Salango ngangu na bê kue Jéhovah ahiri nzoni dä lawa?

“ZIA mbi gue teti nda aga ndulu ti dê.”

“Fade mbi zia mo gue pëpe tongana mo hiri tënë nzoni na ndo mbi pëpe.”

“Iri ti mo ayeke nyen?”

“Jacob.”

“Fade a di iri ti mo Jacob mbeni pëpe, me a di iri ti mo Israël, teti mo tiri na Nzapa na azo, na mo hon na ngangu.”​—Genèse 32:26-28.

Pendere lisoro so agbu bê ayeke ye so asi na peko ti ngangu tiri ti Jacob, mbeni koli so ayeke na ngu 97, na mbeni ange. Atâa so Bible afa lo tongana mbeni wanguru pëpe, lo tiri na bï kue na mbeni ange. Ngbanga ti nyen? Ngbanga ti so zendo so Jéhovah amû na kotara ti lo, so ayeke nga ye ti héritier ti lo, agbu bê ti Jacob mingi.

Angu mingi kozoni, Esaü, ita ti Jacob, akä na lo kozo ndo ti lo ti molenge teti sembe oko ti kobe. Me ti fadeso, tënë asi na mê ti Jacob so Esaü ayeke ga na mbage ti lo na azo 400 na tele ti lo. Biani, bê ti Jacob agi lo mingi. Tongaso, lo hunda na Jéhovah ti fa na lo wala zendo so Lo mû kozoni, so fade sewa ti lo ayeke maï na kodoro so ayeke na mbage ti Ngu ti Jourdain, ayeke ga tâ tënë biani. Ti sala ye alingbi na sambela ti lo, Jacob asala mbeni ye. Lo tokua gbâ ti amatabisi na Esaü, so ayeke na lege ti gango ni. Lo sala nga ambeni ye ti bata na azo ti lo mveni: lo kangbi yâ ti azo ni use, na awali ti lo nga na amolenge ti lo afâ ngu ti Jabbok. Na pekoni, na ngangu ti tele ti lo kue nga na ngule, lo yeke tiri fadeso na bï ni kue na mbeni ange ti “hunda grâce na tïtî Lo”.​—Osée 12:5; Genèse 32:1-32.

Zia e bâ mbeni tapande ni nde so asi kozoni. A yeke ti Rachel, use wali ti Jacob so lo ye lo mingi. Rachel ahinga mbilimbili zendo so Jéhovah amû ti sala si Jacob abâ nzoni. Ita ti lo Léa, kozo wali ti Jacob, adü amolenge-koli osio, me Rachel adü ti lo molenge oko pëpe (Genèse 29:31-35). Ahon ti duti na mawa mingi, lo ngbâ ti toto lakue na Jéhovah na yâ ti sambela na lo sala aye alingbi na asambela so lo tene. Legeoko tongana ti so kotara ti lo Sara asala ândö na Agar, Rachel amû boi-wali ti lo Bilha na Jacob ti ga sambâ ti lo si, tongana ti so Rachel atene, ‘ni lingbi wara amolenge na lege ti lo nga.’a Bilha adü amolenge-koli use na Jacob: Dan na Nephtali. Na ngoi so Bilha adü Nephtali, Rachel afa tongana nyen tënë ni agbu bê ti lo ngangu, lo tene: ‘Tiri so mbi tiri na ita ti mbi ti wali ayeke kota mingi, na mbi hon lo’. Na pekoni, Rachel adü amolenge ti yâ ti lo use, Joseph na Benjamin.​—Genèse 30:1-8; 35:24.

Ngbanga ti nyen Jéhovah ahiri deba nzoni na ndo ngangu so Jacob na Rachel asala na lege ti mitele nga na ti bibe? A yeke ngbanga ti so ala bata ti sala kozoni kue ye so bê ti Jéhovah aye na ala yekia ye ti héritier ti ala. Ala sambela na bê kue ti tene Nzapa ahiri deba nzoni na ndo ye so ala sala na yâ fini ti ala, na ala sala ambeni kota ye so ague oko na ye so bê ti Nzapa aye nga na aye so ala hunda.

Legeoko tongana Jacob na Rachel, azo mingi laso alingbi ti yeda so tongana zo aye ti wara deba nzoni ti Jéhovah, a lingbi lo sala kota ngangu. Mingi ni ala toto na ngule, bê ti ala anze na vundu agbu ala na ndembe so ala yeke sala ngangu ti wara ni. Bâ tapande ti Elisabeth, mbeni mama so ayeke Chrétien. Lo dabe lo na ngangu so lo sala na bê kue ti kiri ti gue na abungbi lakue lakue, teti a ninga mingi lo gue na abungbi pëpe. A duti ngangu mingi na lo teti so lo yeke na akete molenge ti koli oku, koli ti lo ayeke Témoin ti Jéhovah pëpe, nga Da ti Royaume so ayeke ndulu na lo ayo akilomètre 30. Lo tene: “Ti gue lakue na abungbi ahunda ti tene mbi fa lege ngangu na tele ti mbi mveni, na mbi hinga so a yeke lani nzoni teti mbi nga teti amolenge ti mbi. Ye so amû maboko na ala ti bâ so a yeke nzoni lege ti mû.” Jéhovah ahiri deba nzoni na ndo angangu so lo sala. Na popo ti amolenge ti lo ota so ayeke gue na bungbi lakue, use ayeke na yâ kusala ti ngoi kue. Na bango maïngo ti ala na lege ti yingo, bê ti lo anzere, lo tene: “Ala hon mbi na lege ti yingo.” So tâ deba nzoni si lo wara ndali ti ngangu so lo sala na bê ti lo kue!

Ngangu so a sala na bê kue so Jéhovah adeba nzoni dä

Zo so asala ngangu na bê ti lo kue, lo yeke wara biani futa ni. Tongana e mû ngangu ti e kue ti sala na mbeni kusala, e yeke wara nga ngia dä mingi. Jéhovah aleke e tongaso. Gbia Salomon asû na mbeti: “A lingbi azo kue ate na anyon na awara ngia na yâ kusala kue ti ala, ye so kue ayeke matabisi ti Nzapa”. (Zo-ti-fa-tene 3:13; 5:18, 19). Ye oko, ti wara deba nzoni ti Nzapa, a lingbi e bata nzoni si e fa lege mbilimbili na angangu ti e. Na tapande, zo so azia aye ti yingo na use ndo na yâ fini ti lo, a yeke na lege ni ti tene lo ku si Jéhovah ahiri deba nzoni na ndo lo? Mbeni Chrétien so ayeda ti sala mbeni kua wala ti wara mbeni kota ndo ti kusala so alingbi ti sala si lo manke lakue abungbi ti aChrétien, ndo so dutingo na aita nga afango ye ayeke kpengba mabe, fade lo yeke nzere na lê ti Jéhovah?​—aHébreu 10:23-25.

Tongana zo amû fini ti lo kue ti sala kua ngangu ti wara kota ndo wala mosoro, a ye ti tene lakue pëpe so lo yeke ‘wara ande ngia’ dä tongana lo zia aye ti yingo na popo ni pëpe. Na yâ toli ti lo ti zo ti lungo lê ti kobe, Jésus afa aye so alingbi ti si tongana e fa lege nzoni pëpe na angangu ti e. Na ndo alê ti kobe so “a lu na yâ kî”, Jésus atene so ayeke “zo so amä Tënë ni, na kusala ti leke ye ti lo ti sese so na handa ti mosoro akanga Tënë ni, na lo lë pëpe.” (Matthieu 13:22). Paul amû nga gbotongo mê na ndo oko mara ti gbanda so. Lo kiri lo tene so azo so ayeke tomba peko ti aye ti mitele ‘atï na yâ ye ti handa, na son, na nzara nde nde ti buba ye na ti ye so amû vundu, ye so abi ala na yâ ye so afuti ala’. Ye nyen alingbi ti zi e na yâ dutingo so afuti zo na lege ti yingo? Paul akiri atene: “Mo kpe ye so! Mo zia bê ti mo pëpe na mosoro so fade awe, me na Nzapa, Lo so amû na e ye mingi, ye kue ti mû ngia na e.”​—1 Timothée 6:9, 11, 17.

Atâa ngu so e yeke na ni wala ngoi so e sala na Jéhovah aninga tongana nyen, e kue e lingbi ti wara nzoni na salango mara ti ngangu so Jacob na Rachel asala lani na bê ti ala kue. Ti nzere na Jéhovah, lê ti ala angbâ gi na ndo ye ti héritier ti ala. Atâa so dutingo ti ala alingbi fade ti mû mbito wala ti ga na vundu, ye so kue asala ye oko na ndo bango ndo ti ala pëpe. Laso, akpale so e wara alingbi nga ti mû mbito wala ti bi vundu na bê ti e. Bê ti e alingbi ti pusu e ti zia lege ti tiri ni na ti tï na gbele Satan. Satan so, lo lingbi ti mû aye kue so ayeke na tïtî lo ti sala ye so bê ti lo aye. A lingbi ti duti asalango ngia, aye ti wanguru, kua wala mosoro. A yeke tene ka so fade aye ti nzoni aga na pekoni, me gi azo oko oko si awara ni. Azo so a handa ala wala so a pusu ala ti tï na yâ mara ti aye tongaso abâ so na nda ni mingi ni ala wara gi vundu dä. Legeoko tongana Jacob na Rachel ti giriri, zia e lë bibe ti tiri na bê kue ti hon ndo ti ahanda ti Satan.

Zabolo aye gi ti bâ e na tenengo so ye akara e, nga na bingo bê so ‘ye kue ahunzi, so mbeni ye ti sala ayeke dä pëpe, na so ayeke gi bango pasi senge.’ Tongaso, a yeke nzoni e sala hange si e wara pëpe bibe so ayeke ndulu ti tene so ye ni akara e biani, na so ‘zo oko aye tënë ti mbi pëpe’ nga so ‘Jéhovah agirisa mbi awe.’ Dutingo na mara ti bibe tongaso ayeke sala sioni na tele ti e mveni. A si awe so e tiri mbeni pëpe juska e wara mbeni deba nzoni si? Girisa pëpe so Jéhovah ayeke hiri deba nzoni na ndo ngangu so e sala na bê kue.

E ngbâ ti tiri ti wara deba nzoni ti Jéhovah

Nzoni duti ti e na lege ti yingo aluti mingi na ndo gbungo nda ti atâ tënë use na ndo fini ti e tongana wakua ti Jéhovah. (1) Zo oko alingbi ti tene pëpe so a yeke gi lo oko si awara akpale, akobela wala aye ti ngangu na yâ fini, nga (2) Jéhovah amä toto ti ala so adekongo na bê kue na mbage ti lo ti wara mungo maboko na deba nzoni.​—Exode 3:7-10; Jacques 4:8, 10; 1 Pierre 5:8, 9.

Atâa dutingo ti mo ayeke ngangu tongana nyen wala mo bâ so mo lingbi pëpe, zia lege pëpe na “siokpari so aye ti kanga e,” so ti tene dutingo na mabe pëpe, ti hon mo na ngangu (aHébreu 12:1). Ngbâ ti tiri juska mo wara mbeni deba nzoni. Duti lakue na bê so anze pëpe, na dango bê ti mo na mbakoro Jacob, so atiri na bï kue ti wara mbeni deba nzoni. Legeoko tongana ti so mbeni zo ti fango yaka alu lê ti kobe na aku lango ti kongo ni, na be-nze-pepe ku ti wara deba nzoni ti Jéhovah na ndo akusala ti mo ti yingo, atâa mo bâ so mo sala kusala mingi pëpe (Jacques 5:7, 8). Bata nga lakue na li atënë ti wasungo psaume so: “Azo so alu le-kobe na ngule, fade ala fâ le-kobe na ngia.” (Psaume 126:5; aGalate 6:9). Luti ngangu na ngbâ na popo ti azo so ayeke tiri lakue.

[Kete Tene na Gbe Ni]