Chapitre 21

Na synagogue na kodoro ti Jésus

BIANI wuluwulu alondo na Nazareth tongana Jésus akiri na kodoro ti lo. Kozoni si lo londo lo gue na Jean ti kamata batême, a sala fadeso ngu oko na ndoni kete, azo ahinga Jésus tongana zo ti kpakango keke. Fadeso ahinga lo na ndo kue tongana zo ti sala ye ti kpene. Azo ti kodoro ti lo aye mingi si lo sala ambeni ye ti kpene na popo ti ala.

Azo aku mingi tongana Jésus, lege-oko tongana lo sala lakue, ague na synagogue ti ala. Na ngoi so ala sala bungbi, lo londo ti diko mbeti, na amu na lo mbeti ti prophète Esaïe. Lo wara ndo so asala tene ti Lo so asa yingo ti nzoni-kue ti Jéhovah na ndo lo, so e wara ni laso na chapitre 61 na ya Mbeti ti Nzapa ti e.

Tongana lo diko tongana nyen Lo so ayeke fa tene ti liberté na angbaa, so fade awaziba abaa ndo, nga na ndo ti ngu ti be-nzoni ti Jéhovah, Jésus akiri mbeti ni na kapita ni na lo duti. Le ti azo kue angba ti baa lo. Lo tonda ti sala tene, peut-être tene ti lo aninga, lo fa ndani: “Laso tene so ti Mbeti ti Nzapa aga taa tene na me ti i awe.”

Be ti azo ado ti ma “nzoni tene” ti lo na ala tene na popo ti ala: “Lo yeke molenge ti Joseph pepee?” Jésus akiri atene, teti lo hinga ala ye ti baa mbeni ye ti kpene: “Biani, fade i ye ti tene toli so na mbi: ‘Wakaïngo kobela, lungula kobela ti mo mveni; ye so e ma mo sala na Capernaüm, mo sala tongaso na ndo so na kodoro ti mo.’ ” Biani, azo so Jésus aduti na popo ti ala giriri abi be ti ala so a lingbi lo lungula kozoni kobela na kodoro ti lo, teti nzoni ti azo ti lo mveni. Na le ti ala Jésus asala ye so ayeke nzoni na mbage ti ala pepee.

Jésus ahinga tene so ayeke na be ti ala tongaso lo dabe ala na ambeni ye so asi giriri so abaa ala. Lo tene so awomua ayeke kozoni mingi na sese ti Israël na la ti Elie, me ato Elie na mbeni oko ti ala pepee. Nde na so, lo gue na mbeni womua so ayeke Israélite pepee na sese ti Sidon, na ndo so lo sala ye ti kpene ti so fini ti zo. Nga azo ti buruma ayeke mingi na la ti Elisée, me Elisée asala si gi tele ti Naaman ti Syrie aga nzoni.

Ngonzo agbu azo na ya synagogue, teti na lege ti atapande so ti giriri lo fa so ala yeke azo ti kion, na ala yeke na mabe pepee. Tongaso ala londo, ala sigigi na Jésus na yanga ti kodoro. Ka, na li-hoto so aleke Nazareth da, ala gi lege ti bi lo na sese. Me Jésus akpe na popo ti ala, ye oko asi na lo pepee. Luc 4:16-30; 1 aGbia 17:8-16; 2 aGbia 5:8-14.

▪ Ngbanga ti nyen wuluwulu alondo na Nazareth?

▪ Azo abaa fango tene ti Jésus tongana nyen, me na pekoni ye nyen asala si ngonzo agbu ala mingi?

▪ Ye nyen azo agi ti sala na Jésus?