Ye so fango tënë ti e ayeke sala
1. Jéhovah ayeke bâ kusala ti fango tënë ti e tongana nyen? Na salango ye ti azo na mbage ni ayeke tongana nyen?
1 Mbeti ti Nzapa afa aChrétien na tambelango ni na ngia na yâ kusala ti Jéhovah, mo bâ mo tene azo so ayeke kiri na ngia na peko ti mbeni songo benda (2 aCor. 2:14-16). Na ngoi so e yeke fa hingango ye ti Nzapa na azo, kusala ti e ayeke tongana yombo so afun nzoni na hon ti Jéhovah. Nzoni fion ti nzo tënë ayeke gboto ambeni zo; ti ambeni, ala ke ni. Me atâa so mingi ti azo ake tënë ni, a ye ti tene pëpe so kusala ti e alë lengo pëpe. Zia e bâ ye so fango tënë ti e ayeke sala.
2. Kusala ti e ti fango tënë amû lege na e ti fa nyen na gigi?
2 A yeke sepela Jéhovah: Satan atene so azo ayeke sala na Jéhovah gi ngbanga ti so ala yeke wara ye na mbage ti lo (Job 1:9-11). Kusala ti fango tënë amû lege na e aChrétien ti fa na gigi so a yeke tâ na bê ti e kue si e mû tele ti e na Nzapa. Awafango tënë mingi angbâ ti sala ye alingbi na komandema so a mû ti fa tënë na ti sala adisciple atâa aye ti ngangu so asi na ala oko oko, wala so mingi ti azo asala nzara ti mä ala pëpe. So ala ngbâ lakue ti gbu ngangu tongaso amû ngia na bê ti Jéhovah!—aProv. 27:11.
3. Ngbanga ti nyen a yeke tâ kota ye mingi teti e ti ngbâ ti fa iri ti Nzapa na aye so lo leke ti sala?
3 Fango tënë ti e ayeke sala nga mbeni ye na yâ gango tâ tënë ti ye so Nzapa aleke ti sala. Tongana Jéhovah ayeke sala tënë na ndo futingo ti sese ti Satan so ayeke ndulu ti si, lo tene: “Fade amara ahinga Mbi yeke L’Eternel.” (Ezéch. 39:7). Ti tene amara ahinga ye so, a yeke kota ye ti tene awakua ti Nzapa angbâ lakue ti fa iri ti lo na aye so lo leke ti sala na “amara kue, akete mara kue, azo ti yanga nde nde kue, na azo nde nde kue”.—Apoc. 14:6, 7.
4. Fa tongana nyen fango tënë amû lege na Nzapa ti fâ ngbanga.
4 A yeke mû lege ti fâ ngbanga: Fango nzo tënë amû nga lege ti fâ ngbanga. Bazengele Paul atene so Jésus Christ ayeke futa kula ande na “azo so ahinga Nzapa pëpe, na ala so ake ti mä Tene-nzoni ti Seigneur ti e Jésus.” (2 aThes. 1:8, 9). Fade a yeke fâ ngbanga ti azo alingbi na salango ye ti ala na mbage ti nzo tënë. So azia tâ nene kungba biani na li ti awakua ti Nzapa! Ti tene ngbanga ti mênë aduti na li ti e pëpe, a lingbi e gbanzi tele ti e pëpe ti fa tënë ti Royaume so asö fini ti azo.—Kus. 20:26, 27.
5. E yeke fa be-nzoni ti Nzapa tongana nyen na yâ kusala ti e ti fango tënë?
5 Angangu so e yeke sala lakue ti mû maboko na amba ti e ti nzere na lê ti Nzapa ayeke fä ti be-nzoni ti Jéhovah (1 Tim. 2:3, 4). Teti e hinga so dutingo ti azo ayeke gbian lakue, e yeke ngbâ lakue ti gue na mbage ti ala na ti wa ala ti gi Jéhovah tongana ngoi angbâ. Na salango tongaso, e yeke mû peko ti salango ye ti “Nzapa ti e [so] ayeke na be-nzoni” na so ‘aye mbeni zo oko akui pëpe, me Lo ye azo kue achangé bê ti ala.’—Luc 1:78; 2 Pi. 3:9.
6. Aye ti nzoni wa e yeke wara tongana e yeke na ye mingi ti sala na yâ kusala ti Jéhovah?
6 E mveni e yeke wara nzoni dä: Ti duti lakue na ye mingi ti sala na yâ kusala ti Jéhovah ayeke bata e. A mû maboko na e ti “sala si lâ [ti Jéhovah] aga fade” so ti tene ti girisa lâ ti Jéhovah pëpe. A mû nga maboko na e ti bata tele ti e si e ga sioni pëpe na lege ti sioni sese ti fadeso (2 Pi. 3:11-14; Tite 2:11, 12). Ni la, zia e ‘duti kpô, e zia ye ayengi i pëpe, e wu na kusala ti Seigneur lakue’ teti e hinga so angangu so e yeke sala na yâ kusala ti fango tënë ayeke senge pëpe.—1 aCor. 15:58.