Pasi akomanse

NA GIGI ti yaka ti Eden, Adam na Eve abâ pasi mingi. A lingbi ala sara kua ngangu mingi ti wara kobe ti ala. Ahon ti tene apendere keke si angoro ala, so ala lingbi ti te lê ni, gi akeke ti kî la asi singo. Ye ni ayeke tongaso ngbanga ti so Adam na Eve ake yanga ti Nzapa, na ala yeke na nzoni songo na lo mbeni pëpe.

Me ye so ayeke sioni mingi ayeke so Adam na Eve akomanse ti kui. Dabe ti mo so Nzapa atene na ala so ala yeke kui tongana ala te lê ti mbeni keke. Gi na lango ni so ala te ni, ala komanse ti kui. So ye ti buba so ala ke ti mä yanga ti Nzapa!

A yeke na gigi ti yaka ti Eden si Adam na Eve adü amolenge. So aye ti tene nga so amolenge ni ayeke ga mbakoro na ala yeke kui.

Tongana Adam na Eve amä fade yanga ti Jéhovah, ka ala na amolenge ti ala ayeke duti na ngia. Ala lingbi fade ti duti lakue lakue na ngia na ndo ti sese. Zo oko ti ga mbakoro, ti tï kobela na ti kui ayeke duti fade dä pëpe.

Nzapa aye si azo aduti lakue lakue na ngia na ndo ti sese, na lo mû yanga lo tene so mbeni lâ a yeke duti tongaso. Sese kue ayeke ga pendere, nga azo kue ayeke wara sava ti tere. Azo kue ayeke duti ande na nzoni songo na popo ti ala nga na Nzapa.

Me Eve ayeke na nzoni songo na Nzapa mbeni pëpe. Tongana lo dü amolenge ti lo, a yeke ngangu mingi na lo. Yâ ti lo aso ngangu. Kengo yanga ti Jéhovah aga na lo aye ti vundu mingi.

Adam na Eve adü amolenge-koli na amolenge-wali mingi. Tongana ala dü kozo molenge ti ala ti koli, ala iri lo Caïn. Ala iri use molenge ti ala ti koli ni Abel. Nyen la asi na amolenge ni so? Mo hinga ni?