Chapitre 7

Jésus na awagingo nda ti atongoro

BAA, AMBENI koli alondo na mbage ti To. Ala tene ala lingbi ti fa nda ti ye na lege ti lutingo ti atongoro. Na sese ti ala, na To, ala baa mbeni fini tongoro, na ala mu pekoni teti akilomètre ngbangbo mingi ti si na Jérusalem.

Na ngoi so ala si na Jérusalem, awagingo nda ti atongoro ahunda: “Molenge so adu lo ti duti gbia ti aJuif ayeke na ndo wa? E baa tongoro ti lo tongana e yeke na mbage ti to na e ga ti sepela lo.”

Tongana gbia Hérode na Jérusalem ama tene so, be ti lo agi lo mingi. Tongaso lo hiri akota prêtre na lo hunda ala ndo so fade adu Christ da. A lingbi na tene ti Mbeti ti Nzapa ala kiri tene na lo: “Na Bethléhem.” Tongaso Hérode ahiri awagingo nda ti atongoro so na lo tene na ala: “I gue, i gi molenge ni mbilimbili, na tongana i wara lo, i kiri i sala tene ni na mbi ti tene mbi nga mbi gue na mbi sepela lo.” Me, biani, Hérode aye ti wara molenge so ti fa lo.

Na pekoni ala hon na mbeni kota ye ti kpene asi. Tongoro so ala baa tongana ala ngba na mbage ti To ague na gbele ala. Biani, a yeke mbeni senge tongoro pepee, me amu tongoro so ti fa lege na ala. Awagingo nda ti atongoro amu pekoni juska a luti na ndo so Joseph na Marie ayeke da.

Tongana awagingo nda ti atongoro ali na ya da ni, ala wara Marie na Jésus, kete molenge ti lo. Tongaso ala kue ati na gbele lo. Ala sigigi na amatabisi na bozo ti ala: lor, oliban na myrrhe. Na pekoni, tongana ala ye ti kiri ti gue ti tene na Hérode ndo wa si molenge ni ayeke da, Nzapa na lege ti mbeni suma atene na ala ti sala tongaso pepee. Tongaso ala kiri na kodoro ti ala na mbeni lege nde.

Ti be ti mo, zo wa asala si tongoro so asigigi na nduzu na atambela ti fa lege na awagingo nda ti atongoro so? E da be ti e, tongoro so ague na ala hio na Jésus na Bethléhem pepee. Nde na so, a gue na ala kozoni na Jérusalem na ndo so ala wara Hérode ka, lo so aye ti fa Jésus. Biani, lo lingbi ando ti fa Jésus tongana Nzapa asi pepee ti tene na awagingo nda ti atongoro ti fa na Hérode pepee ndo so Jésus aduti da. A yeke Satan Diable, wato ti Nzapa, so aye ti fa Jésus, na lo mu tongoro so ti sala ye so be ti lo aye. Matthieu 2:1-12; Michée 5:2.

▪ Ye nyen afa so tongoro so awagingo nda ti atongoro abaa ayeke mbeni senge tongoro pepee?

▪ Jésus ayeke na ndo wa tongana awagingo nda ti atongoro awara lo?

▪ E hinga tongana nyen so a yeke Satan si asigigi na tongoro so ti fa lege na awagingo nda ti atongoro?