Chapitre 69

Tene ti dungo molenge

NA NGOI ti matanga ni, tene alondo na popo ti Jésus na amokonzi ti aJuif. Jésus atene na ala: “Mbi hinga i yeke hale ti Abraham, me i gi ti fa mbi ngbanga ti so i ye ti ma tene ti mbi pepee. Tene so mbi ma na Baba, mbi fa ni; me ti i, i sala ye so i ma na baba ti i.”

Jésus adi iri ti baba ti ala pepee, me lo fa so lo yeke nde na baba ti lo. Teti so ala gbu nda ti tene ti lo nzoni pepee, amokonzi ti aJuif akiri tene so: “Baba ti e ayeke Abraham.” Ala pensé so ala yeke na mara ti mabe ti Abraham, ndeko ti Nzapa.

Me, Jésus ado be ti ala na kiringo tene ti lo: “Tongana i yeke amolenge ti Abraham, i sala kusala ti lo.” Biani, taa molenge amu tapande ti baba ti lo. Jésus atene na ala: “Me fadeso, i gi lege ti fa mbi, mbi so mbi fa na ala taa tene so mbi ma na yanga ti Nzapa. Abraham asala tongaso pepee.” Jésus akiri atene: “I sala kusala ti baba ti i.”

Juska fadeso, ade ala gbu nda ti zo so Jésus asala tene ti lo pepee. Ala kiri ala tene so ala yeke ataa molenge ti mariage ti Abraham, ala tene: “A du e na lege ti pitan pepee.” Ti fa so biani ala yeke ataa wavorongo Nzapa tongana Abraham, ala tene: “Baba ti i ayeke gi oko, Nzapa.”

Ye oko, Nzapa ayeke biani Baba ti ala? Jésus akiri tene tongaso: “Tongana Nzapa ayeke baba ti i, ka i ndoyee mbi, teti mbi londo na Nzapa si mbi yeke ge na popo ti i. Mbi ga na li ti mbi mveni oko pepee, me a yeke Lo si ato mbi. Ngbanga ti nyen i hinga ni na lege ti tene ti mbi pepee?”

Jésus atara lege kue ti fa na amokonzi ti vorongo nzapa asioni ye so ayeke si na ala tongana ala ke lo. Ni laa, lo fa na ala fadeso na mbito pepee: “I, i londo na baba ti i Diable, na i ye ti sala ye so be ti baba ti i aye.” Diable ayeke mara ti baba wa? Jésus afa so lo yeke wafango zo na lo tene nga: “Lo yeke wamvene na lo yeke baba ti mvene.” Jésus ahunzi tene ti lo tongaso: “Zo so ayeke ti Nzapa ama tene ti Nzapa. Ndani laa, i ma mbi pepee, ngbanga ti so i yeke ti Nzapa pepee.”

Ngonzo agbu ala teti ngbanga so Jésus afa na li ti ala, na ala kiri tene na lo: “A yeke na lege ni pepee? so i tene: Mo yeke zo ti Samarie na mo yeke na yingo sioni.” Ala di iri ti lo “Zo ti Samarie” na sioni be, teti aJuif ake azo ti Samarie.

Jésus ake ti papa na ala ngbanga ti tene so, me lo kiri tene tongaso: “Mbi yeke na yingo sioni pepee, me mbi yekia Baba ti mbi, na i yekia mbi pepee.” Na pekoni, lo fa na ala zendo so apika be ti zo: “Tongana mbeni zo abata tene ti mbi, fade lo baa kui la oko pepee.” Biani, Jésus aye ti tene pepee so azo so atambela na peko ti lo alingbi kui la oko pepee. Me, lo fa so ala lingbi ti futi teti lakue lakue pepee, wala ti wara “kui use ni” pepee, kui so zo alingbi ti zingo na ya ni mbeni pepee.

Me, aJuif agbu nda ti tene ti Jésus tongaso pepee. Ala tene na lo: “Fadeso e hinga mo yeke na yingo sioni. Abraham na aprophète akui giriri, na mo tene, ‘Tongana zo abata tene ti mbi, fade lo tara kui la oko pepee’. Mo yeke kota ahon baba ti e Abraham so akui giriri? Aprophète akui nga. Mo tene na be ti mo, mo yeke zo nyen?”

Na ya ti atene so kue, Jésus aye biani ti fa na azo so lo yeke Messie so ala yeke ku lo. Jésus ake ti kiri tene polele na hundango tene ti ala, me lo tene: “Tongana mbi mu gloire na mbi mveni, gloire ti mbi ayeke senge senge. A yeke Baba ti mbi so amu gloire na mbi, na i tene lo yeke Nzapa ti i; me i hinga lo pepee. Me mbi hinga lo. Na tongana mbi tene mbi hinga lo pepee, ka mbi ga wamvene lege-oko tongana i.”

Jésus akiri asala tene ti Abraham so ayeke be-taa-zo, lo tene: “Baba ti i Abraham ayeke na taa ngia teti lo yeke na beku ti baa la ti mbi, na lo baa la ni so, na lo yeke na ngia.” Biani, na le ti mabe, Abraham awara ngia giriri na ndo zendo ti gango ti Messie. Teti so ala yeke na mabe pepee, aJuif atene na Jésus: “Ngu ti mo ade asi na ngu bale oku pepee, na mo baa Abraham awe?”

Jésus akiri tene na ala: “Biani, biani, mbi tene na i, kozoni si a du Abraham, mbi yeke.” Taa tene, Jésus asala tene ti fini ti lo na nduzu kozoni si lo ga na sese, tongana lo yeke zo ti yingo.

Tongana Jésus afa na ala so lo yeke kozoni na Abraham, ngonzo agbu aJuif na ala kamata tene ti bolo lo. Me lo honde tele ti lo, na lo sigigi na temple, na sioni oko awara lo pepee. Jean 8:37-59; Apocalypse 3:14; 21:8.

▪ Tongana nyen si Jésus afa so baba ti lo ayeke nde na baba ti awato ti lo?

▪ A-Juif aye ti tene nyen tongana ala di iri ti Jésus zo ti Samarie?

▪ Jésus aye ti tene nyen tongana lo tene so adisciple ti lo alingbi ti baa kui pepee?