Chapitre 13

Mandango ye na atara so asi na Jésus

FADE FADE na peko ti batême ti lo, yingo ti Nzapa ague na Jésus na yando ti Judée. Lo yeke na ye mingi ti gbu li ti lo na ndoni, teti na ngoi ti batême ti lo “ayayu alungula”, so ti tene fadeso lo lingbi ti gbu nda ti aye ti yayu. Biani, a lingbi lo gbu li ti lo na ndo aye mingi!

Jésus asala la bale osio na bi bale osio na yando, na lo te ye oko pepee na ngoi so. Na pekoni, tongana nzala ti kobe asala Jésus mingi, Diable aga na lo ti handa lo, lo tene na lo: “Tongana mo yeke mbeni molenge ti Nzapa, mo tene na atene so ti ga mapa.” Me Jésus ahinga a yeke sioni ti sala ye na ngangu ti lo ti sala ye ti kpene ti mu ye na nzala ti be ti lo mveni. Tongaso lo ke handa so.

Me Diable azia lo pepee. Lo tara mbeni ye nde. Lo tene na Jésus ti gue na ndo ti gbagba ti temple na ti ti na sese si a-ange ti Nzapa aso lo. Jésus ayeda pepee ti sala mbeni ye ti kpene tongaso. Jésus adiko Mbeti ti Nzapa, na lo fa so a yeke sioni ti tara Nzapa tongaso.

Na handa ota ni, na lege ti mbeni ye ti kpene Diable afa na Jésus aroyaume ti sese kue na lo tene: “Tongana mo kuku na sese, mo sambela mbi, fade mbi mu na mo ye so kue.” Me Jésus akiri ake handa so, lo ye ti ngba be-taa-zo na Nzapa.

E lingbi ti manda ye na atara so asi na Jésus. Tapande: ala fa na gigi so Diable ayeke pepee gi mbeni tene ti sioni, tongana ti so ambeni zo atene, me lo yeke taa zo so le ti zo abaa pepee. Mbeni tara so asi na Jésus afa nga so ayanga-ti-komande kue ti sese ayeke ti Diable. Tongana a yeke tongaso pepee, ka tene ti Diable alingbi tara Christ biani tongana nyen?

Na gbu li ti mo na ndo tene so: Diable atene lo ye ti futa ye na Jésus tongana lo sambela lo gi fani oko, même lo yeke mu na lo aroyaume kue ti sese. Diable alingbi ti tara e na lege ti mbeni ye tongaso nga. Peut-être lo zia na gbele e lege ti wara mosoro ti sese, wala ngangu wala kota ndo na sese so. Me fade e fa na gigi e yeke na ndara tongana e mu peko ti tapande ti Jésus na e ngba be-taa-zo na Nzapa ataa so atara nde nde alingbi ti si na e! Matthieu 3:16; 4:1-11; Marc 1:12, 13; Luc 4:1-13.

▪ Na la bale osio so lo yeke na yando Jésus agbu li ti lo na ndo aye wa?

▪ Na lege wa Diable agi ti handa Jésus?

▪ E manda nyen na lege ti atara so asi na Jésus?