Bira nga na changement ti climat asara si kpale ti kobe aga pire na yâ ti dunia: Bible atene nyen na ndö ni?

Bira ti Ukraine nga na changement ti climat asara si warango kobe aga ngangu na yâ ti dunia. Ye so asi mbilimbili na akodro so yere ayeke dä mingi, so azo ni ayeke na kpale ti warango kobe.

“Fango yaka ti alê ti kobe nga na kangbingo ni aga ngangu ndali ti kpale ti bira, changement ti climat, ngere ti courant so aga cher nga na ambeni ye nde.”—António Guterres, UN secretary-general, 17 juillet 2023.
“Awandara atene so Russie ake ti tene a sigi na alê ti kobe ti Ukraine, a yeke sara si kpale ti kobe na yâ ti dunia aga ngangu nga ayeke sara si ngere ti kobe aga cher na yâ ti akodro so ayeke na yâ ti yere, mbilimbili akodro so ayeke na mbage ti Afrique du Nord nga na Asie.”—Atalayar.com, 23 juillet 2023.

Bâ aye so Bible atene na ndö ti kpale ti kobe nga na ye so ayeke si ande.

Bible afa kozo awe tënë ti kpale ti kobe

Jésus afa lani so: ‘Mara ayeke londo na bira na terê ti mbeni mara, na royaume ayeke londo na bira na terê ti mbeni royaume. Kota nzara ayeke tï.’—Matthieu 24:7.
Mbeti ti Apocalypse asara tënë ti azo ti kpengo na ambarata osio. Mbeni oko ti azo ti kpengo na mbarata ni ayeke fä ti bira. Mbeni so amû peko ti lo ayeke fä ti nzara. A yeke mbeni ngoi so kobe ayeke mingi ape nga ayeke kä ni cher. “Mbi bâ ndo si mbi bâ mbeni vuko mbarata asigi. Zo so ayeke duti na ndö ti mbarata ni agbu kilo na maboko ti lo. Mbi mä mbeni go . . . atene: ‘Ngere ti kilo oko ti blé alingbi na nginza ti kua ti lango oko; ngere ti kilo ota ti orge alingbi na nginza ti kua ti lango oko.’”—Apocalypse 6:5, 6, Mbeti ti Nzapa, Tënë so amu fini.

Aprophétie ti Bible na ndö ti kpale ti kobe ayeke ga tâ tënë na mbeni ngoi so Bible airi ni “lâ ti nda ni.” (2 Timothée 3:1). Ti hinga ye mingi na ndö ti “lâ ti nda ni” nga na azo ti kpengo na mbarata osio so ayeke na yâ ti mbeti ti Apocalypse, bâ vidéo Dunia achangé ngbene ye na ngu 1914 ti ga na ni nga diko article “Azo wa la ayeke na ndö ti ambarata osio so?”

Lege so Bible apeut ti aidé

Na yâ ti Bible ayeke wara awango ti ndara so apeut ti aidé azo ti gbu ngangu na yâ ti angoi ti ngangu, so andu ngere ti kobe so aga cher wala même kota nzara. Bâ ambeni tapande ni na yâ ti article Comment vivre avec moins.”
Bible amû nga na e beku so aye ayeke ga ande nzoni. A sara tënë ti ngoi so “alê ti kobe ayeke dü mingi na ndö ti sese” nga zo kue ayeke wara ande gbâ ti kobe ti te (Psaume 72:16). Ti hinga ye mingi na ndö ti beku so nga na ndani so mo peut ti sara confiance na ni, diko article “Une espérance réelle pour des jours meilleurs.”