Salango a-étude so ayeke gue na li ni
Mbage mbasambala ni: Sambela na ngoi ti étude ni
1. (a) Ngbanga ti nyen a yeke na lege ni ti to nda ni nga ti hunzi mbeni étude na sambela? (b) Tongana nyen e lingbi ti to nda ti sambela na mbeni wamandango Bible?
1 Deba nzoni ti Jéhovah ayeke kota ye ti mû lege na awamandango Bible ti gue na li ni na lege ti yingo (1 aCor. 3:6). Tongaso, a yeke biani na lege ni ti to nda ni nga ti hunzi mbeni étude so gere ni aluti nzoni na sambela. E lingbi lakue ti sala tongaso gi na kozo salango étude na mbeni zo so aye tënë ti Nzapa mingi. Na ambeni wamandango Bible nde, e lingbi ti bâ mbilimbili ngoi wa alingbi ti tene e to nda ti étude ni na sambela. Mo lingbi ti sala kusala na Psaume 25:4, 5 nga na 1 Jean 5:14 ti mû maboko na wamandango ye ni ti bâ ngbanga ti nyen a lingbi ala sambela, nga sala kusala na Jean 15:16 ti fa nene ti sambela Jéhovah na lege ti Jésus Christ.
2. Tongana mbeni ita-wali ague legeoko na mbeni ita-koli so awara batême awe wala na mbeni koli wafango tënë so ade ti wara batême pëpe ti sala étude, zo wa si ayeke sambela?
2 Zo wa alingbi ti sambela na ngoi ti mbeni étude ti Bible? Tongana mbeni ita-koli so awara batême awe ague legeoko na mbeni ita-wali ti sala mbeni étude, a yeke ita-koli ni si ayeke sambela atâa so a lingbi ti duti ita-wali ni si ayeke sala étude ni na ngoi so lo kanga ye na li ti lo (1 aCor. 11:5, 10). Na mbage, tongana mbeni koli wafango tënë so ade ti wara batême pëpe ague legeoko na mbeni ita-wali ti sala étude, a yeke ita-wali ni si ayeke sambela. Na ngoi ni a lingbi ita-wali ni akanga ye na li ti lo na ngoi so lo yeke sambela nga so lo yeke mû li ni na étude ni.
3. Aye wa a yeke na lege ni ti sala tënë ni na yâ ti asambela na ngoi ti mbeni étude?
3 Aye wa a lingbi a tene na yâ sambela ni?: A lingbi sambela so a yeke sala ni na ngoi ti mbeni mandango Bible ayo pëpe, me a lingbi a fa atënë ti yâ ni polele. Na ndo ti tënë ti hundango mungo maboko ti Nzapa na ngoi ti étude ni nga na kiringo singila teti atâ tënë so ala yeke manda ni, a yeke na lege ni ti gonda Jéhovah tongana Lingu ti fango ye (Es. 54:13). E lingbi nga ti sala atënë so afa na gigi tâ bingo bê ti e na wamandango Bible ni nga kiringo singila ti e na bungbi so Jéhovah asala kusala na ni (1 aThes. 1:2, 3; 2:7, 8). Sambela ti e ti hunda deba nzoni ti Jéhovah na ndo angangu so wamandango ye ni ayeke sala ti sala ye alingbi na aye so lo yeke manda alingbi ti mû maboko na lo ti bâ nene ti dutingo zo ti salango ye alingbi na ye so “Tënë ni afa na [lo]”.—Jacq. 1:22.
4. Ti to nda ni na ti hunzi mbeni étude na lege ti sambela aga na aye ti nzoni wa?
4 Sambela so a yeke sala ni na ngoi ti étude ayeke ga na aye ti nzoni mingi. A yeke ga na zo deba nzoni ti Nzapa (Luc 11:13). A yeke gboto lê na ndo bango na nene ni mandango Tënë ti Nzapa. Teti so wamandango ye ni ayeke dengi mê na asambela ti e, lo yeke manda lege ti sambela (Luc 6:40). Nga, asambela so alondo na bê, so asi singo na ndoye ti Nzapa nga so akiri singila teti asalango ye ti Lo alingbi ti mû maboko na wamandango ye ni ti lë mbeni kpengba songo na Jéhovah.