Mbeni ekole so aleke e teti akpengba kusala

¹ Azo ayeke gue na ekole ti wara hingango ye so ayeke mû ande maboko na ala ti wara aye so ala aye na yâ fini. Me, ye nyen alingbi ti duti kota mingi ahon gondango tâ Wamungo fini, nga mungo maboko na ambeni zo ti manda ye na ndo aye so lo leke ti sala, nga alege ti lo? Ye oko pëpe. Ye so Ekole ti Kusala ti aChrétien agi ayeke ti leke e nzoni ti fa mabe ti e na ambeni zo. Ni la, tongana e yeke gue na ekole ni yenga oko oko, e yeke wara akode so aleke e teti akpengba kusala.

² A yeke wara na yâ Kusala ti Royaume ti nze so ahon “Mbeti-kapa ti Ekole ti Kusala ti aChrétien ti ngu 2003”. Mbeti-kapa ni afa anzene nzene tënë na ndo lege so a yeke sala ande na ekole ni. Peut-être a yeke duti ande nzoni ti bata mbeti-kapa ni na yâ buku ti mo Wara nzoni na lege ti Ekole ti Kusala ti aChrétien, so a lingbi mo gue na ni na Ekole ni yenga oko oko. Bâ ambeni mbage ti Ekole ti Kusala ti aChrétien ti ngu 2003.

³ Kode ti salango tënë: A to nda ni na nze ti janvier, fade a yeke komanse Ekole ti Kusala ti aChrétien oko oko na mbeni diskur ti apenze-ngbonga oku na ndo kode ti salango tënë wala na ndo mbeni mbage ti dikongo mbeti, mandango ye, wala fango ye. Fade surveillant ti ekole ayeke sala adiskur ti tongo nda ni so, wala lo lingbi ti mû ni na mbeni ancien so alingbi, ti sala ni. Wamungo diskur ni alingbi ti fa nda ti kode ti salango tënë nga nene ni. Na pekoni, a lingbi lo zi yâ ti diskur ni na salango lisoro na ndo atapande ti Bible, nga na fango na gigi lege ti sala kusala na kode ti salango tënë, na gbotongo lê mbilimbili na ndo tongana nyen salango ye tongaso alingbi ti maï kusala ti e ti fango tënë.

⁴ Devoir 1: A yeke wa aita so ayeke mû diskur ti wango ti “gboto lê na ndo ye ti nzoni ti atënë so ayeke sala lisoro na ndo ni”. Ye so aye ti tene ti fa na kongregation lege ti sala kusala na tënë ni. Tongana mo wara mara ti devoir tongaso, bâ alembeti 48-49 ti buku Ekole ti Kusala ti wara awango na ndo lege ti leke ni, na gi na yâ index ti buku ni, na gbe ti tënë “So alingbi”, alembeti so a tokua zo dä ti manda ambeni ye.

⁵ Programme ti dikongo Bible: Tongana, na yâ ti angu so ahon, mo wara lege pëpe ti mû peko ti dikongo Bible yenga oko oko, ngbanga ti nyen mo leke na bê pëpe ti sala ni na programme ti ngu so? Ala so asala tongaso ayeke hunzi ande mbage ti Mbeti ti Nzapa so aChrétien asû na yanga ti Grec na hunzingo ti ngu ni. A yeke bâ na yâ buku Ekole ti Kusala na lembeti 10, paragraphe 4, aye ti nzoni ti komanse programme ti dikongo Bible na use mbage ti Bible.

⁶ Angbongboro tënë ti dikongo Bible: A gboto yâ ti mbage so na apenze-ngbonga bale-oko si azo kue so aga alingbi ti sala tënë na ndo achapitre so a mû ni teti yenga ni. A lingbi aita so a mû na ala devoir so asala ni na yâ ngoi so a hunda. Fade a yeke sala ni ande yenga oko oko, même na yenga ti lisoro ti dango bê kue. Na ngoi so mo yeke diko achapitre so a mû ni, gi angbongboro tënë so fade ayeke ga na nzoni na mo na yâ mandango ye na sewa ti mo, na yâ fango tënë ti mo, wala na yâ fini ti mo. Alengo ti Jéhovah wa afa ni na gigi na yâ salango ye ti lo na mbage ti azo na amara? Ye nyen mo manda so akpengba mabe ti mo na akono bê ti kiri singila ti mo na mbage ti Jéhovah? Duti ndulu ti sala tënë na ndo achapitre so a mû, même na ndo aversê ti Devoir 2, teti so ita so ayeke diko ni ayeke sala ande tënë pëpe na ndo ti aversê ni.

⁷ Devoir 2: Kozo devoir ti élève ti yenga oko oko ayeke duti ande mbeni lege ti tara tele ti diko Bible na gbele azo. Fade a yeke gboto dikongo ye ni kue, nde na ndangba dikongo ye ti nze oko oko, na yâ dikongo Bible ti yenga oko oko. A yeke gboto ande ndangba dikongo ye ti nze ni na yâ Tour ti Ba Ndo. A lingbi élève ni adiko ye ni sân ti tene mbeni kete tënë ti tongo nda ni wala ti kongo nda ni. Na lege so, lo lingbi ti bi lê ti lo mbilimbili na ndo kode ti lo ti dikongo ye.​—1 Tim. 4:13.

⁸ Adevoir 3 na 4: Ti ambeni ti adevoir so, aye ti sala na kusala ni ayeke mingi ni na yâ buku Comment raisonner ahon atanga ni; ambeni nde ayeke gi na li ti tënë awe. Atâa a mû aye ti sala na kusala mingi pëpe wala gi li ti tënë ni, aita so ayeke sala devoir so ayeke wara ande lege ti zi nda ti fango ye ti ala na gingo nda ti ye na yâ ambeti ti e. Ye so ayeke duti ngangu pëpe na aita-wali ti wara atënë so alingbi na azo so ala yeke sala lisoro na ala.

⁹ Cadre: Tongana ti so a fa na lembeti 45 ti buku Ekole ti Kusala, surveillant ti ekole alingbi ti mû mbeni cadre. Tongana lo sala ni pëpe, aita-wali ni alingbi ti soro na popo ti ambeni so ayeke na lembeti 82. Tongana mbeni ita-wali ayeke sala devoir oko na yâ nze use, acadre 30 so ayeke mû na lo alege nde ti sala devoir na yâ ti angu oku. Tongana aita-wali asoro molongo 30, so iri ni ayeke “Mbeni cadre nde, so alingbi na territoire ti mo”, a lingbi ala sû cadre ni na gbe ti mbeti ti devoir ti ala wala na pekoni (S-89). Fade surveillant ti ekole ayeke sû lango ti devoir ti élève ni na ndo lembeti 82 ti buku ti ita-wali ni, ndulu na tele ti cadre so lo sala na kusala. Lo lingbi ti sala ni na oko ngoi so lo yeke sû ye na yâ mbeti ti wango ti ita ni.

¹⁰ Mbeti ti wango: Mo yeke wara mbeti ti wango ni na yâ buku ti mo. A yeke wara ni na alembeti 79-81. Tongaso, a hunda na mo ande ti mû buku ti mo na surveillant ti ekole na peko ti devoir oko oko so mo sala. A yeke duti ande nzoni ti tene surveillant ti ekole abata awango so a-élève ni ayeke sala kusala na ni.

¹¹ Lisoro ti dango bê: A yeke sala ande dango bê ti Ekole ti Kusala ti aChrétien na ndo mbeti pëpe. Fade a yeke sala ni fani oko na yâ nze use, na a yeke ninga teti apenze-ngbonga 30. Ahundango tënë so a yeke bâ ni na ngoi ti dango bê ni ayeke ngbâ ande ti sigigi na yâ ti Kusala ti Royaume. Tongana yenga so aleke teti lisoro ti dango bê atingbi na yenga ti kota bungbi ti circonscription wala vizite ti surveillant ti circonscription, a lingbi a sala adevoir ti yenga ti peko na ngoi ti vizite ni wala ti kota bungbi ni. A yeke sala lisoro ti dango bê ni na peko ti vizite wala kota bungbi ni.

¹² Ambeni klase: Na yâ akongregation so wungo ti a-élève ni ahon 50, a-ancien alingbi ti bi bê na ndo salango kusala na ambeni klase. “A lingbi ti sala kusala na lekengo ye so teti afango ye ti a-élève kue wala gi teti adevoir 3 na 4.” (Ekole ti Kusala, l. 285). A mû ndangba wango so ti lingbi na bezoin ti akongregation so na yâ ni wungo ti aita-wali ayeke mingi, me aita-koli ti sala devoir ti dikongo ye ayeke mingi pëpe. A lingbi a-ancien asoro aita-koli so alingbi, ti mû li ni na yâ ti aklase so.

¹³ Use wamungo wango: Tongana ti so a fa na yâ mbeti-kapa ti Ekole ti Kusala ti aChrétien, a lingbi bungbi ti a-ancien asoro mbeni use ita ti mû wango, pëpe na lê ti azo, na a-ancien nga na aserviteur ti mungo maboko so asala angbongboro tënë ti dikongo Bible na adiskur ti wango. A yeke nzoni ita so aduti na kode, zo so ambeni ancien alingbi ande ti bâ na nene ni wango so lo yeke mû. A lingbi wango ti lo akpengba zo, na gondango nzoni salango tënë nga na akode ti fango ye, na mungo wango na ndo ye oko wala use so alingbi ti leke yâ ni si aga nzoni. A hunda pëpe ti mû lakue wango na peko ti diskur oko oko ti mbeni ita so ayeke mû mbage fani mingi na ekole ni. Ye oko, a yeke nzoni use wamungo wango abâ yâ ni nzoni na lo hinga so a lingbi même ti mû maboko na aita-koli so ayeke mû akota diskur fadeso ti gue nga na li ni.​—1 Tim. 4:15.

¹⁴ Ye so a gi ti mä: Ye nyen alingbi ti mû maboko na mbeni wamungo wango ti gi nda ti mbeni fango ye? A yeke wara na yâ ota encadré ti mingi ti achapitre 53 ti buku Ekole ti Kusala so azia numéro na tele ni, mbeni ndulu tënë na ndo ye so a yeke nzoni ti gi ti mä. A lingbi surveillant ti ekole abi lê nga na ndo ambeni dango bê wala awango so ayeke na yâ buku ni ti mû maboko na lo ti bâ hio lege so a zi nda ti adevoir ni nzoni, nga nzoni kode so a fa na ni. Na tapande, bâ ambeni molongo ti ahundango tënë na lembeti 55 na nduzu, nga ambeni tënë na yâ ndangba paragraphe na lembeti 163.

¹⁵ Aplace ti sû mbeti dä: Nde na akota place so a zia na yanga ti alembeti ni, buku Ekole ti Kusala ayeke na aplace mingi so a zia ni na mo ti sû mbeti dä na ngoi ti mandango ye ti mo mveni, nga na ngoi so mo yeke gue na Ekole ti Kusala ti aChrétien (Bâ alembeti 77, 92, 165, 243, 246, na 250). Sala kue ti ga na buku ti mo yenga oko oko. Bi lê ti mo dä na ngoi ti diskur ti tongo nda ni. Zia buku ti mo angbâ na zingo ni teti tanga ti ambage ti ekole ni. Sû na mbeti awango so surveillant ti ekole ni ayeke mû. Bi bê na ndo akode ti fango ye, ahundango tënë, atapande, asalango tënë ti ndara, aye so lê alingbi ti bâ, nga akangbi so awamungo diskur azia na popo ti aye. Na mungo anzoni note, fade mo lingbi ti dabe na ni, nga ti sala kusala na agbâ ti aye ti mosoro so mo ro na lege ti ekole ni.

¹⁶ Jésus Christ ahinga lani so fango nzo tënë ti Royaume ti Nzapa ayeke ye ti yekiango zo so ayeke kota ahon atanga ni kue, so alingbi ti mû na mbeni zo. A yeke lani kota kungba ti lo (Marc 1:38). Lo tene: “A yeke ngbanga ti Mbi ti fa Tene-nzoni ti royaume ti Nzapa na ambeni kodoro nga; teti A to Mbi teti tënë so.” (Luc 4:43). Teti e yeda na tisango ndo ti mû peko ti lo, e nga kue e yeke na kusala mingi ti fa nzo tënë. E yeke sala nga ngangu si ngele ti “sacrifice ti merci” ti e aga kota (aHéb. 13:15). Ti sala ni, zia e sala kue ti ga lakue na Ekole ti Kusala ti aChrétien, mbeni ekole so ayeke leke ande e teti akpengba kusala.