâa so aita so ayeke na yâ ti kpale ni awara aye so atia ala awe.
4 Tongaso, a hunda na aita so aye ti tokua mbeni pata ti mû maboko na ala so awara kpale ti bi ni tongana offrande teti kusala ti fango tënë na ndo sese kue. A yeke mû nginza so ti mû maboko na ala so awara kpale na lege ti mitele nga ti mû maboko na aita kue ti wara aye ti yingo so atia ala. Tongana mbeni zo aye lakue ti mû mbeni pata gi teti kusala ti mungo maboko na aita so awara kpale, fade bungbi ti Jéhovah ayeke yeda na ni na a yeke sala kusala na ni na ndo kue so kpale ayeke dä. Me, a yeke duti nzoni mingi tongana aita afa kozoni pëpe na ndo wa nga ye wa ala ye si asala na a-offrande so ala mû.
5 A yeke nzoni ti mû nginza ni tongana mbeni offrande teti kusala ti fango tënë na ndo sese kue. Salango tongaso ayeke mû lege na bungbi ni ti wara na ndo oko mbeni wungo ti nginza so alingbi ti sala na aye nde nde so andu kusala ti Royaume ahon ti bata ni nde gi ti ku na mbeni kpale so alingbi ti si ande. Na ngoi so e yeke sala kua maboko na maboko ti mû ye so alingbi ti tene “Tele ni mveni amaï na akpengba na yâ ndoye”, e yeke sala ye alingbi na wango so e wara na mbeti ti aEphésien 4:16.