Chapitre 76

Lo te kobe na mbeni Farizien

TONGANA Jésus asava tele ti mbeni wabuburu awe na lo kiri tene na awato so ade kite na lege ti ndo so lo wara ngangu ti lo, mbeni Farizien ahiri lo ti te kobe na da ti lo. Kozo ti te kobe, aFarizien ayeke sukula maboko ti ala juska na nduzu alingbi na tene ti kotara ti ala. Ala sukula maboko ti ala tongaso kozo ti te kobe nga na peko ti kobe ni, na nga na popo ti kobe oko oko. Kamême so tene ti kotara ti ala ake pepee ndia ti Nzapa so asala na mbeti, a hunda ye mingi ahon ye so Nzapa ahunda na lege ti dutingo mbilimbili.

Tongana Jésus ake ti sala ye alingbi na tene ti kotara, be ti mveni ti da ni ado. Kamême so lo sala tene ni pepee, Jésus ahinga tene so ayeke na be ti lo na lo tene: “I, aFarizien, i sukula tele ti kopo na sembe, me be ti i asi na tene ti nzi na sioye. I azo ti buba! Lo so asala tele ni, lo sala ya ni nga pepee?”

Jésus afa so aFarizien ayeke awandendia teti ala sukula maboko ti ala alingbi na tene ti kotara me ala sukula be ti ala na sioye pepee. Lo wa ala tongaso: “A lingbi i mu ye so ayeke na ya i na matabisi, na baa! fade ye kue aga nzoni teti i.” A lingbi ndoyee apusu ala ti mu ye, na pepee nzala ti sala ye teti le ti azo na lege ti salango ye tongana azo ti mbilimbili.

Jésus atene: “Me vundu aga na i, aFarizien, teti i futa dîme ti menthe, ti rue na ti kasa kue, na i baa mbilimbili na ndoyee ti Nzapa tongana ye senge! Me a lingbi i sala ye so, na i zia ti sala mbeni ye ni so pepee.” Ndia so Nzapa amu na Israël ahunda azo ti futa dîme, wala mbage bale oko ni, ti le kobe ti yaka. Menthe na rue ayeke akete ye so azia na ya kobe ti tene a nzere na ndo menga ti zo. A-Farizien abata ti mu biani mbage bale oko ni ti akete kete ye tongaso, me Jésus azingo na ala teti ala bata nzoni pepee aye ti kota ahon, ti sala ndoyee, ti sala nzobe na ti duti na taa-be-ti-molenge.

Jésus akiri afa ngbanga na ndo ala, lo tene: “Vundu na i, aFarizien, teti i ye ngende ti li ni na ya synagogue, na i ye azo abalao i na gala! Vundu aga na i, teti i yeke tongana sende ti kua so azo abaa pepee, na azo so atambela na ndoni ahinga pepee a yeke sende ti kua!” A baa sioye ti aFarizien hio pepee. Lege ti vorongo nzapa ti ala asala ye mingi teti le ti zo, me na ya ni mbeni ye ti ngere ngangu ayeke da pepee! A luti na ndo ndendia.

Tongana mbeni maître ti ndia, so ahinga Ndia ti Nzapa mingi, ama kpengba tene so, lo ke lo tene: “Maître, tongana mo tene tongaso, mo yeke bi tene ti kamela na li ti e nga.”

Jésus ahinga amaître ti ndia asala sioni nga, tongaso lo tene: “Vundu aga na i, amaître ti ndia, nga, teti i zia kungba so ane mingi na li ti azo, me i mveni, i ndu kungba ni na liti ti i oko pepee! Vundu aga na i, teti i leke sende ti kua ti aprophète so akotara ti i afa ala giriri!”

Kungba so Jésus asala tene ni ge ayeke atene ti kotara so ala wara na mbeti pepee me na lege ti tene ti yanga. Me amaître ti ndia aduti ndulu pepee ti lungula mbeni oko ti andia so ti tene kungba ni ane azo mingi pepee. Jésus afa so amaître ti ndia ayeda nga na fango aprophète, na lo zingo na ala tongaso: “ ‘Fade mbi hunda awagame so tene ti mene ti aprophète kue so asa giriri, atondani na la ni so asala gere ti sese juska fadeso, tene ti mene ti Abel juska na mene ti Zacharie, lo so akui na popo ti balaga na da ni.’ Biani, mbi tene na i, fade Nzapa ahunda awagame so ngbanga ti ye so.”

Azo so alingbi ti vo ala atondani na amolenge ti Adam na Eve; tongaso, Abel aduti na fini na ngoi so “asala gere ti sese”. Na peko ti so a fa Zacharie na ngangu mingi awe, aturugu ti Syrie afuti Juda. Jésus afa so mbeni futingo ti sioni ahon ayeke si na azo ti ngoi ti lo teti ala sala sioni mingi ahon. Futingo so asi ngu bale ota na miombe na pekoni, na ngu 70 ti ngoi ti e.

Jésus angba ti fa ngbanga na li ti ala: “Vundu aga na i, amaître ti ndia, teti i lungula clé ti ndara awe; i mveni i li na ya ni pepee, na i gbanzi lege na ala so aye ti li na ya ni!” Amaître ti ndia ayeke na kungba ti fa nda ti Tene ti Nzapa na azo, ti zi ndani na gigi. Me ala sala kusala ti ala pepee na même ala kanga lege na azo ti gbu ndani.

A-Farizien na amaître ti ndia asala ngonzo mingi na tele ti Jésus teti lo fa sioni ti ala na gigi. Tongana lo sigigi na da ni, ala londo ti gi lo na tene na ala ye ti gbu lo na lege ti ahundango tene. Ala gi lege ti handa lo ti tene mbeni ye so ayeke mu lege na ala ti gbu lo. Luc 11:37-54; Deutéronome 14:22; Michée 6:8; 2 Chronique 24:20-25.

▪ Ngbanga ti nyen Jésus afa ngbanga na ndo aFarizien na amaître ti ndia?

▪ Amaître ti ndia azia akungba wa na ndo azo ni?

▪ “A sala gere ti sese” lawa?