Tongana nyen la Bible apeut ti aidé mo ti sara kamarade na azo si mo hon ndö ti kpale ti dutingo zo lo oko?

Na yâ ti ngu 2023, azo so abâ tënë ti seni abâ so tënë ti dutingo zo lo oko aga mbeni kota kpale so a bezoin ti sara mbeni ye ndali ni. Eskê mbeni ye ti sarango ni ayeke dä?

• Docteur Vivek Murthy, so ayeke bâ ndo na ndö ti tënë ti seni na États-Unis, atene: “Tongana e bâ so e yeke gï e oko nga e yeke na contact na azo ape apeut ti ga na e kpale ti seni na asara si e yeke na ngia ape.” Me lo kiri lo tene: “Mbeni ye ti sarango ni ayeke dä.” Nyen la e peut ti sara? “E peut ti gi ti sara akete kete ye lango oko oko ti kpengba songo ti e na azo.”a

Dutingo zo lo oko aye gï ti tene ape so mo duti na milieu ti azo ape. Ambeni zo apeut ti bâ so ala yeke gï ala oko, même si ala yeke na milieu ti azo. Atâa raison ni ayeke so wa, Bible apeut ti aidé e. A yeke wara na yâ ti Bible anzoni wango so apeut ti aidé e ti hon ndö ti kpale ti dutingo zo lo oko nga ti sara kamarade na azo.

Amama-ndia ti Bible so apeut ti aidé e

Duti zo so ahinga ti sara lisoro nzoni. Ye so aye ti tene ape so gï mo la mo yeke fa atënë ti bê ti mo na azo, me a lingbi mo dengi mê nzoni mo mä nga atënë so ala yeke tene. Tongana mo fa na mbeni zo so mo pensé biani na lo, songo ti mo na lo ayeke kpengba ahon ti kozo.

• Mama-ndia ti Bible: Ala ‘zia lê ti ala gï na ndö ti aye ti ala wani pëpe, me nga na ndö ti aye ti amba ti ala.’—aPhilippien 2:4.

Gi ti sara kamarade na azo nde nde. Gi ti sara kamarade na azo so ngu ti ala ahon ti mo wala so ngu ti mo ahon ti ala, so angobo ti ala wala kodro ti ala ayeke nde na ti mo.

• Mama-ndia ti Bible: “Ala maï ndoye so ayeke na bê ti ala.”—2 aCorinthien 6:13.

Ti hinga ambeni tënë na ndö ti lege ti sarango kamarade na ambeni zo, diko article “Comment combler notre besoin d’amitié.”