Jésus so ade kete

Joseph na Marie asara kodro na Nazareth, ala na Jésus nga na ambeni ita ti Jésus ti koli na ti wali. Joseph ayeke sara kua ti charpentier, ni la a-aidé lo ti bata na sewa ti lo. Lo yeke fa ye na ndö ti Jéhovah na sewa ni nga lo yeke fa na ala Ndia ti Lo. Sewa ni ayeke gue ka lakue na synagogue ti voro Nzapa, nga ngu oko oko ala yeke gue ka na Jérusalem ti sara Matanga ti Pâque.

Na ngoi so Jésus ayeke na ngu 12, lo na sewa ti lo asara mbeni yongoro voyage so ala yeke sara ka ni lakue ti gue na Jérusalem. Gbata ni asi singo na azo so aga ti sara Matanga ti Pâque. Ambeni ngoi na pekoni, Joseph na Marie amû lege ti kiri na ndo ti ala, ala pensé so Jésus ayeke na popo ti ala. Me tongana ala gi lo na popo ti afami ti ala, ala wara lo ape.

Ala kiri na Jérusalem, nga teti lango ota, ala gi molenge ti ala ni gbä. Na nda ni, ala gue na temple. Ala wara Jésus kâ, lo ngbâ ti duti na popo ti amaître, lo yeke mä ala nga lo yeke hunda akpengba hundango tënë na ala. Ye so Jésus asara so apika bê ti amaître ni mingi, a sara si ala komanse ti hunda atënë na Jésus. Akiringo tënë ti lo asara si li ti ala akpe kue. Ala bâ tongana nyen la lo mä yâ ti Ndia ti Jéhovah.

Joseph na Marie agi bê ti ala mingi. Marie atene: ‘Molenge, e gi mo gbä na ndo kue! Mo yeke na ndo wa la e gi mo gbä so?’ Jésus atene: ‘Ala hinga ape so mbi doit ti duti na yâ ti da ti Babâ ti mbi ge?’

Jésus akiri legeoko na ala na Nazareth. Joseph afa na Jésus kua ti charpentier. Mo pensé Jésus ayeke lani mbeni zo so ayeke tongana nyen na ngoi so lo yeke maseka-koli? Tongana lo yeke kono, ndara ti lo ayeke maï, lo nzere na lê ti Nzapa nga na lê ti azo.