Chapitre 37

Jésus alungula vundu ti mbeni womua

NGOI KETE na peko ti so lo sava tele ti wakua ti mbeni kapitani ti aturugu, Jésus ague na Naïn, kodoro so aduti akilomètre bale ota na mbage ti mbongo ti Capernaüm. Adisciple ti lo na nga azo mingi mingi ague na peko ti lo. La aga peut-être ndulu ti kui tongana ala ga ndulu na yanga ti kodoro ni. Ka, ala tingbi azo so asigigi na kua ti mbeni zo. Ala yo kua ti mbeni pendere koli ti gue ti lu lo na gigi ti kodoro ni.

Mama ti molenge so aduti na vundu mingi, teti so lo yeke womua na lo du gi molenge oko so. Tongana koli ti lo akui, womua so alingbi ti lungula vundu ti lo tongana lo dabe lo so molenge ti lo ti koli angba. Lo zia beku ti lo kue, anzala ti lo kue na ye kue so lo ye ti wara na ye so molenge ti lo ayeke sala ande. Fadeso lo yeke na mbeni zo oko ti de be ti lo pepee. Vundu asala lo mingi na ngoi so azo ti kodoro ague na lo na ndo ti lungo kua ni.

Tongana Jésus abaa wali so aduti na kota vundu, be ti lo aye ti sala be-nzoni na lo. Lo sala tene na womua so yeeke, me nga na ngangu kete ti tene wali ni ama lo. Lo tene: “Toto pepee.” Tene ti Jésus na salango ye ti lo asala si azo mingi so abaa lo. Ala so ayo kua ni aluti tongana lo ga ndulu na tange ti kua na lo ndu ni. Biani, azo kue aye ti hinga ye so lo yeke sala.

Taa tene, azo so atambela na tele ti Jésus abaa kozoni aye ti kpene mingi so lo sala ti sava azo ti kobela. Me, ala baa so lo zingo mbeni kua la oko pepee. Lo yeke na ngangu ti sala mbeni ye tongaso? Jésus asala tene na kua ni, lo tene: “Pendere koli, mbi tene na mo, Mo londo!” Na fade fade koli ni alondo! Lo tonda ti sala tene, na Jésus amu lo na mama ti lo.

Tongana azo abaa pendere koli so akiri na fini biani, ambeni atene: “Kota prophète ayeke na popo ti e.” Ambeni atene: “Nzapa aga ti baa azo ti lo.” Na tene ti ye ti kpene so akangbi hio na sese ti Judée kue, na kodoro kue so ayeke na tele ni.

Jean Wabatizengo zo angba lakue na da ti kanga, na lo ye ti manda ambeni ye na ndo kusala so Jésus asala. Adisciple ti Jean afa na lo aye ti kpene so Jésus asala. Fade Jean asala nyen? Luc 7:11-18.

▪ Ye nyen asi tongana Jésus aga ndulu na kodoro ti Naïn?

▪ Be ti Jésus aduti tongana nyen tongana lo baa ye so? Lo sala nyen?

▪ Azo atene nyen tongana ala baa ye ti kpene so Jésus asala?