“Ke zabolo” tongana ti so Jésus ake na lo

“I ke zabolo, na fade lo kpe i.”​—JACQ. 4:7.

1. Kangango lege wa Jésus ahinga lani so fade lo wara ni na ndo ti sese? Ye ti pekoni ayeke so wa?

JÉSUS CHRIST ahinga lani so fade Zabolo ayeke gi ti kanga lege na lo. Ye so asigigi polele na yâ ti tënë so Nzapa atene na ngbo so, so ti tene créature ti yingo so ake yanga so asara tënë na lege ti ngbo so. Nzapa atene: “Fade Mbi zia tënë ti ke na popo ti mo na wali so [mbage ti bungbi ti Jéhovah na yayu], [nga] na popo ti hale ti mo na hale ti lo; fade lo [Jésus Christ amboko] li ti mo, na fade mo mboko ndagere ti lo.” (Gen. 3:14, 15; Apoc. 12:9). Mbokongo ndagere ti Jésus ni aye ti sara tënë ti ye ti ngangu so ayeke si ande na lo teti kete ngoi na lege so a fâ lo na ngoi so lo yeke na sese, na fade Jéhovah ayeke zingo lo ti wara gloire na yayu. Me mbokongo li ti ngbo ni aye ti fa so fade Zabolo ayeke wara ande mbeni kä so ayeke sara ande si lo kui.​—Diko Kusala 2:31, 32; aHébreu 2:14.

2. Ngbanga ti nyen Jéhovah ahinga na bê ti lo kue so Jésus ayeke luti ande na Zabolo?

² Na ngoi so Jésus ayeke na sese, Jéhovah ahinga na bê ti lo kue so fade Jésus ayeke sara ande biani aye so a hunda na lo ti sara nga lo yeke ke ande Zabolo. Ngbanga ti nyen Jéhovah ahinga ni tongaso? Ngbanga ti so lo créé Jésus na yayu angu mingi kozoni awe, lo bâ sarango ye ti lo na lo hinga so “wakode” so nga “Kozo ti ye kue so Nzapa acréé” ayeke mä yanga nga lo yeke be-ta-zo (aProv. 8:22-31; aCol. 1:15). Ni la na ngoi so Nzapa atokua Jésus na sese nga lo zia lege si Zabolo asara ngangu na lo juska na kuâ, Nzapa ahinga na bê ti lo kue so fade oko Molenge ti lo so ayeke luti na Satan.​—Jean 3:16.

Jéhovah abata awakua ti lo

3. Bango ndo ti Zabolo ayeke tongana nyen na mbage ti awakua ti Jéhovah?

³ Jésus atene so Zabolo ayeke “mokonzi ti sese so” nga lo tene na adisciple ti lo so fade a yeke sara aye ti ngangu na ala, même tongana ti so a sara lani na lo (Jean 12:31; 15:20). Azo ti sioni, so ayeke na gbe ti ngangu ti Satan Zabolo ake aChrétien ndali ti so ala yeke sara na Jéhovah na ala yeke fa tënë ti ye so ayeke mbilimbili (Mat. 24:9; 1 Jean 5:19). Zabolo ayeke gi mingi ni ti sara sioni na tanga ti aChrétien so a sa yingo na ndo ti ala, so ayeke komande ande legeoko na Christ na yâ ti Royaume ti yayu. Satan agi nga ti sara sioni na aTémoin ti Jéhovah so ayeke na beku ti wara fini ti lakue lakue na yâ ti paradis na ndo ti sese. Bible awa e, atene: “Wato ti i zabolo ayeke tambela tongana bamara so atoto, na lo yeke gi zo so lo lingbi te lo.”​—1 Pi. 5:8.

4. Nyen la afa so na ngoi ti e laso awakua ti Jéhovah aluti na Zabolo?

⁴ Teti so Jéhovah Nzapa ayeke mû maboko na bungbi ti lo, a sara si e luti na Zabolo. Bâ aye so asi: Na yâ ti angu 100 so ahon, ambeni ngorogbia so ayeke komande na ngangu mingi agi ti hunzi aTémoin ti Jéhovah. Me wungo ti aTémoin ti Jéhovah angbâ lakue ti gue na li ni nga fadeso ala si nduru na kutu 7 na yâ ti akongregation ahon saki 100 na ndo ti sese kue. Asioni ngorogbia so asara aye ti ngangu na awakua ti Jéhovah alï dû!

5. Na lege wa Esaïe 54:17 aga tâ tënë na ndo ti awakua ti Jéhovah?

⁵ Tongana Nzapa ayeke sara tënë na kongregation ti azo ti Israël ti giriri so lo haka ni na “wali” ti lo, lo mû zendo so: “Ye ti bira so azo asara ti ke mo na ni alingbi sara ye na mo pëpe; na fade mo fâ ngbanga na ndo menga ti azo kue so alondo na ngbanga ti ke mo. So ayeke ye ti héritier ti aboi ti L’Eternel, na so ayeke mbilimbili ti ala so Mbi mû na ala.” (Es. 54:11, 17). Zendo so aga tâ tënë na ndo ti awakua ti Jéhovah na ndo ti sese kue na “lâ ti nda ni” so (2 Tim. 3:1-5, 13). E ngbâ lakue ti ke Zabolo; nga, aye ti bira kue so lo tara ti mû ti hunzi na e awakua ti Jéhovah asara ye oko pëpe na e, ndali ti so Jéhovah ayeke na e.​—Ps. 118:6, 7.

6. Nyen la prophétie ti Daniel atene na e na ndo ti ye so ayeke si ande na komandema ti Zabolo?

⁶ So e yeke ga nduru mingi na ngoi ti hunzingo ti aye ti sioni ti ngoi so, a yeke futi ande aye kue so andu komandema ti Satan. Yingo vulu ti Nzapa apusu prophète Daniel ti fa kozoni awe so “na lâ ti agbia so [so ayeke na ngoi ti e laso], fade Nzapa ti yayu ayä royaume [na yayu] so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde [so ayeke laso] so kue awe; na fade royaume so angbâ lakue lakue.” (Dan. 2:44). Na ngoi so ye so ayeke si ande, komandema ti Satan nga na ti azo so ayeke mbilimbili-kue pëpe ayeke hunzi. Aye kue ti ngoi so, so Zabolo akomande na ndo ni, ayeke girisa ande biani biani, na Royaume ti Nzapa ayeke komande ande na ndo ti sese kue sân ti tene a kanga lege na ni.​—Diko 2 Pierre 3:7, 13.

7. E hinga tongana nyen so awakua ti Jéhovah oko oko kue alingbi ti luti na Zabolo?

⁷ Kite ayeke dä pëpe so bungbi ti Jéhovah ayeke ngbâ ande lakue nga ayeke ngbâ ande lakue ti maï na lege ti yingo. (Diko Psaume 125:1, 2.) Ka ti e, a yeke tongana nyen? Bible afa na e so e lingbi ti luti na Zabolo, tongana ti so Jésus aluti lani na lo. Biani, prophétie so Christ atene na lege ti bazengele Jean afa so atâa akangango lege so Satan ayeke ga na ni, “azo mingi so asi singo,” so ayeke na beku ti wara fini ti lakue lakue na ndo ti sese ayeke sö ande kuâ na ngoi ti futingo ti aye ti ngoi so. Bible atene so azo ni so adekongo, ala tene: “Salut ayeke ti Nzapa ti e so aduti na ndo trône, na ti Molenge Ti Ngasangbaga [Jésus Christ].” (Apoc. 7:9-14). A tene so aChrétien so a sa yingo na ndo ti ala ahon Satan na ngangu; nga so “ambeni ngasangbaga”, so amû maboko na aChrétien so a sa yingo na ndo ti ala, aluti na Satan (Jean 10:16; Apoc. 12:10, 11). Me ye so ahunda ti tene e sara ngangu nga e sambela na bê ti e kue ti tene a “zi e na tïtî wato-sioni.”​—Mat. 6:13.

Zo so azia tâ nzoni tapande ti kengo Zabolo

8. Kozo ye so Bible atene so Zabolo amû ti tara na Jésus na yando ayeke so wa? Jésus asara ye tongana nyen?

⁸ Zabolo atara lani ti pusu Jésus ti duti be-ta-zo pëpe. Na ngoi so Jésus ayeke na yando, Satan amû ambeni ye ti tara na lo ti pusu lo ti ke yanga ti Jéhovah. Ye oko, Jésus azia tâ nzoni tapande ti kengo Satan. Na pekoni so Jésus asara lâ 40 na bï 40 sân ti te ye, kite ayeke dä pëpe so lo yeke tâ na nzara ti kobe. Satan atene na lo: “Tongana Mo yeke Molenge Ti Nzapa, Mo komande tênë so ti ga mapa.” Me Jésus ake ti mû ngangu so Nzapa amû na lo ti sara na ye ndali ti nzoni ti lo wani. Me lo tene: “Mbeti ti Nzapa atene, Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.”​—Mat. 4:1-4; Deut. 8:3.

9. Tongana Zabolo agi ti wara go na ndo ti anzara so a yeke na lege ni ti duti na ni, ngbanga ti nyen a lingbi e ke lo?

⁹ Ambeni nzara ayeke dä so a yeke na lege ni ti tene azo aduti na ni. Me laso, Zabolo ayeke gi ti sara kua na anzara ni so ti wara go na ndo ti aTémoin ti Jéhovah. Tongaso, a lingbi e leke na bê ti e ti ke aye so ayeke pusu zo ti sara pitan, na aye so ayeke mingi laso. Mbeti ti Nzapa atene polele: “I hinga pëpe? fade azo ti kirikiri aga ahéritier ti royaume ti Nzapa pëpe. I handa tere ti i pëpe; azo ti pitan, azo ti sambela ayanda, azo so asara lango-sioni, azo so asara ye ti kamene na tere ti ala na popo ti ala, akoli so asara lango-sioni na mbeni koli . . . aga ahéritier ti royaume ti Nzapa pëpe.” (1 aCor. 6:9, 10). Ni la, a yeke polele so azo so ayeke sara aye ti pitan na ala ke ti changé lege ti ala, a yeke zi lege pëpe na ala ti duti na yâ ti fini sese ti Nzapa.

10. Ti gue oko na Matthieu 4:5, 6, mbeni tara wa Satan amû ti pusu Jésus ti duti be-ta-zo pëpe?

¹⁰ Na ndo ti mbeni tara so Jésus awara na yando, Bible atene: “Zabolo ague na Lo na kodoro ti nzoni-kue, lo zia Lo na li ti Temple, na lo tene na Lo, Tongana Mo yeke Molenge Ti Nzapa, Mo londo, Mo tï na sese; teti Mbeti ti Nzapa atene, Fade Lo komande a-ange ti Lo ti bata Mo; na, fade ala yô Mo na maboko ti ala, si Mo pika gere ti Mo na tênë pëpe.” (Mat. 4:5, 6). Âmanke, Satan aye ti tene na Jésus so tongana lo sara tongaso, a yeke fa na mbeni lege so apika bê mingi so lo yeke tâ Messie. Ye oko, ti tâ tënë ni, sarango ye tongaso ayeke na lege ni pëpe nga ayeke sarango ye ti baba. Me Nzapa ayeda pëpe na azo so ayeke sara ye tongaso nga lo yeke mû maboko pëpe na ala. Ge nga kue, Jésus angbâ be-ta-zo na Jéhovah nga lo kiri tënë na lege ti atënë ti Bible. Lo tene: “Mbeti ti Nzapa atene nga, A lingbi mo handa Seigneur Nzapa ti mo pëpe.”​—Mat. 4:7; Deut. 6:16.

11. Satan alingbi ti tara e na lege wa? Ye wa alingbi ti ga na pekoni?

¹¹ Satan alingbi ti tara ti pusu e ti tene e gi ti wara gloire na alege nde nde. Lo lingbi ti tara ti pusu e ti yü bongo nga ti leke tere ti e tongana ti so azo mingi ayeke sara wala ti bi tere ti e na yâ ti mbeni ngia so ayeke na lege ni kue pëpe. Me tongana e ke awango so Bible amû na e nga e sara ye tongana ti mingi ti azo, e lingbi ti ku ti tene a-ange abata e si sioni ti peko ti ye so e sara asi na e pëpe? Atâa so Gbia David achangé bê ti lo na peko ti sioni so lo sara, so andu Bath-Séba, lo wara biani asioni ye ti pekoni (2 Sam. 12:9-12). Zia e tara Jéhovah na lege ti asioni ye pëpe, peut-être na lege so e gi ti duti na kpengba songo na azo so ahinga lo pëpe.​—Diko Jacques 4:4; 1 Jean 2:15-17.

12. Tara wa a sara tënë ni na Matthieu 4:8, 9? Molenge ti Nzapa asara ye tongana nyen na gbe ti tara so?

¹² Mbeni tara so Zabolo asara na kua ti handa na Jésus na yando ayeke ngangu ti komande so lo ye ti mû na lo. Satan afa na Jésus aroyaume kue ti sese nga na gloire ti ala, na lo tene: “Tongana Mo kuku na sese, Mo sambela mbi, fade mbi mû na Mo ye so kue.” (Mat. 4:8, 9). Na lege ti handa, Satan aye ti pusu Jésus ti voro lo ahon ti voro Jéhovah, na ti sara si Jésus aduti be-ta-zo na Nzapa pëpe. So ange so agbu li na ndo ti nzara ti tene a voro lo, a sara si lo duti be-ta-zo mbeni pëpe, lo tï na yâ ti sioni, ti sarango bê nga lo ga Satan Zabolo so ayeke pusu azo na mayele ti sara aye ti sioni (Jacq. 1:14, 15). Ye oko, Jésus asara ti lo ye nde mingi! Lo leke na bê ti lo ti duti be-ta-zo na Babâ ti lo ti yayu, ni la lo tene: ‘Gue kâ, Satan! teti Mbeti ti Nzapa atene, A lingbi mo sambela Seigneur Nzapa ti mo, na mo sara gi na Lo oko.’ Na sarango tongaso, Jésus akiri ake Zabolo polele nga na kuru go. Molenge ti Nzapa aye pëpe ti mû mbage ti lo na yâ ti aye ti dunia ti Satan nga lo yeke voro ande lâ oko pëpe zo ti sioni so!​—Mat. 4:10; Deut. 6:13; 10:20.

“I ke zabolo, na fade lo kpe i”

13, 14. (a) Na fango na Jésus aroyaume kue ti sese, Zabolo aye lani ti mû nyen na Jésus? (b) Na lege wa Satan agi ti buba bê ti e?

¹³ Na fango na Jésus aroyaume kue ti sese, Zabolo aye lani ti mû na lo mbeni ngangu ti komande so ade mbeni zo awara lâ oko pëpe. Satan aye si ye so Jésus abâ apika bê ti lo na apusu lo ti gi ti ga kota zo ti poroso so ahon atanga ni kue na sese. Laso nga, Zabolo ayeke fa na e pëpe aroyaume, me lo yeke gi ti buba bê ti e na lege ti aye so e yeke bâ, e yeke mä nga e yeke gbu li ti e na ndo ni.

¹⁴ Zabolo ayeke komande dunia laso. Ni la, a yeke ye ti dongo bê pëpe so lo yeke sara ngangu na ndo ti aye so a yeke tene na radio, a yeke fa na télé nga a yeke sû na yâ ti ambeti-sango. Tongaso, a yeke ye ti dongo bê pëpe tongana aye so azo so ahinga Nzapa pëpe asigigi na ni ti tene azo adiko, abâ nga amä asi singo na ye ti pitan nga na sarango ngangu. Asabango so azo so ayeke sara ayeke ti pusu e ti sara nzara ti wara gbâ ti akungba so e yeke na bezoin ni pëpe. Na lege ti aye so, Zabolo ayeke gi ti sara si nzara ti aye so e yeke bâ, e yeke mä tënë ni nga e yeke gbu li ti e na ndo ni adü na bê ti e. Me tongana e ke ti diko, ti bâ nga ti mä aye so ague nde na akpengba-ndia ti Bible, a yeke tongana ti so e yeke tene: “Gue kâ, Satan!” Na sarango tongaso, e yeke mû tapande ti Jésus so ake na kuru go asioni ye ti dunia ti Satan. Mbeni ye so afa so e yeke sara ye nde na ti azo ti dunia ti Satan ayeke so e yeke na mbeto pëpe ti fa na place ti kua ti e, na ekole, na ndo so e lango dä nga na na popo ti afami ti e so e yeke aTémoin ti Jéhovah nga e yeke adisciple ti Christ.​—Diko Marc 8:38.

15. Ngbanga ti nyen a lingbi lê ti e akpengba si e ke Satan?

¹⁵ Na peko ti ota tara ni so Satan awara lege pëpe ti sara si Jésus ake ti duti be-ta-zo na Nzapa, “zabolo azia Lo”. (Mat. 4:11). Ye oko, Satan aleke na bê ti lo pëpe ti zia lege ti tarango Jésus biani biani, ndali ti so Bible atene: “Tongana zabolo asi na nda ti ye ti handa ti lo kue [na yando], lo zia Lo juska mbeni lâ.” (Luc 4:13). Tongana e wara lege ti luti na Zabolo, a lingbi e mû singila na Jéhovah. Me a lingbi e gi lakue ti tene Nzapa angbâ ti mû maboko na e, ndali ti so Zabolo ayeke kiri ande ti tara e na mbeni ngoi ti bê ti lo, me lakue pëpe na ngoi so e ku tere ti e na ni. Ni la, a lingbi lê ti e angbâ lakue ti kpengba, na e duti lakue nduru ti sara kua ti Jéhovah atâa atara so asi na e.

16. Jéhovah amû na e kota ngangu wa? Ngbanga ti nyen a lingbi e sambela ndali ni?

¹⁶ Ti ngbâ lakue ti wara ngangu ti ke Zabolo, a yeke nzoni e sambela, na tongaso Nzapa ayeke mû na e ngangu so ahon atanga ni kue na yâ ti dunia: yingo vulu ti lo. A yeke mû maboko na e ti sara aye so e lingbi fade pëpe ti sara ni na ngangu ti e wani. Jésus adë bê ti adisciple ti lo so Nzapa ayeke nduru ti mû yingo ti lo na ala. Jésus atene: “Tongana i so i [yeke mbilimbili-kue pëpe na asara si i] yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?” (Luc 11:13). Zia e ngbâ lakue ti sambela Jéhovah ndali ti yingo vulu ti lo. Tongana e yeke na kota ngangu so ti mû maboko na e ti ke Zabolo, a yeke sara si e luti na lo. Na ndo ni, a lingbi e yü aye ti bira kue ti yingo so Nzapa amû si e lingbi ti “luti ti ke mayele ti zabolo.”​—aÉph. 6:11-18.

17. Beku wa so amû ngia amû maboko na Jésus ti ke Zabolo?

¹⁷ Mbeni ye nde amû maboko na Jésus ti ke Zabolo, na a lingbi nga ti mû maboko na e. Bible atene: “[Jésus] so awu pono ti [keke ti pasi, MN ], Lo bâ kamene ni tongana ye senge teti tâ ngia so A zia na gbele Lo, na Lo duti na koti ti trône ti Nzapa.” (aHéb. 12:2). E nga kue e lingbi ti wara mara ti ngia tongaso tongana e yeda so Jéhovah ayeke Gbia ti Dunia Kue, e ne iri ti lo so ayeke nzoni-kue nga e ngbâ ti zia lê ti e na ndo ti fini ti lakue lakue so ayeke ku e. So kota ngia si e yeke wara ande ni na ngoi so a yeke zi ande Satan na akusala ti lo nga so ‘azo so ayeke na tâ be-ti-molenge, sese ni ayeke ga ye ti héritier ti ala, fade ala wara ngia na yâ siriri so awu mingi.’ (Ps. 37:11). Tongaso, ngbâ ti ke Zabolo tongana ti so Jésus ake na lo.​—Diko Jacques 4:7, 8.

Mo yeke kiri tënë tongana nyen?

• Nyen la afa so Jéhovah ayeke bata awakua ti lo?

• Na lege wa Jésus azia nzoni tapande ti kengo Satan?

• Na alege wa mo lingbi ti ke Zabolo?

[Foto na lembeti 30]

Ti duti na kpengba songo na azo so ahinga Nzapa pëpe ayeke sara si e ga wato ti Nzapa

[Foto na lembeti 32]

Satan aye ti mû na Jésus aroyaume kue ti sese, me Jésus ake