Kusala ti e ti fango tënë afa be-nzoni so e yeke na ni
1 Jésus abâ lani so “ye nde nde agi” azo gbani gbani so amä tënë ti lo, “na ala kangbi kirikiri tongana angasangbaga so ayeke na berger pëpe.” (Mat. 9:36). Na nzobe nga na ndoye, lo fa na ala aye so Jéhovah ahunda, lo dë bê ti ala nga lo sara be-nzoni na ala na mungo na ala aye so atia ala na lege ti yingo. Na ngoi so e yeke gbu li ti e na ndo asarango ye ti Jésus, e yeke to nda ti bi bê ti e tongana ti lo nga ti zia si aye andu bê ti e tongana ti so a ndu ândö bê ti lo. Ye so ayeke sara si e yeke fa ande be-nzoni na azo na ngoi so e yeke fa tënë na ala.
2 Gbu li ti mo kete ti bâ tongana nyen Jésus asara ye lani na azo so apusu nduru na tere ti lo ti tene lo mû maboko na ala (Luc 5:12, 13; 8:43-48). Lo bi bê ti lo lani na azo so dutingo ti ala ayeke tâ nde mingi (Marc 7:31-35). Lo hinga ye so agbu bê ti ala nga lo fa so tënë ni andu nga bê ti lo. Lo bâ gi azo ni pëpe me lo bâ ye so ayeke na yâ ti bê ti ala (Luc 7:36-40). Biani, Jésus afa nzoni mingi be-nzoni so Nzapa ti e ayeke na ni.
3 “Lo ye ti sara be-nzoni”: Jésus afa tënë gi pëpe ngbanga ti so a hunda na lo ti sara tongaso, me “lo ye ti sara be-nzoni” na azo (Marc 6:34). E nga kue laso, e yeke fa gi tënë pëpe, me e yeke gi ti sö fini ti azo, fini so ayeke ye ti ngere ngangu. E gi ti hinga nzoni nda ni so azo ayeke sara ambeni ye tongana e yeke fa tënë na ala. Ala yeke gi bê ti ala ngbanga ti nyen? Ndali ti nyen si li ti ala ayeke pëpe na ndo ti ye so e yeke fa? A yeke ngbanga ti so aberger ti vorongo nzapa ti wataka ahanda ala? Wala ngbanga ti so ala bâ lege ti ala nzoni pëpe? Tongana e bi bê ti e biani na azo, ye so alingbi ti pusu ala ti mä nzo tënë so e yeke fa na ala.—2 aCor. 6:4, 6.
4 Tongana e fa be-nzoni na azo, a yeke ndu bê ti ala. Bâ na tapande mbeni wali so bébé ti lo ti nze ota akui. Ye so azia vundu mingi na bê ti lo. Tongana aTémoin use aga na da ti lo, lo hunda ala ti lï ngbanga ti so lo leke na bê ti lo ti fa na ala so a yeke na lege ni pëpe ti tene Nzapa azia lege na pasi. Ye oko, na pekoni wali ni atene: “Ala mä mbi na bê ti ala kue si, na ngoi so ala ye ti hon, bê ti mbi adë nzoni na mbi yeda ti tene ala ga ti peko.” Mo yeke sara kue ti fa be-nzoni na azo kue so mo yeke tingbi na ala na fango tënë?
5 Tongana e fa lakue be-nzoni na azo, a yeke mû maboko na e ti dë bê ti ala. Tongana e sara tongaso, e yeke mû gonda na Jéhovah, “Babâ ti be-nzoni”.—2 aCor. 1:3.