Chapitre 23

Ambeni ye ti kpene na Capernaüm

JÉSUS ahiri akozo disciple osio ti lo awe, Pierre, André, Jacques na Jean. Na la ti sabbat so aga na peko ala kue ague na ya mbeni synagogue na Capernaüm. Ka, Jésus afa ye na azo. Be ti azo mingi so ama lo ado teti lo fa nda ti tene na ala na ngangu, lo fa nda ti tene tongana awafango ndia pepee.

Na la ti sabbat so, mbeni zo so ayeke na yingo sioni ayeke da. Na peko ti mbeni kete ngoi lo dekongo: “Tene ti e na tene ti mo ayeke oko tongana nyen? Mo, Jésus ti Nazareth? Mo ga ti fa e? Mbi hinga mo: Mo yeke Lo ti Nzoni-Kue ti Nzapa.”

Yingo sioni so ayeke na ya koli so ayeke mbeni oko ti a-ange ti Satan. Jésus azingo na lo na tene so: “Kaï, mo sigigi na ya lo!”

Yingo sioni so ayengi zo so ngangu na lo dekongo na ngangu ti lo kue. Me lo sigigi na ya koli ni na lo sala sioni na lo pepee. Be ti azo kue ado! Ala hunda na popo ti ala: “So nyen? Lo komande ayingo sioni na ngangu, na ala ma lo.” Fade fade tene ni atambela na kodoro ni kue.

Jésus na adisciple ti lo asigigi na ya synagogue, ala li na da ti Simon, lo so mbeni iri ti lo ayeke Pierre. Na da so tele ti mama ti wali ti Pierre aso mingi, lo yeke na kobela ti wa. Ala hunda na Jésus: ‘Tongana mo ye, mu maboko na lo.’ Tongaso Jésus aga ndulu na lo, lo mu maboko ti lo, lo yaa lo. Fade fade kobela ti wa ti lo awe, na lo londo ti leke kobe teti ala!

Na pekoni, tongana la akui awe, azo alondo na ndo kue ti ga na da ti Pierre na azo ti ala so ayeke na kobela. A ninga mingi pepee na azo kue ti kodoro so abungbi na yanga ti da ni! Jésus alungula kobela nde nde ti ala kue. Lo tomba nga ayingo sioni so ayeke na ya azo. Tongana ala sigigi ayingo sioni adekongo: “Mo yeke Molenge ti Nzapa.” Me Jésus azingo na ala, lo zia lege na ala ti sala tene pepee, teti ala hinga lo yeke Christ. Marc 1:21-34; Luc 4:31-41; Matthieu 8:14-17.

▪ Ye nyen asi na ya synagogue na la ti sabbat so aga na peko ti la ni so Jésus ahiri adisciple osio ti lo?

▪ Tongana Jésus asigigi na synagogue awe lo gue na ndo wa? Lo sala ye ti kpene wa da?

▪ Na la kui ti lango oko so ye nyen asi?