AKPALE AHON NDÖ TI DUNIA

3 | Bata songo so mo yeke na ni na azo so mo ye ala

NDANI SO A YEKE KOTA YE

Ndali ti so akpale ahon ndö ni na yâ ti dunia, mingi ti azo ayeke bata pëpe songo so ala yeke na ni na azo so ala ye ala.

Azo ayeke zi terê ti ala yamba na akamarade ti ala.
Wungo ti akoli na awali so ayeke sara ye na nzoni bê ape na mbage ti mba angbâ ti gue na li ni.
Ababâ na amama ayeke dengi mê mingi ape wala kete ape na agingo bê ti amolenge ti ala.

Ye so mo doit ti hinga

Akamarade ayeke kota ye mingi ndali ti so ala peut ti aidé e ti duti na nzoni seni, mbilimbili na ngoi ti angangu kpale.
Akpale ti dunia so apeut ti ga na agingo bê na sewa ti mo na ambeni lege so mo ku terê ti mo na ni ape.
Asioni sango apeut ti sara si mbeto ahon ndö ti amolenge ti mo.

Ye so mo peut ti sara fadeso

Bible atene: “Tâ kamarade aye mba ti lo na ngoi kue nga lo yeke mbeni ita so a dü lo ndali ti angoi ti vundu.”—aProverbe 17:17.

Akamarade apeut ti mû maboko na e nga ti mû na e anzoni wango. Akamarade tongaso so aye zo apeut ti kpengba e ti ngbâ ti gbu ngangu na yâ ti akpale ti lâ oko oko.

YE SO MO PEUT TI SARA: Ambeni wango

Na ngoi ti akpale, sara ye alingbi na aye so a fa ni ge ti bata songo so mo yeke na ni na azo so mo ye ala

KPENGBA SONGO TI MARIAGE TI MO

Kpengba songo ti mariage ti mo

Bible atene: “Azo use ayeke nzoni ahon zo oko . . . Tongana mbeni oko atï, mba ti lo alingbi ti yô lo na nduzu.” (Zo-ti-fa-tene 4:9, 10). Koli na wali so asara mariage adoit ti sara kua maboko na maboko, me ala yeke contre mba ape.

Leke na bê ti mo ti sara pëpe mbeni ye ti sioni na koli wala wali ti mo ndali ti so mo yeke na mbeni kpale. Gi ti kanga bê.
Kamême legeoko na yâ ti yenga, gi ti sara lisoro na koli wala wali ti mo na ndö ti ambeni kpale so peut-être ala wara. Ala sara kue ti leke tënë ni, me pëpe ti bi tënë ni na li ti mba.
Ala mû ngoi ti sara ambeni ye legeoko so anzere na ala use kue.
Ala gi ti rappelé na apendere ngoi so ala passé ni lani legeoko, peut-être ti bâ afoto ti mariage ti ala wala ambeni pendere souvenir so ala yeke na ni.

“Mbeni couple apeut ti mä terê ape na ndö ti aye kue, me aye ti tene ape so ala peut ti sara kua legeoko ape tongana mbeni équipe. Ala peut ti mû mbeni desizion ensemble, na pekoni ala sara ye alingbi na desizion ni.”—David.

BATA SONGO TI MO NA AKAMARADE TI MO

Bata songo ti mo na akamarade ti mo

Na ndö ti so mo wara mungo maboko ti akamarade ti mo, gbu li na ndö ti ambeni lege so mo peut ti mû maboko na ala. Tongana mo yeke kpengba ala, a yeke kpengba mo.
Gi ti iri ambeni kamarade ti mo lango oko oko ti bâ wala ala yeke tongana nyen.
Hunda na akamarade ti mo tongana nyen la ala hon ndö ti mara ti akpale so mo wara.

“Tongana mo tingbi na mbeni ngangu kpale so ayeke tongana kota pupu, akamarade ti mo apeut ti aidé mo. Ala peut ti fa na mo nzoni lege so a lingbi mo gue dä, même si ala yeke rappelé mo na aye so mo hinga ni déjà awe. Akamarade ti mo ayeke pensé na mo, nga ala hinga so mo kue mo yeke pensé na ala.”—Nicole.

DUTI MBENI BABÂ WALA MAMA SO AYEKE MÛ MABOKO

Duti mbeni babâ wala mama so ayeke mû maboko

Bible atene: “Duti nduru ti mä tënë, ti sara tënë hio hio pëpe”. (Jacques 1:19). Na début ni, peut-être amolenge ti mo ayeke hésité ti fa na mo agingo bê ti ala nga na aye so agbu bê ti ala, me lege so mo yeke kanga bê ti mä ala, a yeke aidé ala ti zi bê ti ala na mo.

Sara si amolenge ti mo asentir terê ti ala nzoni ti tene ala fa atënë ti bê ti ala na mo. Ambeni molenge ayeke sara tënë mingi na ngoi so ala sentir terê ti ala bien; na tapande, na temps so ala yeke na yâ ti oto wala ala yeke tambela, ahon temps so ala na babâ na mama ti ala aduti place oko.
Sara kue ti tene amolenge ti mo abâ mingi ape asango so ayeke sara zo nzoni ape.
Zia amolenge ti mo ahinga aye so mo yeke sara ti bata sewa ti mo nzoni.
Leke mbeni plan tongana aye ti ngangu asi, nga mo na amolenge ti mo atara peko ni legeoko.

“Causé na amolenge ti mo, nga zia lege na ala ti fa atënë ti bê ti ala. A peut ti si so ala yeke na mbeto, gingo bê wala ngonzo, me ala fa ni ape. Fa na ala ti hinga so mo kue mo yeke gi ti hon ndö ti amême sentiment ni so, nga fa na ala tongana nyen la mo yeke hon ndö ni.”—Bethany.