Alege oku ti wara mbeni étude

¹ A yeke ngangu na mo ti wara mbeni zo ti manda Bible na lo? Ngbâ lakue ti gi. Jéhovah ayeke iri tënë nzoni na ndo ti azo so angbâ lakue ti sara ye so bê ti lo aye (aGal. 6:9). A fa aye oku na gbe ni ge so alingbi ti mû maboko na mo.

² Hunda azo droit wala ala ye ti manda Bible: Azo mingi ahinga so e yeke mû ka apériodique na azo, me ala hinga pëpe so e yeke manda Bible na azo. Na ngoi so e gue da na da a yeke nzoni ti hunda azo droit wala ala ye ti manda Bible. Mo lingbi nga ti hunda azo so asara nzara ti tënë ni, so mo sara vizite na ala wala ala ye ti manda Bible. Tongana ala ke, mo lingbi ti ngbâ ti zia ambeti na ala nga ti kono nzara ti tënë ni. Mbeni ita-koli ayeke zia ka apériodique na mbeni koli na wali ti lo teti angu mingi. Na peko ti so lo mû na ala ambeni fini périodique, lo ye ti hon me lo gbu li ti lo ngbii na lo hunda ala lo tene: “Ala ye ti manda Bible?” Ala yeda na a yeke ye so lo ku tere ti lo na ni fade ape. Fadeso ala wara batême awe.

³ Hunda na azo so asara nzara ti tâ tënë na so aga na bungbi: Tene pëpe so azo so aga na abungbi ti congrégation ayeke manda Bible awe. Mbeni ita-koli atene so mingi ti a-étude ti ni ayeke azo so aga na abungbi na so ni hunda ala ti manda Bible na ala. Mbeni ita-wali aga nduru na mbeni wali so lo yeke kamene mingi. Amolenge ti lo ti wali awara batême awe na ala yeke lani na yâ ti congrégation ni. A sara angu 15 tongaso awe la lo yeke ga na abungbi nga lo yeke si na Da ti Royaume gi na ngoi so bungbi ayeke to nda ni na lo yeke hon hio tongana bungbi ahunzi. Wali ni ayeda ti sara étude na pekoni lo wara batême. Ita-wali ni atene: “A son mbi mingi so mbi ku angu 15 awe si mbi ga ti hunda lo ti manda Bible na lo so!”

⁴ Hunda na ambeni zo wala na ambeni ita: Mbeni ita-wali asara ngangu ti gue legeoko na ambeni ita so ague ti sara a-étude ti ala. Na hunzingo ti étude ni, lo hunda ita ni ti mû lege na lo ti hunda wamandango Bible ni wala lo hinga ambeni zo so alingbi ti yeda ti manda Bible. Tongana mo mû buku Bible afa na mbeni zo so mo sara vizite na lo, mo lingbi ti hunda lo: “Mo hinga mbeni zo so ayeke yeda ti wara mbeni?” Na ambeni ngoi, ambeni ye asara si awafango tënë wala apionnier alingbi pëpe ti sara étude na mbeni zo so ala wara na yâ ti territoire. Tongaso tene na aita so mo ye ti wara mbeni étude.

⁵ Akoli wala awali ti aita so ayeke aTémoin pëpe: Ambeni ita ayeke dä na yâ ti congrégation ti mo so koli wala wali ti ala ayeke Témoin pëpe? Ambeni koli wala wali so ayeke Témoin pëpe aye pëpe ti sara lisoro na ndo ti Bible na koli wala wali ti ala so ayeke Chrétien, me ala yeke yeda ti sara étude tongana mbeni zo nde ahunda ti sara ni na ala. Mingi ni a yeke nzoni ti bâ ita ni kozo awe si ti hinga nzoni lege ti sara ni.

⁶ Sambela: A lingbi e bâ sambela tongana kete ye pëpe (Jacq. 5:16). Jéhovah amû zendo ti mä e tongana ye so e hunda ague oko na ye so bê ti lo aye (1 Jean 5:14). Mbeni ita-koli so ayeke na kua mingi asambela ti wara mbeni étude. Wali ti lo ahunda tere ti lo atene ita-koli ni ayeke wara ande ngoi ti bâ lege ti mbeni wamandango Bible nzoni la? mbilimbili tongana wamandango Bible ni ayeke na akpale mingi? Lo sara tënë ni na Jéhovah na ngoi so lo sambela ti tene koli ti lo awara mbeni étude. Ayenga use na pekoni tongaso Jéhovah akiri tënë na sambela ti ala na lege so mbeni pionnier ti congrégation ti ala awara mbeni koli so aye ti manda Bible na lo mû étude ni na ita-koli ni. Wali ni atene: “Azo kue so apensé so a yeke ngangu mingi na ala ti manda Bible na mbeni zo, mbi tene na ala: Ala fa kpale ti ala polele na yâ ti sambela, nga ala ngbâ lakue ti sambela ndali ni. E wara ngia mingi ahon ti so mbi pensé fade na ni.” Tongana mo ngbâ ti sara ngangu, mo kue mo lingbi ti wara mbeni étude nga mo yeke wara ngia so zo ayeke wara ti mû maboko na mbeni zo ti tambela na ndo ti “lege so ague na fini”.​—Mat. 7:13, 14.

[Ahundango tënë ti manda na ye]

1. Tongana a yeke ngangu na e ti wara mbeni étude, a lingbi e sara nyen, na ngbanga ti nyen?

2. Tongana nyen la e lingbi ti hunda azo droit ti to nda ti étude?

3. A yeke nzoni ti pensé so azo kue so ayeke ga na abungbi mbeni zo ayeke manda Bible na ala awe? Fa ndani.

4. Tongana nyen la e lingbi ti wara mbeni étude na lege ti ambeni zo wala ambeni ita?

5. Ngbanga ti nyen e lingbi ti hunda akoli wala awali ti aita so ayeke Témoin ape ti hinga wala ala ye ti manda Bible?

6. Sambela alingbi ti mû maboko na e tongana nyen ti wara mbeni étude?