Maï ti ga nzoni wafango tënë
1. Atapande wa ti ngoi ti Jésus nga na ti akozo Chrétien afa so a lingbi e gi ti ga nzoni wafango tënë?
1 A lingbi aChrétien kue agi ti ga nzoni wafango tënë. Ndani la si Jésus afa lani na adisciple ti lo yeke na yeke akode ti fango tënë (Luc 9:1-5; 10:1-11). A yeke nga ndali ni la si Aquilas na Priscille amû Apollos na tere ti ala, na ala “kiri azi nda ti lege ti Nzapa na lo nzoni mingi ahon ti kozo.” (Kus. 18:24-26). Ndali ti oko raison so, Paul awa lani Timothée, so ahinga kua ti fango tënë nzoni ti ngbâ ti mû bê ti lo kue na fango ye na azo na ti sara si “azo kue abâ maïngo” ti lo (1 Tim. 4:13-15). Atâa a ninga awe la si e yeke sara kua tongana angbâa ti Seigneur na yâ ti kua ti fango tënë, e yeke na bezoin ti ngbâ lakue ti maï akode ti fango ye ti e.
2. Tongana nyen la e lingbi ti manda ye na mbage ti ambeni ita?
2 Manda ye na mbage ti aita: Mbeni lege ti tene e maï akode ti e ayeke ti manda ye na mbage ti aita ti e (aProv. 27:17). Tongaso dengi mê nzoni na ngoi so amba ti mo ayeke fa tënë. Hunda ambeni mbilimbili kode ti fango tënë na aita so ahinga ti fa tënë nzoni, na dengi mê nzoni tongana ala yeke fa na mo kode ni (aProv. 1:5). A yeke ngangu na mo ti kiri ti sara vizite, ti to nda ti étude, wala ti mû mbage na ambeni lege ti fango tënë? Mû li ni ti hunda surveillant ti groupe ti mo wala mbeni ita so ayeke na apendere kode ti fango tënë ti mû maboko na mo. Girisa nga ape so yingo vulu ti Jéhovah alingbi ti sara si mo maï akode ti mo, tongaso hunda ni lakue na yâ ti sambela.—Luc 11:13.
3. A lingbi e sara ye tongana nyen tongana mbeni ita amû na e wango même si e la e hunda ni ape?
3 Tongana mbeni ita amû wango na mo ti tene mo maï akode ti mo, sara ngonzo ape même si mo la mo hunda ni ape (Zo-ti. 7:9). Tongana Apollos, sara tere ti mo kete nga kiri singila ndali ti mungo maboko so mo wara. Sarango tongaso afa so mo yeke zo ti ndara.—aProv. 12:15.
4. Kpengba raison wa Jésus amû ti fa so ayeke kota ye ti tene e maï ti ga nzoni wafango tënë?
4 Ti ga nzoni wafango tënë ayeke mû gonda na Nzapa: Na sarango kua na mbeni tapande, Jésus awa lani adisciple ti lo ti ga anzoni wafango ye. Lo haka tere ti lo na keke ti vigne, na lo haka adisciple ti lo so a soro ala ti gue na yayu na amaboko ti keke ti vigne ni. Lo tene so Babâ ni ayeke leke maboko ni oko oko kue so alë “si a lingbi ti lë mingi.”(Jean 15:2). Legeoko tongana mbeni wa ti yaka ti vigne so aye si amaboko ti keke ti vigne ti lo alë mingi, Jéhovah aye si e nga kue e ngbâ ti maï akode ti e si kua ti fango tënë so ayeke “lengo ti yanga” ti e amaï (aHéb. 13:15). Ye ti nzoni wa ayeke ga na peko ti so e yeke gi ti maï ti ga nzoni wafango tënë? Jésus afa na e kiringo tënë ni, lo tene: “Babâ ti mbi ayeke wara gloire tongana ala ngbâ ti lë mingi.”—Jean 15:8.