Tënë ti nzoni duti ti awali:—Bible atene nyen na ndö ni?

“Na temps so mbi ngbâ lani kete, ita ti mbi ti koli ayeke pika mbi nga lo yeke tene atënë ti mbana na mbi lâ oko oko. Na peko ti so mbi sara mariage, kogara ti mbi ti wali la ayeke sara pasi na mbi. Lo na kogara ti mbi ti koli ayeke bâ mbi tongana mbeni ngbâa. Mbi pensé lani ti fâ terê ti mbi.”—Madhu,a na Inde.

Ndokua ti Bendo ti gigi so abâ tënë ti seni (Organisation mondiale de la santé) atene so, “sarango ye ti ngangu na mbage ti awali ayeke mbeni ye so amû yâ ti dunia kue”. Ndokua ni afa so tongana a mû awali ota, oko na popo ni a yeke sara ye ti ngangu na lo wala a lango na lo na ngangu na yâ ti gigi ti lo.

Tongana ye tongaso asi na mo, mo peut ti bâ so na ndo kue so mo gue dä a peut ti tene yanga ti mbana na mo, a pika mo wala a lango na mo na ngangu. Azo ayeke sara mara ti aye ti ngangu nga na aye ti sioni tongaso gï ndali ti so mo yeke mbeni wali, na mo peut ti bâ so mingi ti azo apensé so awali ayeke ye oko ape. Me, eskê Nzapa abâ awali vraiment na nene ni?

Bango ndo ti Nzapa na ndö ti awali ayeke so wa?

Versê ni: ‘Nzapa asara ala koli na wali.’—Genèse 1:27.

Nda ti versê ni: Nzapa la asara akoli nga na awali. Lo bâ ala use kue na nene ni. Na ndö ni, lo ku ti tene mbeni koli ‘andoye wali ti lo legeoko tongana ti so lo ndoye terê ti lo wani,’ me pëpe ti gi ti komande na ndö ti wali ni na ngangu wala ti tene atënë ti mbana na lo (aÉphésien 5:33; aColossien 3:19). A yeke polele so tënë ti nzoni duti ti awali agbu bê ti Nzapa.

“Na temps so mbi ngbâ lani kete, mbeni fami ti mbi alango na mbi na ngangu. Na temps so mbi yeke na ngu 17, patron ti mbi aménacé mbi so tongana lo lango na mbi ape lo yeke zi mbi na kua. Tongana mbi kono awe, koli ti mbi, aparent ti mbi nga na avoizin ti mbi ane mbi ape. Me tongana ngoi ayeke hon, mbi manda ye na ndö ti Jéhovah, b Lo so acréé aye kue. Lo bâ awali na nene ni. Ye so adë bê ti mbi so lo ye mbi nga lo bâ mbi na nene ni.”—Maria, na Argentine.

Nyen la apeut ti aidé mo ti tene mo sentir terê ti mo bien?

Versê ni: “Mbeni kamarade ayeke dä so aye zo ahon ita ti zo ni.”—aProverbe 18:24.

Nda ti versê ni: Mbeni tâ kamarade ayeke aidé mo. Tongana lege ayeke dä, sara tënë ni na mbeni zo so mo yeke na confiance na lo.

“Teti angu 20, mbi tene na zo oko ape so a lango na mbi na ngangu. Ye so asara si mbi yeke na ngia ape nga mbi yeke gi bê ti mbi mingi. Me, na peko ti so mbi fa na mbeni zo ye so asi na mbi nga lo dengi mê lo mä mbi nzoni, a sara si mbi sentir terê ti mbi bien.”—Elif, na Turquie.

Versê ni: “Ala mû agingo bê ti ala kue ala bi ni na ndö ti [Nzapa], ngbanga ti so lo yeke bi bê ti lo na ndö ti ala.”—1 Pierre 5:7.

Nda ti versê ni: Tongana mo yeke sambela, Nzapa ayeke mä mo (Psaume 55:22; 65:2). Ndali ti so lo pensé na mo, lo peut ti aidé mo ti hinga tongana nyen la lo bâ mo na nene ni.

“So mbi manda ye na ndö ti Jéhovah a-aidé mbi ti hon ndö ti kota vundu so asara mbi lani. Fadeso, mbi peut ti sambela Nzapa nga ti fa na lo aye kue so ayeke na yâ ti bê ti mbi. Lo yeke mbeni kamarade so ayeke comprendre asentiment ti mbi.”—Ana, na Bélize

Eskê mbeni lâ Nzapa ayeke hunzi ande sarango ye ti ngangu so a yeke sara na awali?

Versê ni: “Jéhovah . . . azo so babâ ti ala ayeke dä pëpe nga azo so a sara ye ti ngangu na ala, mo yeke fâ ngbanga ti ala na lege ni, si senge zo ti sese azia mbeto na bê ti ala encore ape.”—Psaume 10:​17, 18.

Nda ti versê ni: Fafadeso Nzapa ayeke hunzi ande a-injustice kue, so andu sarango ye ti sioni nga na sarango ye ti ngangu na awali.

“A yeke mbeni ye ti dengo bê ti hinga so na yâ ti kete ngoi, Jéhovah ayeke hunzi sarango ye ti sioni na awali nga na amaseka-wali. Ye so asara si mbi yeke na siriri ti bê.”—Roberta, na Mexique.

Ti hinga ye mingi na ndö ti beku so Bible amû, ndani so mo peut ti sara confiance na azendo ni so nga tongana nyen la aTémoin ti Jéhovah ayeke manda Bible na azo, hunda ti tene a sara vizite na mo.

Téléchargé version imprimé ti article so.