Adam na Ève ake yanga ti Nzapa

Mbeni lâ, tongana Ève ayeke gï lo oko, mbeni ngbo asara tënë na lo. A tene: ‘A yeke tâ tënë so Nzapa atene ala te pëpe lê ti akeke kue?’ Ève atene: ‘E lingbi ti te lê ti akeke ni kue, me gï lê ti keke oko so ayeke na milieu ti yaka ni so e te pëpe. Tongana e te lê ti keke ni so, e yeke kui.’ Ngbo ni atene: ‘Ala yeke kui pëpe. Tongana ala te ni, ala yeke ga tongana Nzapa.’ Tënë so ayeke vrai? Ên-ën, a yeke tënë ti mvene la. Me Ève amä na bê na ni. Tongana Ève angbâ ti bâ lê ti keke so mingi, a sara si nzara ni asara lo. Lo mû ni lo te nga lo mû mbeni na Adam. Adam ahinga so ala yeke kui tongana ala ke yanga ti Nzapa. Me Adam ate kamême lê ti keke ni so.

Kete na peko ti lango ni so, Jéhovah asara tënë na Adam nga na Ève. Lo hunda ala ndani so ala ke yanga ti lo. Ève atene ayeke ngbo la ahanda ni nga Adam atene so ayeke Ève la ahanda ni. Teti so Adam na Ève ake yanga ti Jéhovah, lo tomba ala na yâ ti yaka ni. Ti hinga biani so ala yeke kiri encore ape na yâ ti yaka ni, lo zia ambeni ange nga na épée so wâ ayeke na terê ni so ayeke tourné na yanga ti yaka ni.

Jéhovah atene so ni yeke punir nga zo so atene mvene na Ève so. Biani, a yeke ngbo so la asara tënë na Ève ape. Jéhovah aleke lani angbo ti sara tënë ape. A yeke mbeni sioni ange la asara si ngbo so asara tënë so. Lo sara tongaso ti handa na Ève. A iri ange ni so Satan Zabolo. Mbeni lâ, Jéhovah ayeke futi ande Satan, tongaso si lo lingbi pëpe ti ngbâ ti handa azo ti sara sioni ye.