Bira ti Ukraine asara si kpale ti kobe aga pire na yâ ti dunia

Na lango 19 ti mai 2022, Bendo ti gigi so abâ tënë ti nzoni duti ti azo amä akota zo so ahon 75 so atene “kobela ti COVID-19 nga na tënë ti climat asara si warango kobe aga ngangu. Na ndö ni, bira so ayeke na Ukraine akiri asara si kpale ni aga pire na apeut ande ti sara si azo akui nzara na ando nde nde.” Ambeni ngoi na pekoni, mbeni mbeti (Economist) atene so “ndali ti bira ni, dunia ni so ayeke déjà na akpale mingi awe ayeke tï ande na kpale ti kota nzara ahon ti so.” Bible atene kozo awe so mara ti kpale ti kobe so ayeke si na ngoi ti e, nga a yeke aidé e ti gbu ngangu dä.

Bible atene kozo awe so kota nzara ayeke si

•  Jésus atene lani: ‘Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Kota nzara ayeke tï.’—Matthieu 24:7.

•  Mbeti ti Apocalypse asara tënë ti azo ti kpengo na ambarata osio. Oko ti zo ti kpengo na mbarata ni ayeke fä ti bira. Na peko ti lo ayeke zo ti kpengo na mbarata so aduti fä ti kota nzara; a yeke mbeni ngoi so warango kobe ayeke ga ngangu nga ngere ti kobe ayeke ga cher mingi. “Mbi bâ ndo, na mbi bâ vuko mbarata; na lo so aduti na ndo ni ayeke na kilo na maboko ti lo. Na mbi mä ye asara tënë . . . a tene, ‘Kilo oko ti blé teti denier oko, na kilo ota ti orge teti denier oko.’”—Apocalypse 6:5, 6, La Sainte Bible en Sango.

Laso, atënë ti prophétie ti Bible na ndö ti akpale ti kobe so aga tâ tënë, na ngoi so Bible airi ni “lâ ti nda ni.” (2 Timothée 3:1). Ti hinga ye mingi na ndö ti tënë ti “lâ ti nda ni” nga na azo ti kpengo na ambarata osio so mbeti ti Apocalypse asara tënë ni, bâ vidéo Le monde a changé depuis 1914 nga diko article “Azo wa la ayeke na ndö ti ambarata osio so?”

Tongana nyen la Bible apeut ti aidé mo?

•  Na yâ ti Bible mo yeke wara anzoni wango so apeut ti aidé mo ti hon ndö ti angangu kpale, so andu kpale ti ngere ti kobe so aga gï cher wala kpale ti kota nzara. Bâ ambeni tapande ni na yâ ti article “ Comment vivre avec moins. ”

•  Bible amû na e beku so aye ayeke ga ande nzoni. Bible amû zendo ti mbeni ngoi so “alê ti kobe ayeke dü mingi na ndö ti sese” nga azo kue ayeke wara gbâ ti kobe ti te (Psaume 72:16). Ti hinga ye mingi na ndö ti beku so Bible amû ndali ti kekereke nga ndani so mo peut ti sara confiance na ni, diko article “ Une espérance réelle pour des jours meilleurs. ”