Ngbanga ti nyen la siriri ayeke na yâ ti dunia ape?
Kiringo tënë ti Bible
Azo asara gbä ti tene siriri aduti na ndö ti sese nga ala yeke wara ande lege ape ti tene ala sara si siriri aduti na ndö ti sese. Araison ni ayeke mingi:
“Zo so ayeke tambela, a yeke même na lo wani ti fa lege na gere ti lo pëpe.” (Jérémie 10:23). A sara azo pëpe na ngangu wala na droit ti fa lege na terê ti ala wani, a yeke ndani la ala peut pëpe ti sara si siriri aduti na ndö ti sese aninga.
“Zia bê ti mo na ndö ti amokonzi wala na ndö ti mbeni molenge ti zo pëpe, so lo lingbi ti sö zo pëpe. Yingo ti lo asigi, na lo kiri na sese; na lango ni so, apensé ti lo akui.” (Psaume 146:3, 4). Akota zo ti gouvernement, même ala so ayeke na nzara ti sara ye ti nzoni, apeut pëpe ti kaï biani biani aye so ayeke sara si bira londo.
“Na lâ ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande . . . azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndö ni.” (2 Timothée 3:1-4). E yeke na ngoi ti “lâ ti nda ni” ti sioni dunia ti laso, mbeni ngoi so sarango ye ti azo asara si warango siriri ayeke ngangu.
“Mawa na sese nga na ngu-ingo, ngbanga ti so Zabolo adescend na mbage ti ala, lo yeke na kota ngonzo, ndali ti so lo hinga so lo yeke na ngoi mingi pëpe.” (Apocalypse 12:12). A bi wato ti Nzapa, Zabolo, na sese na lo yeke pusu azo ti tene ala sara ye na ngangu tongana ti lo. Tongana lo ngbâ “mokonzi ti dunia so” e peut lâ oko ti duti na siriri ape.—Jean 12:31.
“[Royaume ti Nzapa] ayeke neka aroyaume so [ake yanga ti Nzapa] kue nga ayeke futi ala biaku biaku, gï royaume so oko la ayeke ngbâ lakue lakue.” (Daniel 2:44). Mbeni gouvernement ti azo oko tongaso apeut ti kaï nzara so e yeke na ni ti duti na siriri lakue so pëpe, me gï Royaume ti Nzapa oko la apeut ti sara ni.—Psaume 145:16.