Fréquentation—Mbage 3: Eskê e doit ti arrêté ti fréquenté mba?

A sara ambeni temps awe la mo yeke fréquenté mbeni zo, me mo komanse ti duti na adoute na ndö ti lo. Eskê mo doit ti continué ti fréquenté zo ni wala ti arrêté? Article so ayeke aidé mo ti mû desizion.

Na yâ ti article so e yeke bâ:

• Tongana mo yeke na adoute

• Tongana nyen la mo peut ti mû desizion?

• Tongana mo ye ti arrêté fréquentation ni

Tongana mo yeke na adoute

Na peko ti so mbeni maseka-koli na mbeni maseka-wali afréquenté mba teti ambeni ngoi, ala ga ti bâ so abango ndo ti ala ayeke nde nde na ndö ti aye so ala pensé fade na début ni. Na tapande:

• Mbeni aye ti gue na plage, me mbeni aye ti fono ti bâ ndo.

• Mbeni aye ti causé na azo, me mbeni ayeke timide.

• Mbeni ayeke sara ye na handa, me mbeni ayeke sara ye na lege ni.

Asituation so kue ayeke nde nde. Na yâ ti kozo situation ni, aye so agbu bê ti ala ayeke nde nde. Na yâ ti use situation ni, asarango ye ti ala ayeke nde nde. Na yâ ti ota situation ni, bango ndo ti ala na ndö ti nzoni sarango ye ayeke nde nde.

Ti gbu li na ndö ni: Na popo ti aye ota so, so wa la ayeke ngangu na mo ti vivre na ni tongana mo sara ande mariage? Eskê ambeni ye ayeke dä so, ala use kue apeut ti sara achangement dä?

Atâa so asarango ye ti mbeni koli na wali wala aye so agbu bê ti ala ayeke nde nde, ala peut ti duti na ngia na yâ ti mariage ti ala. Na ndö ni, tongana ala yeke mä terê aye ti tene ape so bango ndo ti ala kue ayeke gï oko. Na yâ ti ambeni ye, mbeni koli na wali apeut ti manda ti ye ye so agbu bê ti mba ti lo wala ti bâ nzoni même na lege ti asarango ye ti mba ti lo ni.a

Na mbeni mbage, a yeke kota ye ti tene zo so mo ye ande ti sara mariage na lo aduti na même bango ndo so mo yeke na ni na ndö ti aye so mo mä na bê na ni nga na ndö ti aye so ayeke nzoni wala ayeke sioni. Tongana ayeke tongaso ape, mo doit ti bâ ni tongana mbeni ye so apeut ti mû lege na mo ti arrêté fréquentation ni.

Na tapande, tongana bungbi ti Nzapa ti ala ayeke nde nde. Mbeni mbeti (Fighting for Your Marriage) atene: “Agingo nda ti ye afa so, acouple so bungbi ti Nzapa ti ala ayeke nde nde, mingi ni, ala yeke sara divorce.”

Mama-ndia ti Bible: “Azo so amä na bê pëpe, ala bungbi oko na ala ti sara kua pëpe.”—2 aCorinthien 6:14, Mbeti ti Nzapa, Tënë so amu fini.

Tongana nyen la mo peut ti mû desizion?

Bible atene so ala so asara mariage ayeke “wara ye ti ngangu.” (1 aCorinthien 7:28, La Sainte Bible en Sango). Tongaso, ye so ayeke étonné mo ape tongana mo tingbi na aye ti ngangu na temps so mo yeke fréquenté mbeni zo.

Tongana ala mä terê ape na ndö ti akete kete ye aye ti tene ape so ye ni ayeke marché ape. Question ni ayeke so, eskê ala peut ti leke kpale ni na yâ ti siriri ape? Ala use kue abezoin ti sara aye ni so, tongaso si a-aidé ala ande na temps so ala sara mariage.

Mama-ndia ti Bible: “Ala sara nzoni na mba, ala bâ mawa ti zo mingi, ala pardonné mba na popo ti ala na bê ti ala kue.”—aÉphésien 4:32.

Na mbeni mbage, tongana lakue ala yeke mä terê ape afa so ala use kue apeut ti duti anzoni zo ape ndali ti mba. Tongana ayeke tongaso, a yeke nzoni mo mû desizion na temps ni so ahon ti ku juska na peko ti mariage ni.

Na nduru tënë: Tongana mo yeke na adoute na ndö ti zo so mo fréquenté lo nga mo yeke gi bê ti mo wala mo yeke prêt awe ti sara mariage ni wala pëpe, sara sanka ti adoute ni ape.

Mama-ndia ti Bible: “Zo so lê ti lo ahan abâ kpale, na lo honde terê ti lo, me azo so ahinga ndo mingi pëpe ague gï guengo na lê ni, na ala wara ye ti peko ni.”—aProverbe 22:3.

Tongana mo ye ti arrêté fréquentation ni

Tongana mo arrêté ti fréquenté mbeni zo apeut ti sara mo vundu. Me, tongana mbeni oko na popo ti ala ayeke na adoute mingi na ndö ti songo ti ala ni, peut-être a yeke nzoni ti arrêté fréquentation ni.

Mo yeke arrêté na zo ni tongana nyen? Tongana mbeni nzoni raison ayeke dä ti tene mo arrêté fréquentation ni, a yeke nzoni mo sara ni na lege ti message wala e-mail ape. Nde na so, soro mbeni nzoni ngoi nga na mbeni ndo ti tene mo fa na lo desizion ti mo.

Mama-ndia ti Bible: “Ala tene tâ tënë na mba.”—Zacharie 8:16.

Tongana mo arrêté fréquentation ni, eskê aye ti tene so mo sara mbeni échec la? Ên-ën. Girisa ape so, fréquentation ni adoit ti aidé mo ti mû mbeni desizion, ti sara mariage na zo ni wala pëpe. Même si mo arrêté fréquentation ni, mo peut ti ngbâ ti manda ye na lege ti ye so asi na mo so.

Hunda terê ti mo: ‘Nyen la mbi manda na ndö ti mbi wani na lege ti fréquentation ni so? Eskê ye so asi so afa so mbi bezoin ti sara ambeni ye kozo si mbi duti prêt ti sara mariage? Nyen la mbi peut ti sara tongana mbi kiri mbi fréquenté mbeni zo ande?’