Chapitre 10

Atambela na Jérusalem

PRINTEMPS asi awe. A yeke ngoi teti Joseph na sewa ti lo, na aita ti lo kue na andeko ti lo nga, ti gue na Jérusalem, tongana ti so ala sala ngu na ngu na nze ti mars wala avril, si ala lingbi ti sala matanga ti Pâque. Tongana ala leke tele ti ala ti gue na tambela ti kilomètre ngbangbo oko ala yeke na ngia. Fadeso Jésus ayeke na ngu bale oko na ndoni use, na lo ku matanga so na kota ngia na be ti lo.

Teti Jésus na sewa ti lo, Pâque ayeke gi kusala ti lango oko pepee. Biani, fade ala ngba nga teti matanga ti Amapa so mama ayeke da pepee so asala teti lango mbasambala na peko ti Pâque, so ala baa tongana mbage ti ngoi ti Pâque. Ni laa, ti gue na ti kiri na Nazareth, nga na dutingo ti ala na Jérusalem, ayeke mu ande na ala yenga use. Ye oko, na ngu ni so, fade a yeke ninga ahon ti atanga ni, teti ye so ayeke si ande na Jésus.

Kpale asi tongana ala londo na Jérusalem ti kiri. Na be ti Joseph na Marie Jésus abungbi na ambeni sewa wala na ambeni kamarade ti ala so atambela lege-oko na ala. Ye oko, tongana azo kue aluti ti lango na bi, ala baa Jésus pepee, na baba na mama ti lo atonda ti hunda ndo na popo ti ala so atambela na ala. Me, ala wara lo pepee. Tongaso Joseph na Marie akiri na Jérusalem ti gi lo.

Ti lango oko ala gi lo gba. Lango use ni kue ala wara lo pepee. A yeke gi na lango ota ni si ala gue na temple. Na baa na ya mbeni oko ti ada ni, ala wara Jésus na popo ti awafango ye ti aJuif. Lo yeke ma ala na lo hunda tene na ala.

Marie ahunda na lo: “Molenge ti mbi, ngbanga ti nyen mo sala ye tongaso na e? Baba ti mo na mbi, be ti e aduti na vundu mingi, e gi mo na ndo kue.”

Be ti Jésus ado so ala hinga ndo ti wara lo pepee. Ni laa lo hunda na ala: “Ngbanga ti nyen ala gi mbi? I hinga pepee, ndo ti mbi ayeke ge na ya da ti Baba ti mbi?”

Jésus alingbi hinga pepee ngbanga ti nyen baba na mama ti lo ahinga tene so pepee. Tongaso lo londo lo kiri na baba na mama ti lo, na lo ngba lakue ti ma yanga ti ala. Lo ngba ti maï na ndara, lo ga kota, lo ga nzoni na le ti Nzapa nga na le ti azo. Biani, a tondani na ngoi so lo de kete, Jésus amu nzoni tapande gi teti so lo ye aye ti yingo pepee me nga na lege so lo kpe mbito ti baba na mama ti lo. Luc 2:40-52; 22:7.

▪ Jésus ague na ndo wa na asewa ti lo kue tongana printemps asi? Na tambelango ni so amu ngoi oke?

▪ Ye nyen asi na tambela ti ala tongana Jésus awara ngu bale oko na ndoni use?

▪ Tapande wa Jésus azia na amolenge ti laso?