Jéhovah ayeke fa na e tongana nyen ti sara kua so
1. Tongana Jéhovah amû mbeni kua na zo, lo yeke sara nyen nga?
1 Tongana Jéhovah amû mbeni kua na azo, lo yeke fa nga na ala tongana nyen ti sara ni. Na tapande, na ngoi so Jéhovah atene na Noé ti leke mbeni arche, mbeni ye so Noé ade asara lâ oko pëpe, Jéhovah afa na lo tongana nyen ti sara ni (Gen. 6:14-16). Na ngoi so Jéhovah atene na Moïse, berger so asara tere ti lo kete, ti gue ti sara tënë na ambakoro-koli ti Israël nga na Pharaon, Jéhovah adê bê ti lo, lo tene: “Fade Mbi yeke na yanga ti mo ti fa na mo ye so alingbi mo tene.” (Ex. 4:12). Tongana a ndu kua ti e ti fango nzoni tënë, Jéhovah ayeke zia e gi tongaso pëpe. Lo yeke fa na e tongana nyen ti sara kua so na lege ti Ekole ti Kusala ti aChrétien nga na Bungbi ti Kusala. E lingbi ti wara ye ti nzoni na lege ti fango ye ni so tongana nyen?
2. E yeke wara nzoni na lege ti Ekole ti Kusala ti aChrétien tongana nyen?
2 Ekole ti Kusala ti aChrétien: Yenga oko oko leke ambage ti bungbi so kozo ni si mo gue na bungbi. Kâ, tongana mo yeke bâ lege so a-élève ni ayeke zi na nda ti ambage ni so, mo yeke kiri ti gbu nda ti kode ti fango ye pendere (aProv. 27:17). Ga na ti mo buku ti Ekole ti Kusala ni nga mû anote na yâ ni. Na ngoi so surveillant ti ekole ni ayeke sara kua na ni na peko ti devoir ti a-élève oko oko, sû kamba na gbe ti akota tënë so mo ye ti sara kua na ni, nga sû mbeti na aplace so a zia ni senge na yanga ti buku ni. Ye oko, nzoni lege ti wara nzoni na lege ti ekole so ayeke ti mû mbage dä. Mo zia iri ti mo na ekole ni awe? Tongana mo wara mbeni devoir, leke ni nzoni nga sara ye alingbi na wango so a mû na mo. Na ngoi so mo yeke na fango tënë, sara kusala na ye so mo manda.
3. Nyen la ayeke mû maboko na e ti wara nzoni na lege ti Bungbi ti Kusala?
3 Bungbi ti Kusala: Ye so ayeke mû lege na e ti bata nzoni mingi na li ti e aye so a fa na ngoi ti bungbi a yeke ti manda ni kozo nga ti leke tere ti mû commentaire. Tongana acommentaire ti e ayeke nduru, aita mingi ayeke wara lege ti mû ti ti ala nga. Bâ adémonstration nzoni, nga sara kusala na aye so mo bâ alingbi ti sara si fango tënë ti mo alë lengo nzoni. Bata a-article ti Kusala ti Royaume so alingbi ti mû maboko na mo ande na fango tënë.
4. Ngbanga ti nyen a yeke nzoni e sara kua nzoni na aye so a yeke fa na e na bungbi?
4 Legeoko tongana ti akua so Jéhovah amû lani na Noé nga na Moïse, kua ti e ti fango nzoni tënë na ndo ti sese kue ayeke kete kua pëpe (Mat. 24:14). E lingbi ti sara nzoni kua gi tongana e zia bê ti e na ndo ti Jéhovah, Maître ti e, nga tongana e yeke sara kua nzoni na aye so lo yeke fa na e.—És. 30:20.