Ngbanga ti nyen la a iri Jésus Molenge ti Nzapa?
Kiringo tënë ti Bible
Fani mingi, Bible airi Jésus “Molenge ti Nzapa.” (Jean 1:49). Tënë so atene “Molenge ti Nzapa” aye ti fa so Nzapa la acréé aye kue, wala lo la lo mû fini na aye kue, Jésus nga kue ayeke na milieu ni (Psaume 36:9; Apocalypse 4:11). Bible afa pëpe so Nzapa amû mbeni wali la adü na Jésus, tongana ti so azo ayeke dü ka na amolenge.
Bible airi nga a-ange “amolenge ti tâ Nzapa.” (Job 1:6). Nga, Bible atene so kozo koli, Adam ayeke lani “molenge ti Nzapa.” (Luc 3:38). Me, ndali ti so Jésus la ayeke kozo ye so Nzapa acréé nga oko zo so Nzapa lo wani la lo créé lo, Bible afa Jésus tongana Molenge ti Nzapa so ayeke kota mingi.
Eskê Jésus avivre lani na yayu kozo si a dü lo na sese?
En. Jésus ayeke lani mbeni créature ti yingo na yayu kozo si a dü lo tongana zo na sese. Jésus lo wani lo tene: “Mbi londo na yayu.”—Jean 6:38; 8:23.
Nzapa acréé Jésus kozo si lo créé tanga ti aye kue. Bible atene na ndö ti Jésus atene:
“Lo yeke . . . kozo ye na popo ti aye kue so Nzapa asara.”—aColossien 1:15.
Lo yeke “tongo nda ti aye so Nzapa asara.”—Apocalypse 3:14.
Prophétie ti Bible so asara tënë na ndö ti mbeni zo “so abâ gigi ândö giriri, yongoro kâ” aga tâ tënë na ndö ti Jésus.—Michée 5:2; Matthieu 2:4-6.
Nyen la Jésus asara na yayu kozo si lo ga na sese?
Lo yeke lani na mbeni kota ndo na yayu. Jésus asara tënë ni lani na temps so lo sambela lo tene: “Babâ, mû gloire na mbi . . . gloire so mbi yeke na ni lani na terê ti mo kozoni si dunia so abâ gigi.”—Jean 17:5.
Lo mû maboko na Babâ ti lo ti créé tanga ti aye kue. Jésus asara kua na terê ti Nzapa “tongana mbeni wakode-kua.” (aProverbe 8:30). Bible atene na ndö ti Jésus atene: “A yeke na lege ti lo la si a sara tanga ti aye kue na yayu nga na ndö ti sese.”—aColossien 1:16.
Nzapa asara kua na Jésus ti créé tanga ti aye kue. Na popo ti aye ni, a yeke wara a-ange nga na tanga ti aye kue so ayeke na yâ ti dunia (Apocalypse 5:11). Na mbeni lege e peut ti tene so, Nzapa na Jésus asara kua maboko na maboko tongana ti so mbeni zo so asara plan ti da na zo ti lekengo da ni ayeke sara. Zo so asara plan ni ayeke sara dessin ti da ni, na zo ti lekengo da ni ayeke mû dessin ni so na lo leke na da ni.
Lo yeke Tënë ni. Na ngoi so Bible asara tënë na ndö ti gigi ti Jésus kozo si lo ga na sese, Bible airi lo “Tënë ni.” (Jean 1:1). Ye so aye ti fa so Nzapa ayeke sara kua lani na Molenge ti lo so ti mû sango nga na afango lege ti lo na atanga ti a-ange.
Na bango ni Jésus asara nga kua tongana Watokua ti Nzapa ti ga na tokua ti lo na azo na ndö ti sese. Na ngoi so lani Nzapa amû acommandement na Adam na Ève na yâ ti yaka ti Éden, peut-être lo sara tënë na ala na lege ti Jésus, so ayeke Tënë ni (Genèse 2:16, 17). Jésus la adoit ti duti lani ange so ayeke fa lege na azo ti Israël ândö na yâ ti benyama nga so ala doit lani ti mä yanga ti lo.—Exode 23:20-23. a
a A yeke gï na lege ti ange so a iri lo Tënë ni so la Nzapa ayeke sara ka tënë ape. Na tapande, nde na Kozo molenge ti lo ni, lo sara nga kua na ambeni molenge ti lo so ayeke nga ange ti mû Ndia na azo ti Israël ândö.—Kusala 7:53; aGalate 3:19; aHébreu 2:2, 3.