Chapitre 92
Jésus asava azo ti ngiba bale oko na ndangba guengo ti lo na Jérusalem
JÉSUS akpe azo ti Sanhédrin so agi lege ti fa lo. Lo londo na Jérusalem ti gue na Ephraïm, kota kodoro so ayo gi kilomètre 25 na mbage ti banga na to. Lo duti ka lege-oko na adisciple ti lo yongoro na awato ti lo.
Me, matanga ti Pâque ti ngu 33 aga ndulu. Jésus alondo fade fade ti tambela. Lo gue na Samarie na lo gue nga juska na Galilée. Lo gue ti baa kodoro so ti ndani kozoni si lo wara kua. Na Galilée, Jésus na adisciple ti lo abungbi peut-être oko na ambeni zo so ayeke gue na Jérusalem ti sala matanga ti Pâque. Ala mu lege so ague na kodoro ti Pérée, mbeni kodoro so ayeke na mbage ti to ti ngu ti Jourdain.
Tongana Jésus alondo ti gue, na lo li na ya mbeni kete kodoro ti Galilée wala Samarie, azo ti ngiba bale oko aga na gbele lo. Sioni kobela so ate tele ti zo kete kete—a te li ti maboko ti zo, li ti gere ti lo, hon ti lo nga aporo ti yanga ti lo. Ti kanga lege na kobela ti mu azo kue, Ndia ti Nzapa asala tene so na ndo zo so ayeke na ngiba: “A lingbi lo kanga ye na ndo ti yanga ti lo, na a lingbi lo dekongo: ‘Sioni! Sioni!’ La na la, lakue so kobela so ayeke na lo, lo yeke sioni. (...) Lo duti na peko ti kando.”
Azo bale oko abata tene so Ndia afa na ndo azo ti kobela ti ngiba na lege so ala luti yongoro mingi na Jésus. Na ala tene na lo na kongo: “Jésus, Wafango ye, sala be-nzoni na e.”
Tongana lo baa ala yongoro ka, Jésus amu yanga na ala: “I gue i fa tele ti i na aprêtre.” Jésus asala tene tongaso teti so Ndia ti Nzapa amu lege na aprêtre ti diko azo ti kobela ti ngiba so asava awe azo ti mbilimbili, si amu na ala lege ti kiri ti duti mbeni na azo so ayeke na sava ti tele.
Azo ti ngiba bale oko so azia be ti ala na ya ngangu ti Jésus ti sava kobela ti azo. Kamême so ala de ti sava pepee, ala gue fade fade ti baa aprêtre. Na lege ala wara futa ti mabe ti ala na ya Jésus. Ala tonda ti baa na ti hinga so ala wara sava ti tele awe!
Azo ti ngiba gumbaya so awara sava ti tele awe ague na lege ti ala, me oko ti ala, mbeni zo ti kodoro ti Samarie, akiri ti gi Jésus. Ngbanga ti nyen? Ngbanga ti kota ngia so asi be ti lo teti ye so asi na lo na lege. Lo gunda Nzapa na kota go, na, tongana lo wara Jésus, lo ti na gbele lo ti kiri singila na lo.
Jésus akiri tene na lo tongaso: “Ala yeke bale oko pepee so ngiba ti ala awe? Me ambeni zo ti ngiba gumbaya ayeke na ndo wa? A wara mbeni zo oko pepee so akiri ti mu gloire na Nzapa, gi wande so?”
Jésus atene na Samaritain so: “Mo londo mo gue; mabe ti mo asala si mo ga nzoni.”
Tongana e diko tene ti azo ti ngiba bale oko so Jésus asala si tele ti ala aga nzoni, a lingbi e manda ye na lege ti hundango tene ti lo: “Ambeni zo ti ngiba gumbaya ayeke na ndo wa?” Azo ti ngiba gumbaya so akiri singila pepee asala kota siokpari. Lege-oko tongana zo ti Samarie, e fa so e kiri singila na Nzapa teti anzoye so lo sala teti e, so na popo ni e wara taa zendo ti fini ti lakue lakue na ya fini sese ti mbilimbili ti Nzapa? Jean 11:54, 55; Luc 17:11-19; Lévitique 13:16, 17, 45, 46; Apocalypse 21:3, 4.
▪ Jésus asala nyen ti kpe na ti ti azo so agi lege ti fa lo?
▪ Na pekoni Jésus alondo ti gue na ndo wa? A lingbi lo si na kodoro wa?
▪ Ngbanga ti nyen azo ti ngiba so aluti yongoro na Jésus? Ngbanga ti nyen Jésus atene na ala ti gue ti fa tele ti ala na aprêtre?
▪ Ye nyen e lingbi manda na lege ti tene so?