1 | Bata seni ti mo

NDANI SO A YEKE KOTA YE

Mbeni ye ti ngangu wala mbeni kpale apeut ti sara ngangu mingi na ndö ti seni ti e na alege nde nde.

• Tongana ambeni ye ti ngangu asi, azo ayeke gi bê ti ala. Na mingi ni, azo so ayeke gi bê ti ala ahon ndö ni ayeke tï kobela.

• Tongana asioni kobela amû ndo apeut ti sara si ayeke ngangu na azo ti hôpital ti bâ lege ti azo ti kobela ni na oko ngoi nga peut-être ala yeke na yorö mingi ape.

• Akpale asara si ayeke ngangu na azo ti vo aye so ala yeke biani na bezoin ni, aye tongana kobe wala yorö.

Ye so mo doit ti hinga

• Ngangu kpale ti seni nga na gingo bê apeut ti sara ngangu na ndö ti adesizion ti mo na mo peut ti bâ lege ti seni ti mo nzoni ape. Ye so ayeke sara si kobela ti mo ni apeut ti ga même ngangu mingi.

• Na mbage, tongana mo bâ lege seni ti mo nzoni ape apeut ti ga sioni nga même apeut ti sara si mo wara kuâ.

• Tongana mo yeke na nzoni seni, a peut ti sara si mo mû anzoni desizion tongana mbeni kpale asi.

• Atâa mo yeke wayere wala zo ti mosoro, mo peut ti sara ambeni ye ti bata seni ti mo.

Ye so mo peut ti sara fadeso

Mbeni zo ti ndara ayeke gbu li ti lo ti bâ aye so apeut ti ga na lo akpale, na lo yeke sara ambeni ye ti kpe aye ni so tongana lege ayeke dä. Ye so andu nga tënë ti seni. Mingi ni, tongana mo nga da ti mo ayeke propre, a peut ti kanga lege na ambeni kobela wala ti tene kobela ni aga ngangu ape. A yeke nzoni mo bata seni ti mo ahon ti vo ayorö.

“Tongana e yeke propre nga da ti e ayeke propre, e yeke dépensé nginza mingi ape ti gue ti bâ docteur nga ti vo ayorö.”—Andreas.a