Atënë so i hunda
◼ “Ngbâ be-ta-zo na ti ndara” ayeda na bungbi ti ambeni Témoin ti Jéhovah so awara tere na ndo oko ti gi nda ti ye na yâ Mbeti ti Nzapa wala ti pika patara na ndo ni?—Mat. 24:45, 47, MN.
Ên-ën. Ye oko, na ando nde nde, mbeni kete wungo ti azo na yâ ti bungbi ti e azia na sese akundu ti ala mveni ti gi nda ti atënë so ague oko na Bible. Ambeni amanda ala mveni yanga ti Hébreu na ti Grec so a sû na Bible ti bâ wala a kiri peko ti Traduction du monde nouveau na lege ni. Ambeni agi nda ti aye so andu senda-ye so Mbeti ti Nzapa asara tënë ni. Ala zia na ndo Internet ambeni place na ambeni kode ti sara lisoro na popo ti ala ti tene ala kangbi bibe ti ala. Ala sara abungbi nga ala sigigi na ambeti ti fa aye so ala wara, ti zia na tere ti aye so a fa na bungbi ti e ti aChrétien nga na lege ti ambeti ti e.
Na ndo sese kue, mara ti Jéhovah ayeke wara fango ye mingi na lege ti yingo nga na wango na ngoi ti abungbi ti kongregation, akota bungbi nga na lege ti ambeti so bungbi ti Jéhovah asara. Na gbe ti fango lege ti yingo vulu ti lo nga na lege ti Tënë ti lo so ayeke tâ tënë, Jéhovah amû ye so atia mara ti lo, tongaso ala lingbi “duti na bibe oko na tënë oko” na ala “kpengba na yâ mabe”. (1 aCor. 1:10; aCol. 2:6, 7). Biani e kiri singila mingi teti gbâ ti kobe ti yingo so Jéhovah amû na e na ngoi ti lâ ti nda ni so. Tongaso, ambeti, abungbi, wala aye so a zia na ndo Internet so “ngbâ be-ta-zo na ti ndara” abâ ndo na ndo ni pëpe, lo yeda na ni pëpe.—Mat. 24:45-47.
A yeke ye ti gonda ti tene azo asara kusala na hingango ndo ti ala ti mû maboko na nzo tënë. Me, a lingbi ye so mbeni zo agi ndali ti aye so agbu bê ti lo mveni ague nde pëpe na ye so Jésus Christ ayeke sara na ndembe so na lege ti kongregation ti lo na ndo ti sese. Na ngoi ti akozo Chrétien, bazengele Paul agboto mê na ndo mungo ngoi mingi ti gbu li na ndo atënë nde nde, nga na “ambeso so nda ti tënë ni ayeke pëpe, teti tënë so ayeke lege ti gaba, me a fa pëpe lege ti kusala ti Nzapa so ayeke na mabe.” (1 Tim. 1:3-7). A lingbi aChrétien kue agi ti “ke hundango buba tënë, na tënë ti ambeso, na papa, na papa tënë ti Ndia; teti azo awara ye na yâ ye so pëpe, na ye so ayeke ye senge.”—Tite 3:9.
Ti azo so aye ti manda na ti gi nda ti atënë mingi na yâ ti Bible, e hunda ti tene ala gi ye na yâ Étude perspicace des Écritures, “Toute Écriture est inspirée de Dieu et utile”, nga na ambeni mbeti ti e, tongana ati so asara tënë ti aprophétie ti mbeti ti Daniel, ti Ésaïe na ti Apocalypse. Ambeti so afa aye mingi ti manda na Mbeti ti Nzapa na ti tene e gbu li ti e, tongaso e lingbi ti ‘hinga biani ye so [Nzapa] aye na lege ti ndara kue ti yingo na ti hingango nda ti ye, si e tambela na lege so alingbi na Seigneur, ti mû ngia na Lo na yâ ye kue, si e lë na kusala ti nzoni kue, na e wu na lege ti hinga Nzapa.’—aCol. 1:9, 10.