Jacob ague na Haran

MO HINGA azo so Jacob ayeke sara tënë na ala so? Ala yeke azo ti batango nyama. Na peko ti so Jacob atambela lango mingi, lo wara akoli so na tere ti mbeni dungu. Jacob ahunda ala, lo tene: ‘Ala londo na ndo wa?’

Ala tene: ‘E londo na Haran.’

Jacob akiri ahunda: ‘Ala hinga Laban?’

Awabatango nyama ni ayeda. Ala tene: ‘Bâ, Rachel molenge ti lo ti wali ayeke ga na angasangbaga ti lo.’ Mo bâ Rachel kâ na gango ni?

Tongana Jacob abâ Rachel na angasangbaga ti koya ti lo Laban, lo gue lo zi kota tênë na yanga ti dungu ni si angasangbaga ni alingbi ti nyon ngu. Na pekoni, Jacob asu ngbangba ti Rachel na lo fa so lo yeke Jacob, molenge ti Rebecca, ita ti babâ ti Rachel. Tere ti Rachel anzere mingi si lo kpe ti tene tënë ni na babâ ti lo Laban.

Laban ayeke lani na ngia mingi tongana Jacob angbâ na ndo ti lo. Tongana Jacob ahunda na lo ti mû Rachel na wali, bê ti Laban anzere. Me lo hunda na Jacob ti sara kua na lo teti ngu mbasambala kozoni si lo mû Rachel. Ndali ti so Jacob aye Rachel mingi, lo yeda. Me mo hinga ye so asi na ngoi ti mariage ni?

Laban amû na Jacob Léa, kozo molenge ti lo ti wali. Na pekoni, tongana Jacob ayeda ti kiri ti sara kua na Laban teti ambeni ngu mbasambala, Laban amû Rachel na Jacob. Na ngoi ni kâ, Nzapa azia akoli ti mû awali mingi. Me fadeso, Bible atene a lingbi koli amû gi wali oko.